- Къалэм сыдэсэу сипшъашъэхэм адыгабзэр язгъэшIэныр къысэхьылъэкIыгъэп, - еIо Мыекъуапэ щыпсэурэ Ацумыжъ Аслъан. - Уахътэр псынкIэу макIо. Джы сызыгъэгумэкIырэр сипхъорэлъфхэм адыгабзэкIэ еджакIи, гущыIакIи зэрядгъэшIэщтыр ары. ТищыкIэгъэ тхылъхэр гъотыгъуаех...
Ащ фэдэ лъэIу зиIэу тызыIукIэрэр макIэп. Тучантесхэм тиупчIэхэр агъэшIэгъожьырэп. «ТиIэп» псынкIэу къытаIо. «Тхылъым идунай» зыфиIорэ тучанышхоу Мыекъуапэ дэтым ипащэу Шъхьэлэхъо Хьазрэт тигумэкIхэм защытэгъэгъуазэм, Iофым хэкIыпIэ къыфигъотынэу тигъэгугъагъ. Хьазрэт иIорэ ишIэрэ зэтефэх. Тучаным кIэлэеджакIомэ ящыкIэгъэ тхылъхэр щащэфынхэ алъэкIыщт.
Цуекъо Алый къыдигъэкIыгъэ тхылъэу «Тхыбзэжъыер» узыIэпищэу шъо зэфэшъхьафхэмкIэ гъэкIэрэкIагъэ. КIэлэцIыкIухэм ащ фэдэ тхылъхэр лъэшэу ящыкIагъэх. «Адыгабзэ зэсэгъашIэ» зыфиIоу Къэрэтэбэнэ Асыет ыгъэхьазырыгъэ тхылъыри гъэшIэгъоны. Тамбый Джантыгъэ, къыдигъэкIыгъэ «Тхыбзэри» еджакIохэм ящыкIагъ.
Адыгэ литературэм изэгъэшIэн ехьылIагъэу А. Шъхьэлахъом, Хъ. Хъотым агъэхьазырыгъэми еджакIохэр бэрэ ежагъэх. Унэрэкъохэу Мирэрэ Раерэ «Адыгэ хабз» зыфиIоу къыдагъэкIыгъэр еджапIэхэм ямызакъоу, ныбжь хэкIотагъэ зиIэхэми федэ афэхъущт.
- ЦIыфхэр тхылъхэм къакIэупчIэх, - еIо тучаным ищэкIо ныбжьыкIэу Унэрэкъо Щамсэт. - Тигуапэ мыщ фэдэ литературэ кIэлэеджакIохэм агъотын зэралъэкIыщтыр. Гъэзетеджэхэм ялъэIухэр дгъэцэкIэнхэмкIэ егъэжьэпIэшIу тшIыгъэу тэлъытэ.
Мыекъуапэ иурам шъхьаIэу Краснооктябрьскэм тет тучанэу «Тхылъым идунай» зыфиIорэр ары тыкъызытегущыIэрэр. ЩапIэм узэрэчIэхьагъэм лъыпытэу адыгэ тхылъхэр зэгъэфагъэхэу нэплъэгъум къефэх. Тучантесхэр нэгушIоу щэфакIохэм къапэгъокIых, упчIэхэм яджэуапхэр къаратыжьых.
ТигумэкIхэр
УрысыбзэкIэ къыдагъэкIыгъэ алфавитхэр дахэх, лъэгъупхъэх. Ахэр бзэр зэзыгъэшIэрэ сабыйхэм афэгъэхьыгъэх. Хьарыф пэпчъ ылъапсэ сурэтхэр щытых. Сурэтым ит пкъыгъом ыцIэ къызыпIокIэ, хьарыфым укъеджагъэуи плъытэн олъэкIы.
- Ащ фэдэ алфавитхэр адыгабзэкIи къыдагъэкIыщтхэу тагъэгугъэ, - тизэдэгущыIэгъу лъегъэкIуатэ Унэрэкъо Щамсэт. - Къуаджэхэм адэсхэми ар ящыкIагъэу тэлъытэ.
Сурэтым итыр: Унэрэкъо Щамсэт
Адыгэ Макъ