Къуэдзокъуэ Рустам.
Къэбэрдей-Балъкъэрым и къару къулыкъухэм, мэкъуауэгъуэм и II-мкъатащ, зауэлIу зыхуагъэфащэу яукIа нэрыбгитIыр хэт щыщми.
Ахэм зэрытрагъэчыныхьымкIэ, Бахъсэн куейм хыхьэ Хьэтэжьыкъуэ жылагъуэм, мэкъуауэгъуэм и 5-м щекIуэкIа операцэ хэхам щаукIащ илъэс 33 зи ныбжь Къуэдзокъуэ Рустамрэ илъэс 26 хъу Хьэтыкъуэ Асчэррэ. Къару къулыкъухэм ягъэув я щIалитIыр япэу ятеуауэ.
Къэбэрдей-Балъкъэр хабзэхъумэ къулыкъум и лIыкIуэм Кавказ Узелым жриIащ «Къуэдзокъуэри Хьэтыкъуэри ищхъэрэ-къуэкIыпIэ секторкIэ зэджэ зауэлI гупым ящыщу щытауэ».
Ауэ Къуэдзокъуэ Рустам и Iыхьлыхэм иратыжа и хьэдэм фэбжь куэд телъщ, абы хьэзаб зэрырагъэшэчар къигъэлъагъуэу. Хьэдэм траха видеор мэкъуауэгъуэм и 8-м иригъэуващ ищхъэрэ-кавказ зауэлIхэм я сайтым.
Видеом IупщIу щыболъагъу щIалэм и Iэпхъуамбэхэр зэрыпачар, зыр падэжащ, и щIыфэм мафIэм иса щIыпIэхэр иIэщ, апхуэдэу сэ уIэгъэм ещхь дыркъуэхэр зэгуадэжащ, и пщэри и тхы къупщхьэри къутащ, и зы Iэр Iэдакъэ щIыбымкIэ зэпащIыкIащ.
Хуитыныгъэ Радиом электрон пощткIэ къыIэрыхьащ Къуэдзокъуэ Рустам и анэм и аудиор Анэм зэрыжиIэмкIэ, и къуэр илъэсибгъукIэ хьэпсэм иса нэужь хуит ящIыжащ мазих хуэдизкIэ узэIэбэкIыжмэ.
Ар махуэ хэхакIэ полицэм кIуэурэ зыщыщIитхэт.
Апхуэдэу мэкъуауэгъуэм и 1-м зыщIитхэну кIуа нэужь къигъэзэжакъым, махуэ зыбжанэ текIри и къуэм и хьэдэр иратыжащ уIэгъэ шынагъуэхэр телъу. ЖраIащ, и къуэр операцэ хэхам деж щаукIауэ. Анэм шэч къытрихьэкъым ар полицэм деж удынкIэ зэраукIам.
«Си къуэр, зыщIитхэн щхьэкIэ Налшык полицэм и ещанэ къудамэм кIуэт и ныбжьэгъур дэщIыгъуу.
Мэкъуауэгъуэм и I-м ар полицэм и закъуэ кIуащ, и ныбжьэгъур а махуэм щыIэтэкъым. Сэри сылажьэт.
Ар абы щIыхьащ. Ар илъэгъуащ си малъхъэм. ЖриIащ зыщIитхэну кIуэуэ.
Абдежым, полицэ къулыкъур здытет уэрамым и гъунэгъуу, ар аргуэру ялъэгъуащ си нэIуасэ бзылъхугъитIым. Ахэм сэлами ярихащ. Iэ яхуищIри полицэм щIыхьащ.
Абы щылажьэ инспекторхэм щIагъэбыдэ, ар а махуэм зыщIитхэну мыкIуауэ, зэи димыгъэхуу полицэм кIуэуэ щыта пэтми.
Ар абы щIыхьащ, къызэрыщIэкIымкIэ, яубыдри щIыунэм ирадзащ. Абдежым ахэм щIыунэ яIэщ.
Удын шынагъуэхэр, хьэлъэхэр тралъхьэри иужькIэ яукIыжащ. Абы кIэлъыкIуэу инспекторхэр си деж къопсалъэри къызоупщI:
- Дэнэ щыIэ уи къуэр? Ар зыщIитхэну къэкIуакъым, жэуэ.
