Кушъхьэфэчъэ спортымкIэ дунаим изэнэкъокъу Испанием щыкIуагъ. Урысыем ихэшыпыкIыгъэ командэ хэтэу Александр Куликовскэр зэIукIэгъухэм ахэлэжьагъ,тыжьын медаль къыдихыгъэу ядэжь къегъэзэжьы.
Адыгэ Республикэм кушъхьэфэчъэ спортымкIэ икIэлэцIыкIу-ныбжьыкIэ спорт еджапIэ А. Куликовскэм зыщегъасэ. Мыекъопэ районым къыщыхъугъ. Тренерэу иIэр ят - Вячеслав.
Спортсменхэр купышхо хъухэу Испанием щызэнэкъокъугъэх. Километри 127,4-рэ хъурэ гъогум яухьазырыныгъэ щауплъэкIугъ. Александр Куликовскэм ятIонэрэ чIыпIэр къызэрэдихыгъэм фэшI тыфэгушIо.
Спорт еджапIэм идиректорэу Анатолий Лелюк зэрилъытэрэмкIэ, А. Куликовскэм исэнаущыгъэ къызэIуехы. Спортсмен ныбжьыкIэм иIэпэIэсэныгъэ хэпшIыкIэу хегъахъо. Урысыем ихэшыпыкIыгъэ командэ хэтэу Европэм щыкIощт зэIукIэгъухэм зафегъэхьазыры.
adygvoice.ru