Ермэлхьаблэ Краснодар краим хэхьэ. Тарихъ гъэшIэгъон пылъ, ар адыгэ лъэпкъым епхыгъ. Илъэс 200 фэдизкIэ узэкIэIэбэжьмэ, псыхъоу Уарп инэпкъхэм адыгэхэр ащыпсэунхэу къыхахыгъагъ. Ермэлхэр тыркухэм Къырым хыгъэхъунэныкъом къызырафыхэм, адыгэхэр дахэу апэгъокIыгъагъэх, IэпыIэгъу афэхъугъагъэх, псэупIэхэр ащашIынхэу ячIыгухэм ащыщ Iахьхэр аратыгъагъэх. Ахэм адыгэ хабзэхэмрэ шэнхэмрэ псынкIэу аштэгъагъэх, ау ядин зэблахъугъагъэп.
- ИлъэсишъэкIэ узэкIэIэбэжьымэ, Ермэлхьаблэ адыгэ лъэпкъ культурэм игупчэу алъытэщтыгъ, - къыIотагъ орэдыIоу Лъачэ Альберт. - Къалэм дэсыр зэкIэ адыгабзэкIэ гущыIэщтыгъ. Пчыхьэзэхэхьэ гъэшIэгъонхэр щызэхащэщтыгъэх, ахэм пщынэо ыкIи орэдыIо IэпэIасэхэр къарагъэблагъэщтыгъэх. Хьагъэудж Мыхьамэт якIэсэ дэдагъ. Лъэпкъ театрэ яIагъ, шъолъыр зэфэшъхьафхэм къарыкIырэ цIыфхэри ащ икъэгъэлъэгъонхэм яплъыщтыгъэх.
Непэ къалэм иурамхэм бэрэ адыгабзэкIэ ащыгущыIэхэу зэхэпхыжьыщтэп. Черкес-гаихэм (черкес ермэлхэм) къатекIыгъэхэу къэнагъэхэм анэмыкIэу, лъэпкъ зэфэшъхьафхэм ащыщхэри щэпсэух. Ермэлхьаблэрэ ащ къыпэблэгъэ адыгэ чылищымрэ адыгэ минитф фэдиз адэс. Къалэм общественнэ организациеу «Адыгэ Хасэм» Iоф щешIэ, ащ адыгабзэр щарагъашIэ, лъэпкъ къэшъокIо ансамблэ щызэхащагъ.
Хасэм итхьаматэу Щыко Аслъан къеIуатэ:
- КъэшъокIо ансамблэу «Шапсыгъэм» икъэгъэлъэгъонхэр тапэкIи бэрэ тлъэгъугъэхэу щыт. «Адыгэм и Унэ», Шъачэ, ащ хэтхэр бэрэ къыщышъуагъэх, цIыфыбэмэ агу рихьыгъ. «Шапсыгъэм» ипащэу Хэшх Аслъан икъэшъуакIохэм адыгэ къашъохэр зэряфэшъуашэу къызэрагъэлъэгъощтхэм тицыхьэ телъэу къедгъэблэгъагъэх. Ащ фестивалыр къызэIуедгъэхыгъ, лъэпкъ къашъохэр дахэу къашIыгъэх.
Фестивалым еплъынэу бэ къэкIогъагъэр, ахэм лъэпкъ зэфэшъхьафхэм къахэкIыгъэхэр, ныбжьыкIэхэр, нахьыжъхэр ахэтыгъэх. «Шапсыгъэм» фэдэу КIакIыхъу Рэщыдэ зэхищэгъэ шъонтырпэо купэу «Горцы», орэдыIо цIэрыIоу Лъачэ Альберт, Налщык къикIыгъэ орэдыIо ныбжьыкIэу Афэунэ Арсен, ансамблэу «Легенда Кавказа», нэмыкIхэми яIэпэIэсэныгъэ къагъэлъэгъуагъ.
Къалэм имэрэу Андрей Харченскэм ылъэгъугъэм ыгъэрэзагъэу хьакIэхэм закъыфигъази, игупшысэхэмкIэ къадэгощагъ:
- «ЗыкIыныгъэр ары ткIуачIэр» тIуи фестивалым тызэреджагъэр сценэм къыдэкIоягъэхэм къагъэшъыпкъэжьыгъ. Непэ тлъэгъугъэ ныбджэгъуныгъэ, культурнэ зэпхыныгъэхэр дгъэпытэнхэу сыфай. ШъукъэкIо зэпыт, тэ титворческэ коллективхэри ягуапэу Шапсыгъэ щыпсэухэрэм къафэшъощтых, орэдхэр къафаIощтых. Тызэкъотмэ, лъэпкъ культурэми зиушъомбгъущт.
Ныбэ Анзор
Адыгэ Макъ