Рустам жэщым къэкIуэжакъым зыщIитхэну кIуа нэужь.
Сэ сыкIуэри а ещанэ къалэ полицэ къудамэм тхылъ щIэслъхьащ си къуэр зэрыкIуэдам теухуауэ.
Ахэм яцIыхуххэт ар удын гъущэкIэ зэраукIар. Ауэ итIани си лъэIу тхылъыр ящтащ.
Мэкъуауэгъуэм и 5-м телефонкIэ къэпсалъэри, къызжаIащ хьэдэр къэсцIыхужыну сраджэу.
Сэ моргым сыкIуащ, ауэ Рустам къысхуэцIыхужакъым.
Ар щIалэ къабзэу, дахэу, щыгъын лъапIэ зэрихьэу щытащ. Сом 7.000 и кIэжыпым илъащ. Вакъэ лъапIэхэр щыгъащ, пыIэ щхьэрыгъащ, джинс щыгъащ.
Иджы ар моргым щIэлът удын шынагъуэхэр телъу. И Iэпхъуамбэхэр пачат. Езыр гъурыбзэт, и фэр гъуэжьт. Манекеным хуэдэу цIыкIу хъуат. Сэ сыIуплъэри, ар къысхуэцIыхужакъым. Дзэ щыгъын ин дыдэ и Iэпкълъэпкъ пцIанэ дийям щакъуат.
Ахэм ар яукIащ, иужькIэ операцэ хэха гуэр къагупщыс, а хьэдэхэр абы яшэн щхьэкIэ.
Сыту жыпIэмэ, моргым деж ар сэ къызжиIащ экспертым «Аращ, дэ абдежым дыщыIащ, икIи уи къуэм и хьэдэр абдежым щылъащ. Дэ тхылъкIэ къэдгъэлъэгъуащ ар абдежым зэрыщызэуар икIи абдежым зэрылIар».
Сэ абы жесIащ си къуэр мазэм и япэ махуэм зэрыкIуэдар, икIи дауи ар нышэдибэкъым щылIар.
Сэ сы эксперткъым ауэ солъагъу а хьэдэр махуитI-щы зэрыщылъар.
Абы и щIыIуж абы щIэпхъэджагъэ Iуэху къыхурахьэжьащ, Бахъсэн деж зэуа хуэдэу. Ягъэкъуаншэ.
А псори езы къару къулыкъухэм зэхаджэ террор пэкъуащIэ зэхаублэн щхьэкIэ. ЗауэлI фIащри зыгуэрхэр къагъуэтри асыхьэту яукIа хуэдэу ягъэIу. ИужькIэ абы папщIэ ахъшэхэр мелуанкIэ къыхуагъакIуэ. Ахэм фIыщIапщIэ инхэр, пенсэхэр ират, я къулыкъукIэ драгъэкIуей. Аращ абыхэм си къуэр щIаукIари»
Къуэдзокъуэ Рустам Налшык деж.
Ищхъэрэ Кавказым деж къару къулыкъухэм цIыхухэр ядыгъуныр, ахэр удын гъущэкIэ яукIыныр, ягъэкIуэдыныр Iуэхугъуэ зэхэщIыхьа ин дыдэхэм ящыщщ. Кавказ политикэм зэритхымкIэ, унафэщIхэм нэхъ къащтэ ар щымыIэ хуэдэу фэ зытрагъэуэну.
Урысей къару къулыкъухэм я залымыгъэм щыхьэт техъуэ хьэкъ белджылыхэр журналистхэми пэжырытелъхьэхэми яIэми, лей зезыхьахэр я хьэкъ IуамыгъащIэу къонэ. Уеблэмэ, я IэнатIэкIэ драгъэкIуейр мащIэкъым.
Къэралыбэ пэжырытелъхьэхэми, урысей пэжырытелъхьэхэми гузавэу къызэратымкIэ, Ищхъэрэ Кавказым деж хабзэ хъужащ зауэлIу къилъытэу полицэм иубыду удын гъущэкIэ иукIахэм я хьэдэхэр иужькIэ операцэ хэхам деж щаукIауэ ягъэувыжыныр.
Хуитыныгъэ Радио. Къардэн Аминат