Адыгэ ныпым имэфэкI мэлылъфэгъу мазэм и 25-м дунаем тет адыгэ пстэуми игъэкIотыгъэу хагъэунэфыкIыщт.
Адыгэ хэкумкIэ, зэкъош республикэхэу Адыгэ Республикэм, Къэбэртае-Бэлкъар Республикэм, Къэрэщай-Черкес Республикэм я къалэ шъхьэIхэу Мыекъуапэ, Нальчик, Черкеск ыкIи хы Iушъо Щапсыгъэм зэхахьэхэр ащыкIощтых, гъогухэм Адыгэ ныпхэр аIыгъэу къарикIощтых, концертхэр, джэгухэр ашIыщтых.
Джащ фэдэу адыгэхэр зыщыпсэурэ хэгъэгухэу Урысием, Тыркуем, Иорданием, Сирием, Германием, Израилым, Америкэм ыкIи нэмыкI хэгъэгухэм зэхахьэхэр ащыкIощтых.
Адыгэ лъэпкъым илъэс мин пчъагъэ хъугъэу нып иI. Ащ къызэкIэлъыкIорэ лъэшIэгъухэм хэхъоныгъэхэр фашIэу къырикIуагъ. Адыгэ Ныпыр ижъырэ ныпым техыгъэу, нып уцышъоу, щабзищырэ жъуагъэ 12-рэ тетэу 1830 илъэсым Шъачэ лъэпкъ зэфэсэу щыIагъэм ыщтагъ.