Хъурцэм Урысыер ыумысыгъ гъунапкъэр зэриубытыгъэмкIэ. Фэдэ къэбарыр хъурцэ къэбар лъыгъэIэс амалхэм зэбгырагъэкIыгъ. Хъурцэ унэшъошIхэм яемызэгъыныгъэ къыхагъэщы убытыгъэкIэ алъытэрэ Цхинваль шъолъырым и Ахалгори шъолъыр игъунапкъэ метр шъэ заулэкIэ зэрагъэкощыгъэм. А гъунапкъэ чIыпIэм тырагъэуцуагъ пэеплъ Къыблэ Осетым игъунапкъэ пхырыкIэу тетхагъэу. Ащ дэжьым чIы дэгагъэр зэрыкIорэ трубэ пхырэкIы. Хъурцэм мыщ къызэкIэгъэблэгъэн зекIуакIэкIэ щеджагъэх.
Джы къэхъугъэ щытыкIэм Урысыемрэ Хъурцэмрэ язэдэгущыIэныгъэ дэлажьэрэ Абашидзе Зурабрэ ащ иурысые IофшIэгъоу Карасин Сергейрэ язэдэгущыIэныгъэхэр зэфэпшёыжьын фаехэу елъытэ Хъурцэм иIэкIыб IофхэмкIэ ыпэкIэ иминистырыгъэ. ЗэдэгущыIэныгъэхэмкIэ фэшъхьаф шIыкIи улъыхъун имыщыкIагъэу ащ къыIуагъ. Къэралыгъохэм ащыщэу Швейцариеми иемызэгъ къэхъу-къашIэмкIэ къыхигъэщыгъ.
Фитыныгъэ радиом игущыIэгъугъэ хъурцэ политологэу Лебонидзе Соломон къыхегъэщы фэдэ щытыкIэр Хъурцэм къызэремыкIурэр.
Лебонидзе Соломон: Мыр къызэкIэгъэблэн зыхэлъ зекIуакI. Арышъ, Iо хэмылъэу, ащ дебгъэштэн плъэкIыщтэп. ХъурцэмкIэ IэкIыб IофхэмкIэ Iахьми ащ зэремызэгърэр къыхигъэщыгъ. Ежь Цхинваль щыIэ сепаратист унэшъошIхэм мэзэ заулэкIэ узэкIэIэбэжьмэ къызэраIогъагъэмкIэ, чIыдагъэ шIуцIэр зэрыкIорэ трубэр а гъунапкъэм къыхиубытэу ежь ячIыгуи рэкIошъ, ащкIи фитыныгъэхэр яIэхэ фэдэу. ЗанкIэуи, мызанкIэуи орэхъу.
Фитыныгъэ радио: Соломон, ежь цIыфхэу Цхинваль шъолъырым щыпсэухэрм, гъунапкъэ гъэкощыныр сыдэущтэу зыхашIэра?
Лебонидзе Соломон: Ар ахэмкIэ шъхьакIо ыкIи ягуапэп. Сыда пIомэ цIыфмэ якъэхалъэхэр, ябылымхэр зыщагъэхъурэ гъэхъунэхэр а чIыпIэм тефэх. Фэдэ цIыфмэ яемызэгъыныгъэ 2008 илъэс шышъхьаIу заом ыуж къежьагъ, урысые унэшъошIхэмрэ цхинваль шъолъырым ипащэхэмрэ «демаркацыр» зырагъэжьагъэ нэуж. ЩытыкIэр цIыфхэм лыузэу зыхашIэ. ГущыIэм пае, щыIэх цIыфхэу, гущыIэм пае, Горск шъолъырым исхэм, яунэ ныкъо Къыблэ Осетием ит хъугъэу, адырэ ныкъор – Хъурцэм.
Фитыныгъэ радиом игущыIэгъугъэ хъурцэ политологэу Лебонидзе Соломон иеплъыкIэкIэ, фэдэ щытыкIэм – гъунапкъэхэр цхинваль шъолхъырым зэрэщагъэкощрэр- Хъурцэм зи фыхэшIыхьашъущтэп изакъоу. Политологым зэрилъытэрэмкIэ, дунаем щыпсэухэрэм яфэмэ –бжьымэ къытырагъэхьан фае Урысыем зэрихьэрэ агресс зыхэлъ политикым Хъурцэм къыфэгъэзагъэу. Ежь хъурцэ цнэшъошIхэм зэралъытэрэмкIэ Хъурцэм иIашэ закъор мы Iофым ебэныгъэнымкIэ – дунэе фитыныгъэр ары.
Фитыныгъэ радио, Щэрджэс Ларис, Тбылыс