ШIукIэ тыгу къинэжьыщтмэ ащыщ кушъхьэфэчъэ спортымкIэ Дунэе зэIукIэгъоу «Кавказым итур» зыфиIоу чъэпыогъум и 2 - 6-м тиреспубликэ игъогухэм ащыкIуагъэр. Австрием, Украинэм, Беларусым, Урысыем яспортсмен 90-рэ зэнэкъокъухэм ахэлэжьагъэх, километрэ 570-рэ къакIугъ.
Адыгэ Республикэм кушъхьэфэчъэ спортымкIэ икIэлэцIыкIу-ныбжьыкIэ спорт еджапIэ щагъэсагъэу, «ИТЕРА-Катюшэм» хэтэу СтIашъу Мамыр едзыгъуи 5 зэIукIэгъухэм ащыщэу 2-м текIоныгъэр къащыдихыгъ. Километри 171,4-рэ хъурэ гъогоу Мыекъуапэ - Улап - Мыекъуапэ апэрэ чIыпIэр къыщихьыгъ.
ЯтIонэрэ зэIукIэгъоу Мыекъуапэ - Гавердовскэр - Мыекъуапэ гъэшIэгъонэу кIуагъэ. Километри 108-рэ хъурэ гъогур къакIузэ, апэ ишъыщтыр язэрэмыгъашIэу спортсменхэм яухьазырыныгъэ къагъэлъэгъуагъ. Мыекъуапэ иурамэу А. Пушкиным ыцIэ зыхьырэм кIэух зэнэкъокъур щыкIуагъ. НэгъэупIэпIэгъухэм къакIоцI апэ итыр зэблэхъугъэ хъущтыгъэ. Урамыр зэрэшъуамбгъом фэшI спортсменыбэ зэготэу аужырэ метрэхэр къакIущтыгъ. Адыгэ кIалэу СтIашъу Мамыр апэрэхэм ахэтлъагъощтыгъ, ау текIоныгъэр зыхьыщтыр къэпшIэнэу щытыгъэп.
Спортыр зикIасэхэу зэнэкъокъум лъыплъэхэрэр бэ хъущтыгъэх. СтIашъу Мамыр фэгумэкIыхэрэр мэкъэ IэтыгъэкIэ еджэх: «Мамыр, Мамыр, уапэ егъэхъу! Мамыр...»
Купышхо хъухэу спортсменхэр зэнэкъокъух. Метри 2 - 3 къафэнагъэу СтIашъу Мамыр кушъхьэфачъэм ыIэхэр къытыриIэтыкIыхи, нэгушIоу гъунэпкъэ плъыжьыр къызэринэкIыгъ. Янэ-ятэхэу Жаннэрэ Басамрэ, ышнахьыкIэу Насып, ныбджэгъухэр, спортым пыщагъэхэр Мамыр фэгушIох. Николай Морозовыр джырэ уахътэ М. СтIашъум итренер. Спортым щызэлъашIэрэ журналистэу Андрей Кондрашовыр ащ къыгот. НэбгыритIури Iэгу теох, М. СтIашъум игушIуагъо дагощы.
- Мамыр цIыфышIу, гуетыныгъэ хэлъ, Адыгеим щытхъур къыфихьы зэрэшIоигъор къыхэщы, - къытиIуагъ Андрей Кондрашовым.
- Тхьаегъэпсэух къысфэгумэкIыхэрэр. Адыгэ Республикэм имэфэкI ехъулIэу зэнэкъокъум текIоныгъэр къызэрэщыдэсхыгъэр сэркIи гушIуагъо, - игупшысэхэм тащегъэгъуазэ СтIашъу Мамыр. - Тикомандэ хэтхэу IэпыIэгъу къысфэхъугъэхэм лъэшэу сафэраз.
- Узэкъотмэ - улъэш, - зэдэгущыIэгъур лъегъэкIуатэ Адыгэ Республикэм кушъхьэфэчъэ спортымкIэ икIэлэцIыкIу-ныбжьыкIэ спорт еджапIэ ипащэу, зэнэкъокъоу «Кавказым итур» идиректорэу Анатолий Лелюк. - Мыекъуапэ иадминистрацие, хэгъэгу кIоцI IофхэмкIэ Министерствэм икъулыкъушIэхэм, зэхэщэн IофыгъохэмкIэ зишIуагъэ къытэзыгъэкIыгъэхэм гъэзетымкIи «тхьашъуегъэпсэу» ясIожьы сшIоигъу.
«Кавказым итур» Москва хэкум испортсменэу Сергей Фирсановым апэрэ чIыпIэр къыщыдихыгъ. Спортсмен анахь чанэу къыхахыгъэр СтIашъу Мамыр. Къушъхьэ гъогухэм «Русвелэм» хэтэу Игорь Боевым текIоныгъэр къащихьыгъ.
Дунэе комиссарэу зэнэкъокъум иIагъэу Филл Полат Англием къикIыгъ. Ащ зэрэхигъэунэфыкIыгъэу, спорт зэIукIэгъухэр Адыгеим дэгъоу щыкIуагъэх. Ти ЛIышъхьэу ТхьакIущынэ Аслъан, республикэм спортымкIэ ипащэхэм афэраз.
ЕМТIЫЛЪ Нурбый
Адыгэ Макъ
