11 May 2016

Адыгэ Iофым пылъ Хъуадэ Аднан ыуж икIынхэу къыфэджэх


«Адыгэ хэкупсэхэр» зыфиIорэ дунэе купэу зиунэ шъхьаI тырку къалэу Истамбыл дэтым фэгъэзэныгъэ мы мафэхэм къышIыгъ. 

ЦIыф фитыныгъэхэр къэзыухъумэрэ хасэхэм «Адыгэ хэкупсэхэр» къафэджагъэх Хъуадэ Аднан ифитыныгъэхэр аухъумэнхэу, иIоф пылъынхэу. 

Джэпсалъэм къыщыIуагъ Хъуадэ Аднан ухъумэкIо Iахьхэр ыуж хэбзэнчъэу зэритхэр ащ адыгэхэм яфитыныгъэ Iофхэм зэрадэлажьэрэм пае. 

Бэдаушыбэмэ зэралъытэрэмкIэ, ащ фэдэ уж итыныгъэм ылъапсэх гущыIэм пае, къэралыгъо зэфэшъхьафхэм – Украиным, Эстонием, Румынием, Польшым, Литвам, Молдовым, Финляндием адыгэ лъэпкъгъэкIодыр къаштэнымкIэ афарагъэхьыгъэ фэгъэзэныгъэхэм зэракIэтхэжьыгъэр, зэкъо къыдэкI зэришIырэм пай, нэмыкIхэри. Джэпсалъэм къызэкIэлъыкIоу къыщатхы илъэм 25 къехъугъэу Адыгеим щыпсэурэ Хъуадэ Аднан лажьэ имыIэу заулэрэ зэраубытыгъагъэр, хьапсэм зэрэчIагъэтIысхьэгъагъэр. 

Фитыныгъэ радиом игущыIэгъугъэ хъытыу нэкIубгъоу «ТIуапсэ –пресс» зыцIэм ипащэу Бгъанэ Али къыхегъэщы Хъуадэ Аднан иубытыныгъэ ылъапсэр ар адыгэ Iофым зэрэпылъыр ары. 

Бгъанэ: Хъуадэ Аднан хьапсэ мэфэ I5 Мыекъопэ хьыкумым тырилъхьагъ. Ау мы Iофым тэ тызэреплърэмкIэ, Аднан адыгэ Iофым зэрэпылъым пае, лъэпкъгъэкIоIдэу адыгэмэ къарашIагъэм иIоф зэрэдэлажьэрэм къыхэкIэу хьыкумэт къулыкъухэр ыуж къихьагъэхэу къин рагъэлъэгъу. 
Лъэубэкъу ыдзын фитэп, ыужы итых. Мафэ къэс къеплъакIох.

«Адыгэ хэкупсэхэр» зыфиIорэ адыгэ купым хэтэу Шъхьэлахъо Рагиб «Натпресс» къэбар къулыкъум къызэрэриIуагъэмкIэ, адыгэхэу IэкIыбым щыIэхэр Хъуадэ Аднан иIоф кIэлъэпалъэ зэпытых ыкIи ащ къызэрэдэзекIохэрэм дырагъаштэрэп. 

Шъхьалахъо Рагиб къызэриIуагъэмкIэ, шъыгъо-шIэжь мафэм, жъоныгъуакIэм и2I Истамбыл дэт Урысыем иунэ ыпашъхьэ зэхахьэу щашIыщтым изыджэпсалъэмэ ащыщыт Хъуадэ Аднан ифитыныгъэхэр амыукъоныр, ыуж икIынхэр. 

«Адыгэ хэкупсэхэр» зыфиIорэ дунэе купым инджылызыбзэкIэ джэпсалъэу хъытыум къыригъэхьагъэм ыкIэм къыщеIо цIыф фитыныгъэ ухъумэным тегъэпсыхьэгъэ купхэм Хъуадэ Аднан иIоф анаIэ тырадзэнэу, иIоф хэплъэнхэу. 

Джыри фэгъэзэныгъэм пышIагъэх къэтынхэу Урыс-Кавказ заом игъом пачъыхьагъум адыгэмэ лъэпкъгъэкIодэу къаришIылIагъэм фэгъэхьыгъэхэр. 

Фитыныгъэ радио, Щэржэс Ларис

tuapsepress.com

No comments:

Post a Comment

Адыгэ Хэку
Дунае
Кавказ Урысие
Диаспорэ
Тхыгъэхэр
Хэкугъэзэжьын
Адыгэ УпчIэ
Археологиер Экологиер
Спортыр
Туризм