Чъэпыогъум и 5-м Адыгэ Республикэр зызэхащагъэр илъэс 24-рэ хъугъэ. Ащ фэгъэхьыгъэ мэфэкI зэхахьэ АР-м и Къэралыгъо филармоние щыкIуагъ.
МэфэкI Iофтхьабзэм хэлэжьагъэх республикэм и ЛIышъхьэу ТхьакIущынэ Аслъан, АР-м иапэрэ президентэу Джарымэ Аслъан, АР-м и Къэралыгъо Совет - Хасэм и Тхьаматэу Владимир Нарожнэр, Премьер-министрэу КъумпIыл Мурат, федеральнэ инспектор шъхьаIэу ЛIыIужъу Адам, къэралыгъо органхэм япащэхэр, ветеранхэр, IофшIэкIо организациехэм ялIыкIохэр.
КъызэIукIагъэхэм игуапэу къафэгушIуагъ АР-м и ЛIышъхьэу ТхьакIущынэ Аслъан. Республикэм игъэпсын Iоф къызэрыкIоу зэрэщымытыгъэр, ар ылъэ теуцоным зиIахьышIу хэзышIыхьагъэхэм зэрафэразэр ащ къыIуагъ. АР-м иапэрэ президентэу Джарымэ Аслъан, ащ къыкIэлъыкIуагъэу Шъэумэн Хьазрэт зэрафэразэр къыхигъэщыгъ. Ахэм республикэм пае афэлъэкIыщтыр зэрашIагъэр, непэ гъэхъагъэу щыIэхэр ахэм лъапсэу ашIыгъэм къызэрэпкъырыкIыхэрэр къыIуагъ. Ежь ТхьакIущынэ Аслъан республикэм зипащэм къыкIоцI еджапIэхэр, кIэлэцIыкIу IыгъыпIэхэр, фельдшер-акушер IэзапIэхэр, стадионхэр, есыпIэ бассейнхэр - зэкIэмкIи объектыкIэу 320-рэ Адыгеим зэрэщагъэпсыгъэр, джыри спорт комплексышхо зэрэрагъэжьагъэр хигъэунэфыкIыгъ.
Мыгъэ зыфэдэ къэмыхъугъэ лэжьыгъэ бэгъуагъэ республикэм къызэрэщахьыжьыгъэр, тонн 500 000-м ехъу зэраугъоижьыгъэр игуапэу къыхигъэщыгъ.
- Республикэм ибюджет непэ сомэ миллиард 16 мэхъу, - къыIуагъ ЛIышъхьэм. - Ар тиIофшIэн зетэгъажьэм зэрэхъущтыгъэм нахьи фэди 3 - 4-кIэ нахьыб. Инвесторхэм предприятиеу щагъэпсыгъэхэм, IофшIэпIэ чIыпIэу къызэIуахыгъэхэм яшIуагъэкIэ, республикэм сомэ миллиарди 124-рэ къихьагъ. Адыгеим экономикэмкIэ, промышленностымкIэ, псэупIэ унэхэм яшIынкIэ, общественнэ гъэшхэным изэхэщэнкIэ ЮФО-мкIэ апэрэ чIыпIэр еубыты. IофшIагъэу тиIэр макIэп, ау ащ тыкъыщыуцунэу щытэп.
Ащ ыуж АР-м и Къэралыгъо Совет - Хасэм и Тхьаматэу Владимир Нарожнэр къызэIукIагъэхэм къафэгушIуагъ, Парламентым иIофшIэн кIэкIэу къытегущыIагъ.
- АР-м и ЛIышъхьэ къыIуагъэм зэкIэми адесэгъаштэ, республикэм рэхьатныгъэу илъым, лъэпкъ зэгурыIоныгъэу щыIэм ишIуагъэкIэ, къызэрыкIоу щымыт социальнэ-экономикэ Iофыгъохэр зэшIотхынхэ ыкIи ыпэкIэ тылъыкIотэн тэлъэкIы, - къыIуагъ ащ.
МэфэкI зэхэсыгъом ыуж ащ къекIолIагъэхэм апае АР-м итворческэ коллективхэм концерт къатыгъ.
Сихъу Гощнагъу - Адыгэ Макъ
