ЦIыфхэм япсауныгъэ зыщагъэпытэщт физкультурэ комплексэу джэгупIэ зал, зыщесыщтхэ бассейн, спорт псэолъэ зэфэшъхьафхэр ыкIи стадионэу пстэумкIи гектари 9,5-рэ фэдиз зыубытырэр зыхэтыщтхэм ишIын къалэу Мыекъуапэ 2010-рэ илъэсым щаублэгъагъ, ау аужырэ илъэситIум федеральнэ мылъкур зэрэщымыIэм къыхэкIэу къызэтыраIэжагъ.
2014-рэ илъэсым жъоныгъуакIэм Адыгэ Республикэм и ЛIышъхьэу ТхьакIущынэ Аслъанрэ Урысыем спортымкIэ иминистрэу Виталий Муткорэ зэIукIэгъу зэдыряIагъ, псэуалъэм ишIын ухыгъэным пае мылъку къызэрафыхагъэкIыщтым ехьылIэгъэ зэзэгъыныгъи зэдашIыгъагъ. Мы лъэхъаным ехъулIэу ахъщэр къыхагъэкIыгъах, зэнэкъокъур ылъапсэу IофшIэнхэр зэшIозыхыщтыри агъэнэфагъ - пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Марк-Сервис» зыфиIорэр.
Тыгъуасэ республикэм и ЛIышъхьэ псэолъэшIыпIэм щыIагъ ыкIи IофшIэнхэр зэшIозыхыщт хъызмэтшIапIэм ипащэу Цуекъо Муратрэ Адыгэ Республикэм физическэ культурэмкIэ ыкIи спортымкIэ икомитет итхьаматэу Хьасанэкъо Муратрэ Iофэу къапыщылъымкIэ адэгущыIагъ.
Мы илъэсым а комплексым иапэрэ чэзыу иухын сомэ миллиони 160,5-рэ пэIуагъэхьащт, ащ щыщэу сомэ миллион 61,5-р республикэм ибюджет къыхагъэкIыщт. Илъэсым ыкIэм ехъулIэу псэуалъэр ухыгъэн фае.
- ЦIыфхэм япсауныгъэ зыщагъэпытэщт физкультурэ комплексэу джыдэдэм тшIырэм пшъэрылъэу зэшIуихыщтхэмкIэ бэмэ ашъхьадэкIынэу щыт. Спортзалыбэ ащ хэтыщт, щесынхэу бассейнитIу, джащ фэдэу нэмыкI псэуалъэхэр. Ащ нэмыкIэу министрэу Виталий Мутко тызэрезэгъыгъэм тетэу мы чIыпIэм мылылъэ унэ щытшIыщт. Джащ фэдэу мы мэфэ благъэхэм къалэу Мыекъуапэ щэрыоным фытегъэпсыхьэгъэ унэм ишIын щырагъэжьэщт, ахъщэри къатIупщыгъах, - къыIуагъ ТхьакIущынэ Аслъан.
Комплексым ылъапсэ загъэтIылъыгъэм къыщегъэжьагъэу пэIухьагъэр сомэ миллион 210-м ехъу, ащ щыщэу сомэ миллиони 128-р республикэ бюджетым къыхэкIыгъ.
ЦIыфхэм япсауныгъэ зыщагъэпытэщт физкультурэ комплексэу ашIырэм къызекIыжь нэуж Адыгеим и ЛIышъхьэ 2013-рэ илъэсым бжыхьэм атIупщыгъэ шъхьэихыгъэ велотрекым щыIагъ. ТхьакIущынэ Аслъан Урысые Федерацием кушъхьэфэчъэ спортымкIэ ифедерацие ивице-президентэу Анатолий Лелюк зыIокIэм Урысыем ифедеральнэ кушъхьэфэчъэ спорт икъэкIуапIэхэм къахагъэкIынышъ, а псэуалъэм ышъхьэ тыралъхьаным иамал зэрэщыIэщтыр къыхигъэщыгъ, велотрекым игъэфедэнкIэ ащ ишIуагъэ къэкIощт.
Адыгэ Макъ
