Сирие Адыгэхэм яIоф хэт пылъыр?

ЗанкIэу къапIомэ хъущт, зи пылъып, сыда пIомэ, милион заулэ хъурэ адыгэ лъэпкъым, республикэ 3 зиIэ лъэпкъым, хасэ шъэ пчъагъэ зиIэ лъэпкъым Сирием щыпсэурэ адыгэхэм IэпыIэгъу аратын алъэкIыгъэр, ахъщэкIэ къэплъытэмэ мин 10 дулар заулэ неIэп. Шъыпкъэм уфаемэ мыр къэптхынкIи утеукIытэхьнэу щыт, нэмыкI лъэпкъхэр емыджэхэмэ нахьышIу. КIо адыгабзэм хэт ебгъэджэн, нэмыкI лъэпкъ пакIуи адыгэхэр ерагъоу еджэх. Мыщ фэдэу щытхэу, джыри мыукIытэхэу я бгъэхэр рагъэпщэу къэуцунх. Тэ тыгъэшIэгъон къыуаIощт. Таущтэу угъэшIэгъон! Къэрал гъэпсыкIэ тиI оIо, республикэ 3 тиI оIо ау ащ ибюджет ухэIэни Сирием щыпсэурэ лъэпкъэгъухэм уаIэпыIэнэу а бюджетым зи къыхэбгъэкIырэп. КъыхагъэкIы пакIуи мыщ фэдэу къыуаIон алъэкIыщт "тэтыехэм таблэкIэу удэ щыIэхэм яттыщта". КIо а бюджетыр "тэтыехэми" аратырэп, хьыкумэтым пышIагъэхэм адырыжьы.

МыдэкIэ зыбгъазэмэ (Тыркуе) гъэшIэгъонхэри олъэгъух. Тэ тыфедерацинахь аIо, хасэ 100 къытхэтнахь аIуи загъэпщы (Кавказ Федерацие). Ада ащ фэдизэу убэлэхьмэ, хьэйнапэба Сирием ис къощхэм дуларитIу яттыгъ пIоу ущысыныр. КIо мыхэм Iофыр илъэс 100 пэкIэ маплъэхэу агъэпси ары, мары тыгъуасэ ахэр Адыгэ республикэм кIуагъэх, Тхьэкущынэми, ащ ихьыкумэти IукIагъэх. Адыгэхэм яIоф дэгъоу агъэпси ытIанэ дэгъоу мэщхагъэх, дэгъоу хэкум зыщаплъэхьэу къакIохьыгъ.

Мыдрэ бгъум зыкъэдгъэзэжьымэ (Къэбэртаер) шъэфэу тIысыжьыгъэх. Ада, квотыр ухыгъэнахь аIо, мары Москва тыдэгущыIэщт аIо. Ащ илъэс 10 рагъэхьыныр ит, етIуагъ къетIожьыгъ аIоу.

Игузэгурэ лъэныкъом ткIомэ (Черкесия) зи плъэгъурэп, ада, премер-министыр IэнатIэр заубытыжь нэужьым Адыгэ лъэпкъым иIофхэр зэшIуахыгъэ фэдэу къашIошIи ары.

Ихэрэ шъолъырым тыкъакIомэ (Иордание), тэри зыгорэхэр тэшIэ аIо, мары Адыгэу Сирием къикIыжьхи Иорданием къихьэжьыгъэхэм тадэIэпыIэ аIо. Мыхэм япIон плъэкIыщт, апэу шъо шъузыдэIэпыIэжь, машъор шъуадэжь къэсыпэт.


УдэкIэ тыIабэмэ (Америка, Европэ) такъытемыгущыIэмэ нахьышIу. Зи зимышIэрэм сыд пIони утегущыIэщт. КIо мыхэм емыкIу афэмылъэгъуми хъущт, сыда пIомэ, ахэр кIыжьэу щысых ытIанэ шъыпкъэр пIощтмэ, ахэм адыгэм иIоф Европэ парламентым, Америка Конгресым щагъэпси ары. Уахътэ яIэп.

Гунэ Нарт