Урысыерысхэу Украинэм дэеу фыщытхэм ахэхъуагъ


Украинэр урысыерысмэ нахь макIэу агу рихьэу хъугъэу цIыф еплъыкIэ кIэупчIэныгъэм къыгъэлъэгъуагъ. Фэдэ зэфэхьысыжьхэр къешIых кIэупчIэкIо купэу «Левада-Гупчэ» зыфиIорэм. Фэдэ еплъыкIэ зэблэхъуным ылъапсэу кIэупчIэныгъэ резгъэкIокIыгъэхэм къыхагъэщрэр украинэ зэтезыныгъэр ары. Джаущтэу зэупчIыгъэхэр языныкъом нахьыбэм, %55, къаIуагъ Украинэм мыдэгъоу фыщытхэу. %40 Украинэмрэ Урысыемрэ язэфыщытыкIэхэм пый шъуашэ ахэлъэу къычIагъэтхъыгъ.

Украинэм къыщыхъухэрэмкIэ урысыерысхэм пшъэдэкIыжьыр тырагъао джырэ украинэ унэшъошIым, къетхы «Комсомол шъыпкъэныгъ» зыфиIорэ гъэзетым.

БлэкIыгъэ цIыф еплъыкIэ кIэупчIэныгъэу мы Iофым фэгъэзагъэу щыIагъэмкIэ, мыдэгъоу Украинэм фыщытыгъэхэр % 49 зэрэхъущтыгъэхэр.

Хъурцэм щыпсэухэрэм къызэрэхагъэщрэмкIэ, Украинэм яфыщытыкIэ нахь дэгъу мыхъугъэмэ нахь къэдэигъэп. Фитыныгъэ Радиом игущыIэгъугъэ къалэу Тбылыс дэс Тамрико къыхегъэщы, Украинэм ицIыфхэм ыгу зэрафэузрэр. Ежь къэралыгъом ишъхьафитыныгъи къызэраухъымэшхущтым зэрэдыригъаштэрэр.

Тамрико: Сэ сызготыр – Украинэр зы къэралыгъоу щытынэу ары. Ахэм ячIыгу къагъэгъунэ. Сэрыми украинэ цIыфхэм афэдэу сызекIощтыгъэ. Ар ежьхэм якъэралыгъу, къаухъумэн фае. Ыужрэ уахътэм нахь садеIэу хъугъэ, сыда пIомэ сэри сикъэралыгъо джащ фэдэу къехъулIагъ. Украинэм къыщыхъухэрэм сынаIэ инэу тетэу сыкIэлъэплъэ.

Хъурцэрысэу Фитыныгъэ Радиом игущыIэгъугъэ Иринэ елъытэ Украинэм джырэкIэ угу фэмыузыщтмэ нэмыкIэп:

ШъыпкъэмкIэ а цIыфхэм сыгу лъэшэу ягъу. Сэ къызгурыIон слъэкIрэп, ащ къыщыхъухэрэр зэкIэ зэIызышIагъэр, арау цIыфхэр тхьамыкIэх, къэралыгъори зэбгырагъэзыгъ. Ышъхьагърэйхэм зыгорэ зэфамыгощышъурэм пае цIыф къызэрыкIохэр текIуадэх. Украинэм щыщхэу ячIыгу егъэзыгъэу къэзыбгынагъэхэр садэжьи щызгъаIэщтыгъэх, мылкукIэ сыпырикъушъущтыгъэмэ.

КIэупчIэныгъэу «Левада-Гупчэм» ригъэкIокIыгъэм къызэригъэлъэгъуагъэмкIэ, Урысыем исхэм джы анахь агу рихьэу хъугъэ къэралыгъор – Белоруссиер ары. Хъурцэри зыгу рихьхэрэм япчъыгъи хэхъуагъэу къалъытагъ – зэупчIыгъэхэм я %45, къыфэдэйхэр - % 38.

Фитыныгъэ Радио, Щэрджэс Ларис