АР-м и ЛIышъхьэу ТхьакIущынэ Аслъан Тыркуем къикIыгъэ хьакIэу, Стамбул и Гупчэ район имуфтиеу Айдин Игман ыкIи предпринимателэу Аднан Дюзгюн тыгъуасэ ригъэблэгъагъэх. ЗэIукIэгъум хэлэжьагъэх АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр, Адыгеим ыкIи Пшызэ шъолъыр ащыпсэурэ быслъымэнхэм ямуфтиеу Къэрдэнэ Аскэрбый ыкIи къуаджэу Мэфэхьаблэ иадминистрацие ипащэу Хьасани Мухьамэд.
- Тигуапэ хэкужъым шъукъызэреблэгъагъэр, - къыIуагъ АР-м и ЛIышъхьэ хьакIэхэм зафигъазэзэ. - Нахьыбэу тызэхэхьэн, тфэлъэкIыщтымкIэ тызэдеIэн фае. Тилъэпкъэгъоу IэкIыбым къикIэу тэ къытэуалIэхэрэм янахьыбэр предпринимателых, динлэжь къызэрэкIуагъэр апэрэ. ТиныбжьыкIэхэу диным пылъхэр гъогу пхэндж темыхьанхэмкIэ, диныр къызфигъэфедэзэ бзэджэшIагъэ зезыхьэхэрэм дамыхьыхынхэмкIэ ащ шIуагъэ къытынэу тыщэгугъы.
Предпринимателэу къакIохэрэм хэкужъым Iоф щашIэнэу къиуцохэмэ, ежьхэм алъэныкъокIэ къатефэрэр афашIэным, ящыкIэгъэ IэпыIэгъур аратыным зэрэфэхьазырхэми ЛIышъхьэм къыкIигъэтхъыгъ, ащ фэдэу хъызмэтшIапIэ къызэIузыхыгъэу зыгъэлажьэхэрэр щысэу къыхьыгъэх.
Стамбул къикIыгъэ муфтиим гуфэбэныгъэшхо хэлъэу хэкужъым къызэрэщапэгъокIыгъэхэр, республикэм ипащэ уахътэ къыхигъэкIи зэрэригъэблэгъагъэхэр гуапэ зэращыхъугъэр къыхигъэщыгъ, «тхьашъуегъэпсэу» къыриIуагъ. Айдин Игман тилъэпкъэгъоу Тыркуем щыпсэухэрэм ащыщ, джырэблагъэ къэлэ шъхьаIэм и Гупчэ район имуфтиеу хадзыгъ. Адыгеим ыкIи Пшызэ шъолъыр ащыпсэурэ быслъымэнхэм ямуфтиеу Къэрдэнэ Аскэрбый къызэриIуагъэмкIэ, ащи, нэмыкI тилъэпкъэгъоу Тыркуем исхэм ащыщыбэхэми диным епхыгъэ мэфэкI Iофтхьабзэхэм язэшIохынкIэ мылъку IэпыIэгъу къараты, ныбжьыкIэхэм яегъэджэнкIи къадеIэнхэу къагъэгугъагъэх.
Адыгэ Макъ
