ЕлъэшIыIэ Бислъанрэ Хьатхъохъу Байзэтрэ ТекIоныгъэр Японием къыщахьыгъ


Японием икъалэу Токио зэхэпхъэгъэ шъхьэзэкъо зэнэкъокъухэмкIэ Дунэе зэIукIэгъухэр щыкIуагъэх. Адыгэ Республикэм испортсменхэр зэIукIэгъухэм ахэлэжьагъэх, бэнэпIэ алырэгъухэм текIоныгъэр къащыдахыгъ.

Мексикэм, Японием, Урысыем, нэмыкIхэм якомандэхэм ахэтхэр зэнэкъокъугъэх. Урысые Фе­дерацием илIыкIохэр нэбгырищ хъущтыгъэх. Сергей Мартыновыр Ростов-на-Дону щэпсэу. Хьатхъохъу Байзэтрэ ЕлъэшIыIэ Бислъанрэ Адыгэ Республикэм илIыкIох.

ЕлъэшIыIэ Бислъан килограмм 77-м нэс къэзыщэчырэмэ якуп хэтэу иIэпэIэсэныгъэ къыгъэлъэ­гъуагъ. Японием испортсменэу Кента Тагаки зыIокIэм, текIоны­гъэр зыхьыщтыр къэшIэгъошIу­гъэп. Японием испортсмен дунаим щызэлъашIэ. Бэнэгъу 14 иIагъ, 13-м текIоныгъэр нокауткIэ къыщихьыгъ. Ар къыдалъытэзэ, спортым хэшIыкI фызиIэхэм зэ­IукIэгъур К. Тегаки ыхьы­щтэу бэмэ алъытэщтыгъ.

ЕлъэшIыIэ Бислъан лIыгъэ шъыпкъэ зэнэкъокъум щызэрихьагъ. ЗэIукIэгъур едзыгъуищ мэ­хъу. Такъикъ тфырытфэу гощы­гъэ. ЯтIонэрэ едзыгъор аублагъэу Адыгеим ибатыр текIоныгъэр къыдихыгъ.


Хьатхъохъу Байзэт килограмм 70-м нэс къэзыщэчырэмэ янэкъо­къугъ. Японием испортсмен лъэшэу Шункий Ото IукIагъ. Нарт шъа­ом гъэхъагъэ зэришIыгъэр Японием итренер цIэрыIохэми агъэ­шIэгъуагъ. Зэнэкъокъур заублэм, Хьатхъохъу Байзэт мэ­шIуа­чэм фэдэу алырэгъум псын­кIэу зыщигъазэщтыгъ. ТакъикъитIу нахь мыкIуагъэу текIоныгъэр зэ­IукIэ­гъум къыщыдихыгъ.

Тиспортсменхэр Японием зэ­кIохэм, Урысыемрэ Адыгеимрэ ябыракъхэр зыдаштэгъагъэх. Бы­ракъхэр ашъхьагъ щыIэтыгъэхэу зэнэкъокъум хэлэжьагъэх.

Шъопсэу, нартхэм ялIыкIохэр! Спортышхом лIыгъэу щызешъухьэрэм тегъэгушхо, Адыгэ Респуб­ликэм щытхъоу фаIорэм зеIэты.