Польшэм адыгэмэ зызэрэфагъэзагъэм Хъурцэм щыдырагъаштэ


Адыгэ лъэпкъгъэкIодыр къаштэнэу Польшэм иунэшъошIхэм зыфагъэзагъ къэралыгъуипшIмэ ащащ адыгэхэр. Нэбгырэ 52 лъэIу тхьапэм кIэтхагъэхэр Урысыем, Тыркуем, Иорданием, Германием, Францым нэмыкIхэми ащыщых. Фэдэ фэгъэзэныгъэм икIэщщакIор Тыркум икъэлэ шъхьаIэу Истамбыл щыIэ «Щэрджэсым мпатриотхэр» зыцIэ купыр ары. Тхьапэр бзэ заулэкIэ тхыгъэ.

Польшэм фэгъэзэныгъэу адыгэмэ рагъэхьыгъэм ХъурцэмкIи щыдеIэх. Ащ дезгъаштэрэмэ ащыщ Фитыныгъэ Радиом игущыIэгъугъэ Адыгэ культурэм игупчэу Тбылыс дэтым ипащэхэм ащыщэу Габисония Андро.

Габисония: Тэрэзэу ашIагъ лъэIур зэрэрагъэхьыгъэмкIэ. Польшэр – ныбджэгъуныгъэ зыхэлъ къэралыгъу. Ахэм якъарыукIэ фаех дунаим демократиемкIэ къыщыхъухэрэм апэ итынхэу. Джыдэдэм Украинэм Iофыгъохэр иIэхэшъ, ащ благъэу готых. Политикэ дэгъу яI, зэкIэми адеIэнэу фелъых.

Фитыныгъэ Радио: Андро, сыд фэдэ кIэухха фэдэ кIэлъэIум къыкIэлъыкIонэу узэжэн плъэкIыщтыр, о уиеплъыкIэкIэ?

Габисония: КъэшIэгъуае ахэм рахъухьащтар. Ар бэмэ ялъытыгъ. Сыд мыхъуми, а фэгъэзэныгъэр зышIыгъэхэр къэуцу хъущтэп, Iоф ашIэн фае зы кIэух горэм къынэсынхэу фаехэмэ.

Фитыныгъэ Радио:  Мары адыгэмэ ялъэпкъгъэкIод къаштэным пае Украинэм ипарламенти мыгъэ зыфагъэзагъ. Фэдэ лъэубэкъумкIэ о сыд уиеплъыкIэр?

Габисония:  Сэ зэрэслъытэрэмкIэ, а лъэубэкъум игъо имыфэ. ДжырэкIэ Украинжр зыхэт щытыкIэм укъыхэкIэу, фэдэ фэгъэзэныгъэр фебгъэхьыныр игъоп. Ежьхэри ары IэпыIэгъу зищыкIагъэр. МыщкIэ сэдъытэ, кIэщакIохэр тIэкIу ыпэ ишъыгъэхэу. Сэ зэрэслъытэрэмкIэ, Прибалтикэм ары жэы зызфэбгъэзэн фаер. ГущыIэм пае, Литвам. Къэралыгъуабэмэ зэгорэм къаштэщт адыгэ лъэпкъгъэкIодыр. Адыгэ диаспорыр ары мыщкIэ лэжьэн фаер. Урысыем щыIэхэм къин къафэхъу мы Iофыр лъагъэкIотэнымкIэ. Къины ыпэкIэ ащ улъыкIотэныр.


Фэгъэзэныгъэм зэритхагъэмкIэ, адыхэм янахьыбэр Урыс-Кавказ заом игъом агъэкIодгъагъэх. Къэнагъэхэр ячIыгужъ рафыгъагъ. ДжырэкIэ адыгэхэу ячIужъ исэу псэухэрэр зэрэзэгочыгъэхэр къыщытхы лъэIум.

Польшэм иунэшъошIхэм зызфэзгъэзагъэхэм къызэраIорэмкIэ, фэдэ лъэIухэр фэшъхьаф къэралыгъохэми афарагъэхьынэу загъэхьазыры.

Фитыныгъэ Радио, Щэрджэс Ларис, Тбылыс