ЩэкIогъум и 24-м, Къэбэртае-Бэлкъар республикэм ипрезидент щытыгъэу, непэ Урысие Федерацием ипарламент хэтэу Къаныкъо Арсен Сирием щыIэ Адыгэ хасэ гупчъэм ихэсашъхьэ хэтхэм ыкIи Сирием щыпсэурэ Адыгэхэм ясовет хэтхэм Дамаск ащыIукIагъ. ЩэкIогъум и 23-м Урысием щыщ депломат купым Къаныкъор ахэтэу Дэмаск къэкIогъагъэх. Ахэр Сирием ипрезидент Асад Бэщар IукIэгъагъэх. Джащ фэдэу фасебокымкIэ инэкIубгъо къыщетхы Сирием ит Адыгэ хасэ гупчъэм хэтэу Щкай Джанблат.
Хасэ гупчъэм итхьэматэу Исхьак Акрамрэ Советым итхьэматэу Къэбэтае Аднанрэ зэIукIэм къыщыгущыIагъэх. Апэу ахэм Къаныкъо Арсен тхьапитIу ратыгъ Урысием ипащэхэм аритыжьынэу, зыр Урысием ипрезедентэу Путин Владимир фэшI адрэр Урысием ипарламент итхьэматэ фэшI. А тхьапитIум Сирие Адыгэхэм яIоф зытетыр ит ыкIи хэкум къэзыгъэзэжьынэу зышIоигъохэм IэпыIэгъу зэрарищыкIагъэр ит.
Ащ нэужьым хасэм итхьэматэрэ советым итхьэматэрэ Сирие Адыгэхэм яIоф зытетыр игъэкIотыгъэу къаIотагъ. Ахэм къызэраIуагъэмкIэ Дамаск, Алепо, Хьумс, Рака, Хьасакэ къалэхэм адэжь Iут Адыгэ къуаджэхэр зэхэубэтагъэх, цIыфхэр адэкIыжьыхи нэмыкI чIыпIэхэм кIощыгъэх, зы купхэри Сирием ыкIыжхи нэмыкI хэгъэгухэм кIуагъэх.
Урысем уихьэныр нахь IэшIэхэу зэрэшIыгъэн фаер, хэкум къэзыгъэзэжьыхэрэм Урысиер зэрадэIэпыIэн фаер, Урысбзэр пшIэн фаеу законым итыр зэрэщыгъэзыегъэн фаер ыкIи Украинэм щыщхэм Урысиер зэрадэIэпыIэрэм фэдэу Адыгэхэми къызэрадэIэпыIэн фаер хасэм итхьэматэмрэ советым итхьэматэмр ягущыIэхэм къыхагъэщыгъ. Ащ нэмыкIэу Дамаск, Амман ыкIи Налщич зэзыпхырэ къохьлъатэ тагъэуцомэ ишIуагъэ зэрэхэлъэр къаIуагъ. КIэухым Къаныкъом зыфагъэзагъ мы Iофэу къаIэтыгъэхэм адэлэжьэнэу .
Къаныкъо Арсен зэIукIэм хэлэжьагъэхэм Iуагъэ къаритыгъ Iофэу къаIэтыгъэхэм адэлэжьэнэу ыкIи ахэр Урысие Федерацием ипарламент нигъэсынхэу. "Мы Iофэу къэшъуIэтыгъэхэр джырэблагъэ Дунае Адыгэ хасэм Налщыч зэхэсэу щыриIэщтым хьэшъулъхь" Къаныкъом къариIуагъ.
КъэIогъэн фае, Сирием щыпсэурэ Адыгэхэм ясовет зыфэтыIуагъэр мазэ заулэ ипэкIэ зэхащагъ. Ащ пшъэрылъэу фагъэуцугъэр Сирием щыпсэурэ Адыгэхэм яIофхэм сыд фэдэ лъэныкъокIи дэлэжьэныр ары, политикэ Iофри хэтэу. Мыр мыщ фэдэу зыфашIыгъэр Сирием ит Адыгэ хасэ гупчъэу зыфэтыIуагъэм иустав зэритымкIэ ар политикэ Iофым хэлажьэу хъущтэп, ащ пае мыдрэ советыр зэхащагъ.
