И гумрэ и псэмрэ къыдыхьэ Iуэху зыщIэр епсыхь. Ар нэрылъагъу къыпщызыщI цIыхухэм ящыщщ «Кабардинка» академическэ къэфакIуэ гупым илъэс куэд хъуауэ хэт Сокъур Мадинэ.
Абы зэрыжиIэмкIэ, къафэм и дуней телъыджэм къыхэхута нэужь гъащIэм зэреплъымрэ и мурадхэмрэ зыкъомкIэ захъуэжащ. ГъэщIэгъуэнракъэ, Мадинэ къафэм хуиIэ лъагъуныгъэр хуэм-хуэмурэ зэтеувакъым, атIэ зэуэ дихьэха хъуащ.
— СыщыцIыкIум сыкъафэу щытакъым, уеблэмэ сехъуапсэртэкъым сыкъэфэнуи. Балигъ сыхъуа нэужьщ сыщыдихьэхар, илъэс 17-м ситу. Си ныбжьэгъу хъыджэбзым «къафэм дыхэгъыхьэ» жиIэри, Атэбий Игорь зи унафэщI «Кавказ» къэфакIуэ гупыр щылажьэм декIуэлIауэ арат. 1995 гъэм а гупым сыхагъэхьащ. ИужькIэ, 1999 гъэм, «Кабардинка»-м сыкъыщыфэу щIэздзащ. Ди унагъуэм къэфакIуи, уэрэджыIакIуи, уеблэмэ щэнхабзэм епха IэщIагъэ зиIи искъым. Си адэ-анэм яфIэфIтэкъым сыкъэфэну. Ауэ сэ къафэм сыдихьэхыщати, схухыфIэдзэжакъым. Сэ къафэм насыпыфIэ сещI,— жеIэ Мадинэ.
Мадинэ и лэжьыгъэр фIыуэ щIилъагъу щхьэусыгъуэхэм ящыщщ ансамблым хэтхэр зэрызэхуэгуапэр. ИкIи зэрыжиIэмкIэ, ар нэхъыбэу зи фIыщIэр ансамблым и унафэщI Атэбий Игорщ. Гупыр куэдрэ гъуэгу зэдытехьащ, зэсащ, зы унагъуэ дахэ хуэдэу зэхэтщ.
— «Кабардинка»-м сыхэту япэ дыдэу сыздэкIуар Сингапурщ. Абы къыкIэлъыкIуащ Германиер, Америкэр, Алжири дыщыIащ. Дигу хэхъуэу дыхэтащ 2014 гъэм Сочэ щекIуэкIа щIымахуэ Олимп джэгухэм.
Адыгэ къафэм и хабзэхэр апхуэдизкIэ зэгъэкIуащи, цIыхум и Iэпкълъэпкъым и закъуэкъым ипсыхьыр, атIэ и гупсыси, и зыIыгъыкIи, уеблэмэ и псэлъэкIэми зрегъэхъуэжыф.
— Укъыщыфэм деж уи псэр хьэуа къабзэм щыхуарзэ хуэдэщ, дамэ къыптокIэ. Сытым дежи уи щхьэр лъагэу уегъэIыгъ къафэм. Утыкум ущитым, къалэ уэрамхэм ущрикIуэм деж адрей цIыхухэм зыгуэркIэ уакъыхэщхьэхукIыу къыпщохъу. Къафэм игъэзащIэу къыщIэкIынущ уигъэгушхуэн къалэнри,— жеIэ ди псэлъэгъум.
Къафэм апхуэдизу зи гур ета бзылъхугъэм и жагъуэ мэхъу абы и хабзэр ямыгъэзащIэмэ.
— Иджыпсту куэдрэ урохьэлIэ адыгэ къафэм къе мызэгъыу зыщащI. Ар емыкIущ. Ауэ нэгъуэщI зы лъэныкъуи хэлъщ мы Iуэхум: гуфIэгъуэхэм къафэр зи IэщIагъэхэр ирагъэблагъэ хъуащи, ахэр утыку къихьа нэужь, адрейхэр къэфэну тегушхуэжыркъым. Ар сфIэтэмэмкъым, — жеIэ.
Адыгэ къафэм и пкъыгъуэ нэхъыщхьэщ утыку укъызэрихьэ фащэр. Къафэм и хьэлымрэ фащэм и теплъэмрэ зэрызэхуэкIуэм куэд елъытащ. Сокъур Мадинэ зэрыжиIэмкIэ, игу ирохь ХьэцIыкIу Мадинэ, Хъурей Жаннэ сымэ ансамблым хуад фащэхэр.
adygvoice.ru
