КIымафэм Адыгеим икъушъхьэхэм защызыгъэпсэфырэ цIыфхэм япчъагъэ илъэс къэс хэхъо. Анахьэу илъэсыкIэр къыщырагъэхьаныр якIас. Тикъушъхьэхэр дэгъоу зышIэхэрэр илъэсыкIэр къэмысызэ хьакIэщхэм номерхэр ащыуубытымэ зэрэнахьышIум щыгъуазэх, сыда пIомэ мэфэ заулэ нахь къэмынагъэу закъыфэогъазэкIэ, укъызщыуцун чIыпIэ умыгъотыжьыным ищынагъо щыI. Мары джыри хьакIэщхэм чIыпIэ нэкIхэр яIэжьхэп, ахэр зэкIэ чъэпыогъу ыкIи шэкIогъу мазэхэм ащэфыгъахэх.
- ИлъэсыкIэ мэфэкIхэм Адыгеим икъушъхьэхэм защагъэпсэфынэу ыкIи илъэсыкIэр къыщарагъэхьанэу нэбгырэ мин пчъагъэ къэкIонэу тыщэгугъы. Ахэм апае мэфэкI концертхэр тэгъэхьазырых, чэфэу ыкIи гъэшIэгъонэу пчыхьэхэр зэрагъэкIощтхэм тыпылъыщт, - къыIуагъ Адыгэ Республикэм зекIонымкIэ ыкIи зыгъэпсэфыпIэхэмкIэ и Комитет ипащэу Къэлэшъэо Инвер.
Ос зэрэтелъым емылъытыгъэу, зыгъэпсэфакIохэр экстрим-паркэу «Мышъэкъо», кIэпсэ гъогухэмкIэ къызщыпкIухьан плъэкIыщт паркэу «Тетис» анэсых. Джащ фэдэу зыгъэпсэфыпIэ базэхэу бассейн зиIэхэм чIы чIэгъым къычIэчъырэ псы фабэу арытхэм ахэхьэх.
Къушъхьэм ущыIэу, кIымэфэжь къабзэр къапщэу, ос кIыIум лычэрэгъу щыбгъажъэзэ къибгъэхьэрэ илъэсыкIэр бэрэ пщымыгъупшэжьэу угу илъыщт. Къушъхьэхэр къэджэх, цIыфхэм къяжэх.