Мыекъуапэ, бэдзэогъум и 13
Гъунэгъу Краснодар краим илIыкIо купэу краим игубернатор иIэнатIэ зыгъэцэкIэрэ Вениамин Кондратьевыр зипащэр тыгъуасэ Адыгеим къэкIогъагъ. Ащ хэтыгъэх краим и Законодательнэ ЗэIукIэ и Тхьаматэу Владимир Бекетовыр, вице-губернаторхэу Хьатыу Джамболэт, Владимир Свеженец, Николай Долуда, краим идепартаментхэм ыкIи муниципальнэ образованиехэм япащэхэр.
АР-м и ЛIышъхьэу ТхьакIущынэ Аслъанрэ Вениамин Кондратьевымрэ пстэумэ апэ зэIукIэгъоу зэдыряIагъэм субъектитIум язэфыщытыкIэхэм, тапэкIэ Iоф зэрэзэдашIэщтым щатегущыIагъэх. Нэужыми ащ фэгъэхьыгъэ зэхэсыгъо Правительствэр зычIэт унэм щыкIуагъ. Ащ Адыгеим ылъэныкъокIэ хэлэжьагъэх АР-м и Къэралыгъо Совет - Хасэм и Тхьаматэу Владимир Нарожнэр, ащ игуадзэу Iэщэ Мухьамэд, АР-м и Премьер-министрэу КъумпIыл Мурат, министрэхэм я Кабинет хэтхэр, муниципальнэ образованиехэм япащэхэр.
АР-м и ЛIышъхьэ ипэублэ псалъэ Адыгеимрэ Краснодар краимрэ сыдигъокIи зэгурыIоныгъэ зэдыряIэу зэрэзэдэлажьэхэрэм, ар ижъыкIэ къыщежьэгъэ зэфыщытыкIэу зэрэщытым, непи ар лъагъэкIотэныр пшъэрылъ шъхьаIэу яIэхэм зэращыщым щыкIигъэтхъыгъ.
- Краснодар краим сыд фэдэрэ хъугъэ-шIагъэу ихъухьэрэри тэ тихъугъэ-шIагъэм фэдэу теплъы, - къыIуагъ ащ. - Хъяр шъуиIэмэ, тыщэгушIукIы, къиныр къыжъудэдгощыным тыпылъ. Аущтэу шъори шъукъытпэгъокIышъ, ащ пае лъэшэу тышъуфэраз. ЗэгурыIоныгъэу, зэкъошныгъэу тазыфагу илъым зэзэгъыныгъэу тызыкIэтхэщтыр изы шыхьат.
Вениамин Кондратьевым илъэсипшI пчъагъэм къыкIоцI язэфыщытыкIэхэр зэрэзэщымыкъуагъэхэр зэгъунэгъу лъэпкъитIум яакъылыгъэу зэрилъытэрэр, тапэкIи аущтэу зэрэлъыкIотэщтым ицыхьэ зэрэтелъыр къыхигъэщыгъ.
- СубъектитIум яэкономикэ хэхъоныгъэ ышIыным садэлэжьэныр пшъэрылъ шъхьаIэу зыфэзгъэуцужьыгъэхэм ащыщ, - къыIуагъ ащ. - Адыгеимрэ Краснодар краимрэ яэкономикэ лъэныкъуабэкIэ зэхэлъэу пIон плъэкIыщт, арышъ, ар дгъэпытэн, къэтыухъумэн фае.
Нэужым зэхэсыгъом хэлажьэу къэгущыIагъэхэми субъектитIум зэгурыIоныгъэу, зэныбджэгъуныгъэу азыфагу илъыр лъыгъэкIотэгъэныр пшъэрылъ шъхьаIэу яIэхэм зэращыщыр кIагъэтхъыгъ.
ТхьакIущынэ Аслъанрэ Вениамин Кондратьевымрэ зыкIэтхэгъэхэ зэзэгъыныгъэм лъэныкъо зэфэшъхьафыбэу Iоф зэрэзэдашIэщтыр къыдыхэлъытагъ. Джащ фэдэу субъектитIум япащэхэми кIагъэтхъыгъ, зэзэгъыныгъэми къыдыхэлъытагъ зыгъэпсэфыпIэу «Лэгъо-Накъэ» игъэпсынкIэ зэрэзэдэлэжьэщтхэр.
Зэхэсыгъом ыуж республикэ стадионэу зэтырагъэпсыхьажьырэм ыкIи физкультурнэ комплексыкIэу ашIыгъэм Краснодар краим къикIыгъэ лIыкIо купыр арагъэблэгъагъ.
Адыгэ Макъ
