Украинэм бырсырхэр къыщызэрежьэ ащ къикIыжьыхи Адыгэ хэкум (Краснодар край, Адыгея, Къэбэртае-Бэлъкъар, Къэрэщай-Черкес, Ставропол край) цIыф мин пчъагъэ къихьагъ. Ахэм ащыщэу цIыф 250 фэдиз Къэрэщай-Черкесым къихьагъ. Къэрэщай-Черкесым ихьыкумэм мыхэм IэпыIэгъу афэхъу. Мыхэм анахьыбэр Урыс лъэпкъым щыщых.
Сирие зао къызэрежьэ Сирием щыщэу Адыгэ нэбг 25 неIэп Кърэщай-Черкес республикэм къихьэн зилъэкIыгъэр. А лъэныкъом хэку-гъэзэжьыным пылъ Адыгэ кIалэмэ къызэраIорэмкIэ Къэрэщай-Черкесым ихьыкумэт Сирием щыщ Адыгэхэр республикэм къимыхьэныхэм пае бюрукратие къиныгъохэр къафешIы.
Къэрэщай-Черкесым ихьыкумэт мыщ фэдэу лъэпкъ зэхэдз зыфишIырэр къызыхэкIырэр, зыкIэ ар Урысием Адыгэхэр хэкум къамыгъэзэжьынэу политикэу иIэр ары, атIуанэрэмкIэ ежь Къэрэщай-Черкесым ихьыкумэтдэдэ Адыгэхэр мы республикэм къимыхьэнхэу политикэу иIэр ары.
ГъэшIэгъоныр мы республикэр лъэпкъитIум зэдряеу ары, Къэрэщайхэмрэ Адыгэхэмрэ ау Адыгэхэу хьыкумэтым хэтхэм заушъэфыгъэу зи къамыIоу щысых. Зыгорэхэм къаIощт Адыгэхэу а республикэм исхэм кIуакIэ яIэп, зэрэмакIэхэм пае, ау, ащ фэдэу зиIохэрэм атыIон тлъэкIыщт, ада илъэс заулэ ипэкIэ Къэрэщай-Черкесым ихьыкумэт ипремер-министр IэнатIэ Адыгэ зытрамыгъауцом, бо а республикэм ис Адыгэхэм бырсыр инхэр ашIын алъэкIыгъагъ. Митингхэр ашIэу, джэпсалъэхэр къатэу, республикэм тыхэкIыщт тыхэхьэщт аIоу, нэмыкI республикэхэм ащыщ Адыгэхэри а бырсырхэм къыхагъэлажьэу, джащ фэдэу зыкъаIэтын алъэкIыгъ премер-министыр IэнатIэ къаратыжьфэ нэс. ЫтIанэ дэхэцIыкIоу тIысыжьыгъэх. Сыда джащ фэдэу Сирие Адыгэхэм апае зи къамыIорэ зи амышIэрэ?!
КъэIогъэн фае, Къэрэщай-Черкес республикэм цIыф мин 477 фэдиз щэпсэу. Къэрэщайхэр мин 195 фэдиз, Адыгэхэр мин 60, Абазэхэр мин 35, Урысхэр мин 150. Политикэ IофымкIэ зэгурыIуагъэхэу хьыкумэт IэнатIэхэр зэфаугощых. Президентыр Къэрэщай лъэпкъым щыщ, премер-министрэр Адыгэ, парламентым итхьэматэ Урыс.
ТIуапсэ Пресс