Адыгэ шъуашэм илъэу ыужрэ уахътэм щыгъынхэр зыгъэпсхэрэ Iэпэ-Iасэхэм ахэхъуагъэхэу къыхагъэщы. Ахэмэ адыгэ саехэм, цыехэм атехыгъэхэу джырэкIэ зыщалъэшъущт щыгъынхэр адых, ахэр къэгъэлъэгъон зэфэшъхьафхэм къащагъэлъагъох. Джаущтэу бэмышIэу Италием щыIагъэ щыгъын къэгъэлъэгъон зэлъашIэрэм итхьэмафэ адыгэ хэкухэм ащыщ IэпэIасэхэри хэлэжьагъэх.
Фитыныгъэ радиом игущыIэгъугъэ Адыгеим щыщ адыгэ шъуашэмкIэ IэпэIасэу ХъутIыжъ Симэ ифлъэс 20 къыкIоцI ижъкIэ адыгэмэ ащыгъыгъэ бзылъфыгъэ ыкIи хъулъфыгъэ шъуашэм ишIын дэлажьэ. ЛIэшIэгъу пчъагъэм къапкъырыкIыгъэ шъуашэм мэхьанэу хэлъыр къытыным пылъэу IэпэIасэм къыхегъэщы.
Фитыныгъэ радио: НыбжьыкIэ IэпэIасэхэм, гущыIэм пае, цыер зэрадрэ шIыкIэр о къэошта?
ХутIыжъ Сим: Ащ дезгъаштэрэп. Зыгорэхэр зэблэхъугъэу заадкIэ мытэрэзхэр къыхэфэх. А мытэрэзхэм етIанэ урагъэгупшысэ. ГущыIэм пае, адыгэ джанэхэу ашIхэрэм хьазырхэр абгъэ тырадэх. Ар тэрэзэп, сыда пIомэ хьазырым ыкупкI чыжьэу дзыгъэ. Хъулъфыгъэ гупшысакIэ, намыс хэлъ. Бзылъфыгъэм ар зызщилъэкIэ имэхьанэкIи, иформэкIи къезэгърэп.
Фитиыныгъэ радиом игущыIэгъугъэ ХутIыжъ Симэ къызэриIорэмкIэ, джырэ ныбжьыкIэ IэпэIасэхэм ахэтых ежьым упчIэжьэгъу къыфэхъухэрэри. «Адыгэ унэ» зыфиIорэу зыщылажьэрэм къыдычIэсэу дэлажьэх ныбжьыкIэ бзылъфыгъэхэри, зыр – кIэлэегъадж, зыр экономист, зыр дизайнер. Ахэми кIэныгъэ шIыкIэкIэ агъэпсхэрэ щыгъынхэм адырагъаштэрэп, къеIуатэ Симэ. Ахэмэ ашIэшъ шъуашэм ылъапсэр, нэмыкI лъэпкъхэм яшъIуашэ шэнхэр халъхьаныр рапэсрэп, еIо ащ.
Фитыныгъэ радио: Адыгэ шъуашэу шъо жъугъэпсхэрэм бэу къакIэупчIэха? Тыда анахьэу зыщызщалъэхэрэр джыдэдэм?
ХъутIыжъ Сим: КъыкIэупчIэх. ЗэмылIэужыгъо лъэпкъхэу Урысыем исхэм яшъуашэхэр зычIэт музеир агъэпсы зэхъум адыгэ шъуашэмкIэ ар рагъэжьагъ. Ар тэ тшIыгъэ. НыбжьыкIэхэри бэу къэкIох. Къэзыщэщтым, зэхахьэ горэхэм хэтыщтхэм шъуашэр зыщалъэнэу фаех. ХэкIотагъэхэми шъуашэр ашIы.
Адыгэ шъуашэм имафи АдыгеимкIэ илъэс заулэ хъугъэу щырагъэкIокIы.
Фитыныгъэ радио, Щэрджэс Ларис
Адыгэ шъошэд IэпэIасэу ХъутIыжъ Симэ ыдыгъэхэри зычIэлъ Адыгэ Унэу къалэу Мыекъуапэ дэтым къыщытехыгъэхэр.
