Къэбартае-БэлъкъарымкIэ Адыгэ Iофым пылъхэр рагъэзых

Мэзаем и 28-м Къэбартае-Бэлъкъар Республикэм икъэлашъхьэ Нальчик джыри зэ полицием ыубытыгъ Адыгэ Iофым пылъ Адыгэ кIалэу Ахахъо Андзор.
Ар мафэм ренэу чэщым нэс аIыгъи ытIанэ атIупIщыжьыгъ. Мафэм къыкIоцI Андзор иунэ полициехэр ихьэхи къаплъэхьыгъ. Мыр атIуанэр Андзор зэраубытыгъэр. Мэзаем и 7-м Шъачэ олимпым дезымыгъащтэрэ мырэзэныгъэ захахьэу Налъчик щыкIогъагъэм нэбгрэ 30 полицием ыубытгъагъ. Ахэм ахэтыгъ Андзор. Ар тхьэмафитIу хьэпсым чIагъэсыгъагъ ыкIи ащ чIэсэу утынхэр рахыгъагъ.

Андзор законым ыкIи демократием тетэу Адыгэ Iофым дэлажьэ ау зэрэхъурэмкIэ  Къэбартае-БэлъкъарымкIэ Адыгэ Iофым упылъыныр зыгорэхэм къакIурэп.

БэшIагъэ хъугъэу Къэбартае-БэлъкъарымкIэ Адыгэ Iофым пылъхэр рагъэзых ыкIи республикэм рафыхэуи мэхъу ау мы аужьырэ мазэхэм адыгэ Iофым пылъхэм нахь дэеу къадэзекIох.

Адыгэ Iофым дэлажьэхэрэм къызэратебэнагъэхэр Iоф къызэрыкIоу щытэп.  Мыр республикэм ипрезидентэу КIокIо Юра псынкIэу ыгъэуцун фае, амырмэ Iофхэр нахь дэй хъун илъэкIыщт.

Адыгэ хасэу щыIэхэр Къэбартаем щыхъухэрэм лъыплъэнхэу щыт ыкIи ащ яIоф халъхьэнэу пшъэрылъ ателъ.