НэмыкI къуаджэхэм афэдэу псэупIэу ШэхэкIэй культурэм и Унэу дэтыр цIыф кIуапIэу щыт. Мыщ мэфэкIхэр щыхагъэунэфыкIых, цIыфхэр къыщызэхэхьэх, ныбжьыкIэхэр пчыхьэрэ къекIуалIэх.
БэмышIэу щыIэгъэ къоджэ зэIукIэм кIэу клуб зэрашIын фаер АкIэгъу Ислъам цIыфхэм къахилъхьагъ. «Ар клуб къодыещтэп, культурэм и Унэу, лъэпкъ культурэм игупчэу щытын фае, — къыIуагъ нахьыжъхэм ащыщэу Ныбэ Батырбый. — КлубыкIэм тарихъ музей, тхылъеджапIэ, художественнэ самодеятельностыр шIу зылъэгъухэрэм зызщагъэсэн унэ, нэмыкIхэри хэтынхэ фае».
Ащ фэдэ Iофыгъом игъэцэкIэн чылэм щырагъэжьэныр игъо шъыпкъэу зэрэщытым къыдырагъэштагъ ШэхэкIэе чIыпIэ коим ыкIи общественнэ чIыпIэ зыгъэIорышIэжьыпIэу «ШэхэкIэй» зыфиIорэм хэт къоджэдэс чанхэми.
— Культурэм и Унэу тикъуаджэ щыдгъэпсыщтыр уахътэм диштэн фае, — къыIуагъ чIыпIэ администрацием ипащэу Бэрдые Руслъан.— Клубым имызакъоу, ар зытет чIыгури, къыпыщылъ шъолъырри зэрифэшъуашэу зэтедгъэпсыхьащтых. Чъыгхэр щыдгъэтIысыщтых, тетIысхьапIэхэр дгъэуцущтых, лъэс гъогу цIыкIухэм ахэм уаращалIэу тшIыщтых. Джащ фэдэу сабый цIыкIухэм апае джэгупIэ къыщызэIутхыщт.
ЛъэIу тхылъ къалэу Шъачэ имэрэу А. Пахомовым фатхынэу зэIукIэм къекIолIагъэхэм тыраубытагъ. Культурэм и Унэ кIэу ашIыфэкIэ илъэсыбэрэ агъэфедэгъэ клубыжъым фэсакъынхэу зэдаштагъ.
Къоджэдэсхэр зыгъэгумэкIырэ Iофыгъо зэфэшъхьафхэми зэIукIэм щатегущыIагъэх. Ахэм ащыщых гъогухэмрэ чэу лъапсэхэмрэ къабзэу аIыгъынхэр, псырыкIуапIэхэр зэблэхъугъэнхэр, къэхалъэм екIурэ гъогур асфальткIэ пкIэгъэныр, нэмыкIхэри.
Ныбэ Анзор