Сомэ миллиони 150-рэ зыосэ кIэпсэкIэшIэгъэ гъогукIэм икъызэIухын тегъэпсыхьэгъэ Iофтхьабзэхэр бэмышIэу Мыекъопэ районымкIэ станицэу Дахъо дэжь щыкIуагъэх.
Ащ иинвесторыр компаниеу «Мир» зыфиIоу зекIоным ылъэныкъокIэ зипроектхэр республикэм гъэхъагъэ хэлъэу щыпхырызыщырэр ары. Адыгеим и ЛIышъхьэу ТхьакIущынэ Аслъан мы Iофтхьабзэм хэлэжьагъ. Ащ игъусагъэх Адыгэ Республикэм и Премьер-министрэу КъумпIыл Мурат, Адыгэ Республикэм и Апшъэрэ Хьыкум итхьаматэу Трэхъо Аслъан, муниципальнэ образованиеу «Мыекъопэ районым» ипащэу Алексей Петрусенкэр, холдингэу «Мир» зыфиIорэм ипрезидентэу Василий Савранскэр.
ТхьакIущынэ Аслъан компаниеу «Мир» зыфиIорэм илIыкIохэм гъэхъагъэ хэлъэу проектыр зэрагъэцакIэрэм фэшI зэрафэразэр ариIуагъ, джащ фэдэу Мыекъопэ районым ипащэхэмрэ ащ щыпсэухэрэмрэ кIэпсэкIэшIэгъэ гъогукIэр агъэфедэу зэраублагъэмкIэ афэгушIуагъ.
- КIэпсэкIэшIэгъэ гъогур къызэрэзэIуахыгъэр хъугъэ-шIэгъэшхоу щыт, Адыгеим зекIонымкIэ иотраслэ хэхъоныгъэ ышIынымкIэ ащ амалышIухэр къытыщтых. РеспубликэмкIэ ар апэрэ опытэу щыт ыкIи тапэкIэ гъэхъагъэ хэлъэу а Iофыр зэрэлъыдгъэкIотэщтым тицыхьэ телъ, - къыIуагъ ТхьакIущынэ Аслъан.
Республикэм и ЛIышъхьэ кIэпсэкIэшIэгъэ гъогур апэ зыушэтыгъэхэм ащыщ. Дахъо игъэхъунэрэ къушъхьэтхэу Унэ-Козрэ ащ зэрипхыгъэх. Метрэ 1250-рэ зикIыхьэгъэ гъогур нэбгыри 160-рэ а зы уахътэм зэдытехьанхэм фытегъэпсыхьагъ. Къушъхьэтхэу Унэ-Коз щыIэ Решеткинэ гъэхъунэм лыжэкIэ къызыщечъэхыщтхэ чIыпIэхэр, зекIонымкIэ маршрутыбэхэр тапэкIэ щагъэпсынхэу рахъухьэ.
Адыгэ Макъ
