Дунэе адыгэ ХэсакIэу «Адыгэ полития» зыфиIорэм игъэпсын джырэкIэ ыуж итых. Ащ фэдэ къэбарыр адыгэ бэдаушэу Америк Штат Зэкъотхэм джырэкIэ щыпсэурэ Къэбард Анзор къыIуагъэу «Кавполит.ком» зыфиIорэ интернет къэбар лъыгъэIэс амалым къытыридзагъ. Ащ адыгэмэ апашъхьэ илъ политикэ, гъэсэныгъэ, фэшъхьаф Iофыгъохэр зэшIуахынхэу ары къызэрэдхэлъытагъэр. Къэблэгъэрэ илъэсибл фэдизым къыкIокI адыгэ нэбгырэ мини I50 фэдиз купым ыугъоиныр ягухэлъэу кIэщакIоу Къэбардым къыхегъэщы. КIэщакIохэр къэралыгъо заулэмэ ащыщ адыгэхэр арых. Ахэр езэгъхэрэп джырэ Дунэе Адыгэ Хасэм иIофшIакIэ.
КупыкIэм пэщакIэ фэмыхъунхэу зэдэгущыIэныгъэу Къэбар Анзор интернет къулыкъоу «Кавполитым» щыриIагъэм къыщиIуагъ ежьри, джыри зы кIэщакIоу Австралием щыщ Джамырзэ Алани. Ахэм адыгабзэ ашIэрэп. Ныдэлъфыбзэм ишIэныгъэ узшIомыкIын шапхъэу купыкIэм ипэщэщтым ыIэщт. КIэщакIомэ къыхагъэщы, джырэкIэ щыIэ адыгэ купхэм адэлэжьэнымкIи зэрэхьазырхэр. ЫкIи купым хэхьашъущтых адыгэу зызлъытэрэу, зилъэпкъ фэлажьэу, шIуагъэ къыфэзыхьы зышIоигъо пэпчъ, къыхагъэщы кIэщакIомэ.
Фитыныгъэ Радиом игущыIэгъугъэ Адыгеим щыIэ Мыекъопэ Адыгэ Хасэм ипащэу Чундышко Заурбий къыхегъэщы лъэпкъ Iофхэр икъоу зезыфэщт адыгэ купыкIэ агъэпсыныр игъоу зэрэщытыр.
Чундышко: Сэ адесэгъаштэ. Ау сыгукIэ здэсIыгъ непэ купыбэ тэхъуми зэгорэм зы тызэрэхъужьын фае купхэмкIэ. Ахэм ямыгъэшIын плъэкIыщтэп, фитыныгъэ яI.
Фитыныгъэ Радиом игущыIэгъугъэ Адыгеим щыщ бэдаушэу Дзэукъожь Заур къыхегъэщы Дунэе Адыгэ Хасэм адыгэ лъэпкъым ишIогъэшIэгъонхэр къыримыгъэкIокIхэу, ащ къыригъэкIокIхэрэр Урысыем ишIогъэшIэгъонхэр арых, еIо ащ. Арышъ, нэмыкI адыгэ куп зэхэпщэн фае, IэкIыбым иунэшъхьаI щыIэу, къыхегъэщы Дзэукъожь Заур.
Дзэукъожь: Зэхэсхыгъэ Анзор Къэбардрэ Джамырзэ Аланрэ аготхэмрэ купыкIэ агъэпсмэ зэрашIоигъор. Ишъыпкъагъэ хэлъэу, адыгэ Iофыр лъагъэкIотэнэу щытынэу щытмэ сэ десэгъаштэ ащ фэдэ куп щыIэнэу. Анахь Iофыгъо шъхьаIыр адыгэ лъэпкъгъэкIодыр адырэ къэралыгъомэ къаштэныр. НэмыкI Iофэу купым зэрифэщтыр сшIэрэп, ау лъэпкъгъэкIодыр къягъэштэгъэным пылъыщтмэ дэгъугъэ.
