Непэ нэс Адыгэхэм Дунае Адыгэ Хасэ зэрамыIэр емыкIоу плъытэу хъущтэп, сыды пIомэ, шъхьэусыгъэу ащ фэхъугъэр макIэп, ау ахэм анахь шъхьэIэу къыхэдгъэщын тлъэкIыщт Адыгэхэр зыщыпсэурэ хэгъэгухэр дектатор шIыкIэм тетэу зэрэщытгъэхэр.
Адыгэ хэкум уеплъымэ, Урыс-Адыгэ заом нэужьы, 1864 илъэсым щычIэдзагъэу Адыгэхэр шъхьэфитыжььгъэхэп ыкIи Урыс хэгъэгур дектатор шIыкIэм тетэу 1990 нэс кIуагъэ. Мы аужьырэ илъэс 20 а хэгъэгум зэхъокIынгъэхэр фэхъоу ыублагъ, демократием нахь факIоу ыублагъ. Шъыпкъэ, джыри ар дэгъу пIон плъэкIыщтэп ау нахьышIум факIо.
АдэкIэ, хэхэсым уплъэмэ, Адыгэхэр зыщыпсэурэ хэгъэгухэр дектатор шIыкIэм тетыгъэх ау ахэми зэхъокIынгъэхэр афэхъоу ыублагъ, демократие гъэпсыкIэ техьэхэу аублагъ.
Мы зэхъокIынгъэхэу зыфэтIуагъэхэр Адыгэхэм агъэфедэн алъэкIыщт. Непэрэ дунаем къыдищтэу Дунае Адыгэ хасэ зэхащэн алъэкIыщт. Мыр Iоф IэшIэхэп ау ар ебгъэжьэн плъэкIыщт. Апэу мыщкIэ шъэгъэн фаер инициатив куп зэхэщэгъэн фае. Ащ хэтщтых Адыгэ хэкум ыкIи хэхэсым щыпсэухэрэм ялIыкIохэр. Мы купым дунае хасэм изэхэщэн агъэхьэзырыщт. Апэу хасэм гупщысэу иIэщтыр агъэхьэзырыщт ытIанэ политикэ, экономикэ, къэщэжьын Iофыр ыкIи нэмыкIхэм ехьылIагъэ програмэ агъэхьэзырыщт. Мыщ илъэс Iоф пылъ. Ащ нэужьым иапэрэ зэфэсыр зэхащэщт. Дунае Адыгэ Хасэм иапэрэ зэфэсыр Европэм щыпIшIымэ нахьышIу, сыда пIомэ, Адыгэхэр зыщыпсэурэ хэгъэгухэм уаплъымэ Европэр ягузэгу ит, ущызэхэхьэныр нахь псынкIэ ыкIи нахь IэшIэх.
Инициатив купым кIэщакIоу фэхъущтхэр зыфэдэщтхэр гъэнэфагъэ. Ахэр Адыгэ лъэпкъ Iоф пстэуми адэлажьэрэ хасэхэр ары (политикэ, экономикэ, къэщэжьын Iоф ыкIи нэмыкIхэр). Ащ фэдэ хасэу мэлажьэхэрэм ащыщых "Адыгэ Хэгъэгупсэхэр", "Адыгэ Хасэ АР", "Адыгэ Хасэ КъЧР", "Хасэ КъБР", "Адыгэ Зэгохьэныгъэ", "Адыгэ Зэфэс", "Адыгэ Хэкужъ", "Европэ Адыгэхэм я зэгохьэныгъэ" "Адыгэ Хасэ Калифорние", "Адыгэ Хасэ Израил", "Адыгэ Ныбджэгъу Хасэ Иордание". Мыхэм анэмыкIхэри щыIэх.
Гунэ Нарт