ЦIыфышъхьэ пчъагъэм хэгъэхъогъэнымкIэ Европэ парламент форумымрэ Нэмыц фондымрэ зэрэрагъэблэгъагъэм тетэу Къэралыгъо Думэм псауныгъэм икъэухъумэнкIэ и Комитет хэтэу Натхъо Разыет бзылъфыгъэхэмрэ кIэлэцIыкIухэмрэ яфитыныгъэхэм якъэухъумэн фэгъэхьыгъэ дунэе конференцием хэлэжьагъ. Дунаим икъэралыгъо 50-м ехъумэ яхэбзэгъэуцу 88-рэ зыхэлэжьэгъэ конференциер Федеративнэ Республикэу Германием икъэлэ шъхьаIэу Берлин щыкIуагъ.
Дунэе конференцием хэлэжьагъэхэм апашъхьэ шIуфэс псалъэ къыщишIыгъ Федеративнэ Республикэу Германием и Бундестаг ивице-президентэу Клаудиа Рот. Ар Iофтхьабзэм хэлажьэхэрэм къяджагъ бзылъфыгъэхэмрэ кIэлэцIыкIухэмрэ яфитыныгъэхэм якъэухъумэнкIэ зэрэдунаеу къыщыуцугъэ Iофыгъохэм язэшIохыкIэ амалхэр къагъотынэу.
- Псауныгъэм икъэухъумэн епхыгъэ Iофыгъохэм сызэрапылъым, депутатэу сызэрэщытым ялъытыгъэу европэ хэгъэгухэм сызырагъэблагъэм, ядунэе конференцие сыхэлэжьэныр сипшъэрылъэу слъытагъэ. СишIошIыкIэ, бзылъфыгъэхэмрэ кIэлэцIыкIухэмрэ яфитыныгъэхэм якъэухъумэн, сабыйхэр нахьыбэу къэгъэхъугъэнхэм япхыгъэ Iофыгъохэр зэшIотхынхэ зытлъэкIыщтыр IэкIыб къэралыгъохэм яопыти, тихэгъэгу хэбзэ гъэнэфагъэу илъхэри къыдэтлъытэхэмэ ары, - хигъэунэфыкIыгъ Натхъо Разыет.
2005-рэ илъэсым къыщегъэжьагъэу хэбзэгъэуцухэм ядунэе конференциехэу цIыфышъхьэ пчъагъэм зыкъегъэIэтыгъэным фэгъэхьыгъэхэр зэхащэнхэр хабзэ хъугъэ. Мы IофтхьабзэмкIэ а хабзэр лъагъэкIотагъ.
Конференцием илъэхъан Натхъо Разыетрэ нэмыкI хэгъэгухэм ялIыкIохэмрэ Бундестагым рагъэблагъэхи, германскэ хэбзэгъэуцу къулыкъум иIофшIэнкIэ хабзэу щыIэхэр игъэкIотыгъэу къафызэхафыгъэх.
Дунэе конференцием ипленарнэ зэхэсыгъуи 9-мэ якIэуххэр къыдалъытэхэзэ бзылъфыгъэхэмрэ кIэлэцIыкIухэмрэ яфитыныгъэхэм якъэухъумэнкIэ Iофхэм язытет нахьышIу шIыгъэным тегъэпсыхьэгъэ Iофтхьабзэхэр къыхахынхэ алъэкIыгъ. Ахэр профессорэу Ларс-Хендрик Реллер IэкIагъэхьанхэшъ, къэралыгъуиблымэ ясаммит икIэух коммюнике хигъэхьащтых.
- Урысыем илIыкIохэр дунэе конференцием дэгъоу хэлэжьагъэхэу сэлъытэ. Ащ джыри зэ къыгъэлъэгъуагъ Урысыер нэмыкI къэралыгъохэм акIэрачынэу зэрэфэягъэхэм зи къызэримыкIыгъэр, санкциехэм пкIэ зэрямыIэр. Агу рехьыми, ремыхьыми Урысыем иеплъыкIэхэр къыдамылъытэхэу дунэе сообществэмкIэ мэхьанэшхо зиIэ документ гори аштэн алъэкIыщтэп, - зэфэхьысыжь къышIыгъ Натхъо Разыет.
Къандор Анзор
Урысые Федерацием и Федеральнэ ЗэIукIэ и Къэралыгъо Думэ идепутат иIэпыIэгъу.
Адыгэ Макъ
Къэралыгъо Думэм хэт депутатэу Натхъо Разыет урысбзэкIэ тхыгъэ сайтэу иIэр мары: natkho.ru
Сурэтым итыр: Натхъо Разыет (жъабгъомкIэ)