Хы ШIуцIэ Iушъом щыпсэурэ Адыгэхэм (шапсыгъэхэм) я Адыгэ Хасэ ия VIII-рэ отчет-хэдзын зэфэс бэмышIэу ТIуапсэ щыкIуагъ.
Ащ изыфэгъэхьазырын мэзитIум ехъу пэIуагъэхьагъ. ЛIыкIуи 150-рэ фэдиз зыхэлэжьэгъэ зэфэсым Iофыгъуабэ къыщаIэтыгъ. Лъэпкъ шъуашэхэмрэ лъэпкъ IэрышIхэмрэ якъэгъэлъэгъонхэр къуаджэу ЦIэпс щыщ КIуращын Маринэ къыгъэхьазырыгъагъэх, къэгъэлъэгъонэу «Адыгеим илитературэ идунай» зыфиIорэм, кIэлэцIыкIу художественнэ коллективхэу къуаджэхэу Псыбэ, Агуй-Шапсыгъэ, КодэшъхьапIэ къарыкIыгъэхэм яконцертхэм ягуапэу яплъыгъэх. Адыгэ Хасэмрэ шъолъырым ихабзэ икъулыкъухэмрэ язэдэлэжьэныгъэ къизыIотыкIырэ сурэт къэгъэлъэгъонри цIыфхэм агу рихьыгъ.
Зэфэсым хэлэжьагъэх Краснодар краим ивице-губернатор игуадзэу, иадминистрацие IэкIоцI политикэмкIэ идепартамент идиректор игуадзэу КIэрмыт Мухьдинэ, ТIопсэ районым ипащэу Владимир Лыбаневыр, къалэу Шъачэ имэр иапэрэ гуадзэу Виктор Филоновыр, Дунэе Адыгэ Хасэм ипрезидентэу Сэхъурэкъо Хьаути, Къэбэртэе-Бэлъкъарым и Адыгэ Хасэ итхьаматэу ХьэшIуцIэ Мухьамэд, Урысыем ис ермэлхэм я Союзрэ Урысыем ис урымхэм я Союзрэ я ПсышIопэ къутамэхэм ялIыкIохэр, къэзэкъхэр, хы шIуцIэ Iушъом щыпсэурэ нахьыжъхэр. Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр ишIуфэс тхылъ зэфэсым къыщеджагъэх.
Адыгэ Хасэм итхьаматэу КIакIыхъу Мэджыдэ иотчет доклад зыфэгъэхьыгъагъэр блэкIыгъэ илъэсиплIым къыкIоцI хыIушъом щыпсэурэ шапсыгъэхэм ясоциальнэ-экономикэ, якультурэ хэхъоныгъэкIэ Iофыгъоу щыIагъэхэр зэрэзэшIуахыгъэхэр ыкIи пшъэрылъэу зыфагъэуцужьыхэрэр ары. Нахьыжъхэри, ныбжьыкIэхэри, хасэм хэтхэри, къоджэдэс къызэрыкIохэри зэфэсым къыщыгущыIагъэх.
ЯшIошIхэу зэфэсым къыщаIуагъэхэр ыкIи предложениеу къыщахьыгъэхэр кIэух унашъом хагъэхьагъэх. Общественнэ парламентым итхьаматэу КIакIыхъу Мэджыдэ хадзыжьыгъ. Тхьаматэм иапэрэ гуадзэу агъэнэфагъ къуаджэу Къэлэжъ щыщэу Хьартыу Хьамед, гуадзэхэр: ПсышIопэ районымкIэ - поселкэу Ахынтамэ щыщ ЛIыф Хъалид, ТIопсэ районымкIэ - къуаджэу Агуй-Шапсыгъэ щыщ Шъхьэлэхъо Сэфэр, Шъачэ и Гупчэ районкIэ - Хьачмамыкъо Вячеслав.
Общественнэ парламентэу нэбгырэ 35-рэ зыхэтыр зэфэсым щызэхащагъ. Тхьаматэмрэ ащ игодзиплIырэ анэмыкIэу, пэублэ организациехэм япэщэ 24-р, президиумым хэт нэбгыри 6-р - поселкэу Тюменскэм щыщ ЦунтIыжъ Хьамед, къуаджэу Тхьагъапшъэ щыщ Хэшх Руслъан, Агуй-Шапсыгъэ щыщ Ныбэ Джамбулэт, Хьаджыкъо щыщ Шъыжъ Мусэ, къалэу Шъачэ дэс ХьакIэмыз Долэтбый, гъэзетэу «Шапсугием» иредактор шъхьаIэу Ныбэ Анзор хасэм хэхьагъэх. Джащ фэдэу хасэм хадзыгъ къуаджэу Къэлэжъ иветеранхэм я Совет итхьаматэу Хьартыу Джанбеки.
Краснодар краим игубернатор ипшъэрылъхэр зыгъэцэкIэрэ Вениамин Кондратьевым ирэзэныгъэ тхылъхэр Адыгэ Хасэм нахь чанэу хэлажьэхэрэм зэфэсым щаратыжьыгъэх. КIэрмыт Мухьдин ары ащ фэдэ пшъэрылъ лъапIэр зыгъэцэкIагъэр. Дэгъоу Iоф зышIагъэкIэ зыцIэ къыраIуагъэхэм ащыщых лъытэныгъэшхо зыфашIыхэу, ныбжь зэфэшъхьаф зиIэхэу, лъэныкъо хэхыгъэхэм афэгъэзагъэхэу КIакIыхъу Мэджыд (п. ПсышIуап), Мэфэгъэл Сэлым (Агуй-Шапсыгъ), Алэлэ Сэфэр (Агуй-Шапсыгъ), Ацумыжъ Айсэ (п. Ахынтам), ЦунтIыжъ Хьамед (п. Тюменский), Ацумыжъ Хьасан (Псыбэ), Хъущт Заур (ШэхэкIэишху), Хьачмамыкъо Вячеслав (Шъачэ), Ныбэ Джамбулэт (Агуй-Шапсыгъ), Шъхьэлэхъо Мэдин (Агуй-Шапсыгъ), Хэшх Руслъан (Тхьагъапшъ), Шъхьэлэхъо Сэфэр (Агуй-Шапсыгъ), Нэгъуцу Руслъан (Агуй-Шапсыгъ).
Шъачэ иапэрэ вице-премьерэу Виктор Филоновым ирэзэныгъэ тхылърэ курортым ипащэу Анатолий Пахомовым пшъэрылъ зэрафишIыгъэм теткIэ медалэу «Къалэу Шъачэ иобщественнэ, иполитикэ щыIэныгъэ иIахь зэрэхишIыхьагъэм фэшI» зыфиIорэмрэ ШэхэкIэй иветеранхэм я Совет итхьаматэу, Адыгэ Республикэм изаслуженнэ кIэлэегъаджэу Шъхьэлэхъо Сэлым къыфагъэшъошагъ.
Муниципалитетым ипащэу Владимир Лыбаневым КIэрмыт Мухьдинэ, поселкэу Ныджэпсыхъо инахьыжъхэм я Совет итхьаматэу Ацумыжъ Руслъан, селоу ЦIэпс инахьыжъхэм я Совет итхьаматэу Шъхьэлэхъо Анатолий бгъэхэлъ тамыгъэу «ТIопсэ районым ихэхъоныгъэ яIахьышхо зэрэхашIыхьагъэм фэшI» зыфиIорэр зэфэсым щаритыжьыгъ.
Адыгэ Макъ
