18 February 2016

КъумпIыл Мурат псыхъоу Пщыщэ телъ лъэмыджыр зэрагъэцэкIэжьырэм лъыплъагъ


Адыгэ Республикэм и Премьер-министрэу КъумпIыл Мурат автомобиль гъогоу «Инэм — Бжъэдыгъухьабл» зыфиIорэм щыщхэу, къуаджэу Гъобэкъуае дэжь речъэкIырэ псыхъоу Пщыщэ телъ лъэмыджыр зэрагъэцэкIэжьырэм епхыгъэ Iофыгъохэр зэрэкIохэрэр зэригъэшIэнхэм фэшI мы мафэхэм ащ щыIагъ. 

Непэрэ мафэм ехъулIэу псэ­олъэшIхэм япшъэрылъхэр зэра­гъэцакIэхэрэм, къоджэдэсхэм нэмыкI гумэкIыгъоу яIэхэм за­щигъэгъозагъ. Правительствэм и Тхьаматэ игъусагъэх АР-м псэолъэшIынымкIэ, транспор­тымкIэ, псэупIэ-коммунальнэ ыкIи гъогу хъызмэтхэмкIэ и Министерствэ ипащэу Валерий Картамышевыр, муниципальнэ образованиеу «Теуцожь районым» иадминистрацие ипащэу Хьачмамыкъо Азэмат, нэмыкI­хэри. 

Лъэмыджым изы лъэныкъо 2004-рэ илъэсым зэтырагъэпсыхьэгъагъ, джы адрэм, Мые­къуапэ уикIэу Краснодар укIо зыхъукIэ зэрыкIохэрэм, гъэцэ­кIэ­жьынхэр рашIылIэх. Мы IофшIэнхэм адакIоу, Гъобэкъуае щыпсэурэ цIыфхэу АР-м и Премьер-министрэ къыпэгъо­кIыгъэхэм ягумэкIыгъо шъхьаIэ къагъэнэфагъ — ыпэкIэ Пщыщэ ипсырычъэпIэжъыгъэу зикIы­хьагъэ метрэ 1700-рэ фэдиз хъурэм изытет дэй дэд, тыдэ­кIи зэхэкIыхьагъ, мыщ псыр зэрэрымычъэжьырэм къыхэкIэу, орыжъылъэ, хьэцIэ-пIэцIалъэ хъугъэ. Блэхэр къоджэдэсхэм яунэхэм арыпшыхьэхэу пчъа­гъэрэ къыхэкIыгъ. А Iофыгъор зэшIохыгъэным, гумэ­кIыгъор дэгъэзыжьыгъэным зэ­рэщы­гугъыхэрэр къэзэрэугъо­игъэхэм къаIуагъ. 


— Псыхъоу Псэкъупсэ телъ лъэмыджыр дгъэцэкIэжьы зэ­хъум, мыщ фэдэ псэуалъэу Пщыщэ телъми тызэрэнэсы­щтымкIэ цIыфхэр дгъэгугъэгъа­гъэх. ТIуагъэм темыпцIыжьэу, псэолъэшI IофшIэнхэр 2015-рэ илъэсым ыкIэхэм адэжь едгъэ­жьагъэх, гухэлъэу щыIэм ди­штэу проектыр зэшIотэхы. Илъэсэу тызхэтым икIэухым лъэмыджыр ттынэу тэгъэнафэ. Ащ имызакъоу, екIолIапIэхэр зэтедгъэпсыхьащтых, къэзыгъэ­нэфыщт пкъыгъохэр атедгъэуцощтых, аужырэ шапхъэхэм адиштэу лъэмыджыр дгъэпсыщт, — къыIуагъ КъумпIыл Мурат.

Пщыщэ ыпэкIэ псырычъэ­пIэжъэу иIагъэм ылъэныкъокIэ гумэкIыгъохэр зэрэщыIэхэм зэращыгъуазэр республикэм и Премьер-министрэ къыхигъэщыгъ. Амалэу щыIэмкIэ къо­джэдэсхэм IэпыIэгъу зэрафэ­хъущтхэр, хэкIыпIэ горэм зэреусэщтхэр цIыфхэм къариIуагъ. Мы чIыпIэ дэдэм ащ фэгъэзэгъэ ведомствэхэм япащэхэм пшъэрылъ гъэнэфагъэхэр ащы­фишIыгъэх. 

Псэуалъэу зэтырагъэпсыхьа­жьырэм ылъэныкъокIэ хэукъо­ныгъэхэр е гъэтэрэзыжьынхэр щымыIэнхэм фэшI псэолъэшI­хэм, ащкIэ пшъэдэкIыжь зыхьырэ организациехэм яIо зэ­хэлъэу Iоф зэдашIэным мэхьанэшхо иIэу КъумпIыл Мурат ылъытагъ. Ар гъэцэкIагъэ зэрэхъурэм ежь ышъхьэкIэ лъыплъэщт. 

«Адыгеяавтодорым» испециалистхэм къызэраIуагъэмкIэ, лъэмыджым изы лъэныкъо гъэ­цэкIэжьынхэр щыкIуагъэх, Iоф зыдашIэрэр мыдрэ бгъоу къэнагъэм изэтегъэпсыхьан ары. Псэуалъэр гъучIым хэшIыкIы­гъэщт, ыпэкIэ метрэ 93-рэ икIыхьагъэу щытыгъэмэ, джы ар метри 114,3-м кIэхьащт. Непэ ехъулIэу лъэмыджым те­лъыгъэ пкъыгъо шъхьаIэхэр зэхахыгъэх, гъучIбетон Iоф­шIэнхэр рагъэжьагъэх. Джащ фэдэу пхъэжъхэр, хэкIыр, чъыг къутамэхэр псэолъэ чIэгъым щызэрэмыугъоинхэм фэIоры­шIэщт екIолIэкIэ гъэнэфагъэ проектым къыщыдалъытагъ. 

— Тигъогухэм ащызекIорэ транспортым япчъагъэ илъэс къэс хэхъо, арышъ, мыщ фэдэ хьылъэшхо зыщэчын зылъэ­кIыщт лъэмыджхэм яшIын, язэтегъэпсыхьан мэхьанэшхо иIэ мэхъу. ЫпэкIэ къызэрэ­щысIуагъэу, псэолъэшI Iоф­шIэнхэр планым диштэу зэхэтэщэх, ащ пэIухьэрэ ахъщэр игъом къытIэкIахьэ, зи­щыкIагъэм пэIутэгъахьэ. Илъэ­сэу тызхэтым ишэкIогъу-ты­гъэгъэзэ мазэхэм яхъулIэу аужырэ шапхъэхэм адиштэрэ лъэмыдж Пщыщэ телъыщт, — къыIуагъ КъумпIыл Му­рат. 

Пащэхэм къызэраIуагъэмкIэ, лъэмыджым игъэцэкIэжьын зэ­кIэмкIи сомэ миллион 335-рэ фэдиз пэIуагъэхьащт. 

ТХЬАРКЪОХЪО Адам 

adygvoice.ru

No comments:

Post a Comment

Адыгэ Хэку
Дунае
Кавказ Урысие
Диаспорэ
Тхыгъэхэр
Хэкугъэзэжьын
Адыгэ УпчIэ
Археологиер Экологиер
Спортыр
Туризм