Краснодар щыIэ Адыгэ Хасэм ипащэу Сохът Аскэр иеплъыкIэкIэ ащы фэдэ хэсакIэ агъэпсын алъэкIыщтэп. Ащ иушъхьагъухэм къатегущыIагъ Фитыныгъэ Радиом зэдэгущыIэныгъэу щыриIагъэм.
Сохът: Дунэе Адыгэ Хасэ зэхэзыщэ зышIоигъохэм амал яIэп ар ашIэнэу. Адыгабзи, адыгэхэри ашIэхэрэп. Мыхэр зэкIэ къэбар лъыгъэIэс амалмэ къырадзэрэ пцIы къэбарэу щыт. Ахэмэ шIэныгъи яIэп ыкIи яIэн ылъэкIыщтэп. Сыда пIомэ цIыфэу егъашIэм адыгэ Iофым хэмытыгъэм ыгу къихьагъэ пае дунэе адыгэ хасэ зэхищэн ылъэкIыщтэп. Непэ дунаим хасэу тетхэр зэкIэ тэшIэ. Ахэр нэрылъэгъу. Ахэмэ зэхамыщэрэ куп хъун ылъэкIыщтэп. Арышъ, пшIошъ хъунэу щытэп ар.
ХъурцэмкIи щыкIэлъэплъэх адыгэ Iофым икъекIокIын. Адыгэ культурэм игупчэу къалэу Тбылыс дэтым щылажьэрэ Габисония Андро иеплъыкIэу къыхегъэщы ащ фэдэ купыкIэм игъэпсын имыщыкIагъэу.
Габисония: Сэ зэрэслъытэрэмкIэ, ищыкIагъэпын фае. Сыда пIомэ адыгэхэм кухэу яIэхэри икъущтых. Сэ зэрэслъытэрэмкIэ, нахь дэгъу хъущт мыхэмэ къагъотмэ амал зэрэугъоинхэмкIэ, фаехэмэ. КупыкIэ икIэрыкIэм сшIэрэп зэкъощэныгъэмкIэ зыгорэ къыдэхъущтми. Мыр икIэрыкIэ куп цIыкIыщтын фае, зиполитик пхырыщынэу фэещтэу. Ащ зэгуищэщтхэпын фае зи, ащы пыщытэу, адырэ купмэ янэкъокъущтын фае. Джы щыIэ адыгэ купхэм шIогъэ ин къахьэу зи ахэслъагъорэп, сыда пIомэ ахэр зэкIэ цIыкIых. ЩыIэх, Iо хэмылъэу, шъхьафэу пэит цIыфхэр. Ахэмэ къызэрагъэуцокIынхи алъэкIыщт, мэхьани яI, шъхьаем Iофым зырагъэгъалIэрэп.
Фитыныгъэ Радиом игущыIэгъугъэ Кавказ IофхэмкIэ хъурцэ кIэлъыплъакIоу Лебонидзэ Соломон къыхегъэщы купыкIэр джырэкIэ щыIэ Дунэе Адыгэ Хасэм зэнэкъокъуныгъэ дэгъу дишIышъунэу щытыщтэу.
Лебонидзе: Сэ сэлъытэ, мыр лъыкIотэныгъэу. ЗекIокIэ тэрэз. Къэбардым сэри сыдэгущыIагъэу щытыгъ мы IофымкIэ. Дезгъаштэщтыгъэ Хъурцэми а купым илIыкIоныгъэ щыIэу щытыгъагъэми. Джырэ Дунэе Адыгэ Хасэмрэ купыкIэмрэ зэпеоныгъэ яIэщтэу сэлъытэ. Ар зыпкъ итыныгъ.
КупыкIэу агъэпсынэу агъэнафэрэр агъэпытэнэу щыт 2016 илъэсым гъатхэм щыIэщт зэхэсыгъом. «Адыгэ полития» зыфиIорэ купым иунэ шъхьаI щыIэщт Лондон.
Фитыныгъэ Радио, Щэрджэс Ларис