Тыркум къыщыхъуа Суруч къалэ къэхъукъащIэр цIыхугъэм и напэ техщ.
Тыркум и Суруч къалэ деж Кобани дэIэпыкъуныгъэ хуащIыну Блыщхьэм щызэхуэса «Сосялист генчлик дернеклери» зифIэщыгъэцIэ щIалэгъуалэ федерасионым щыщу нэхъыбэр университетым щIэс ныбжьыщIэ 32-р гущIэгъуншэу бомбэ къэуэныгъэм хэкIуэдащ.
Тырку Миллиет Газетым къызэритамкIэ, къэуэныгъэм хэкIуэда цIыху 32-м яхэтт Тыркум щыпсэу Адыгэхэм ящыщ ЛIыщIэ Нартанырэ и анэмрэ. Нартан езыр и хэкужь Къэбэрдей Бэлъкърым щеджэт, Тыркум зигъэпсэхуну къэкIуэжауэ мыпхуэдэ дэIэпыкъуныгъэхэм хэту арат.
ЦIыху I04-рэ уIэгъэ зыщыхъуа къэуэныгъэм хэкIуэдахэм теухуауэ и гупсысэхэмкIэ Хуитыныгъэ радиом Къедгъэпсэлъащ Тыркум щыщ Адыгэ лъэпкъ лэжьакIуэ, Гъут Эрдогъанырэ, и хэкум зыгъэзэжа Адыгэ лъэпкъ лэжьакIуэ Бабыгу Эргунырэ.
Гъут Эрдогъан: «Иджыпсту уеплъым мыр зы Iуэхушхуэм и зы Iыхьэ тIэкIущ. Адыгэ цIыхуищ ахэм я хэтащ. И анэмрэ и къуэмрэ хэкIуэдащ. Зэ еплъыгъуэкIэ Адыгэ Iуэху хуэду къыпщымыхъуу щытыми, Лъэпкъ цIыкIухэр я хуитыныгъэ, я мамырыныгъэм щхьа, я хьэкъхэр зыщыпсэу къэралхэм къыратынум хуэлажьэ цIыхухэм ягъусэу хэкIуэдащ.
Адыгэ Iуэхуу щымытыми Адыгэ Iуэхур мыбы хэзагъэу зыгуэрщ, мы тIур зыгуэпхи хъунуIым. Сыт щхьэкIэ жыпIэм Адыгэр изакъуэу мыхэм хуэлажьэу и закъуэдыдэу зыхуей псори, къаIырихыфынукъым, апхуэдэ къару иIэкъым, апхуэдэ зы дунеи щыIэкъым.
Дунейм щыпсэу лъэпкъ цIыкIухэм псори сыт хуэдизу зыр зым зыхуэлажьэми апхуэдиз къару яIэнущ. Мыри абы и щапхъэ дахэхэм щыщ зыщ. Сэ укъызэупщIым мыхэм къагъэна Iуэхури тIэкIу
гъэкIуэтэн хуейуэ соплъыр. Сэ сызэреплъымкIэ Iуэху захуэ ящIэрэ пэт мыхэр залымыгъэм хигъэкIуэдащ.
Адыгэхэми ягъэлъапIэн хуейщ, Тыркум щыпсэу адрей лъэпкъхэми ягъэлъапIэн хуейщ мыхэр. Мы цIыху 30-м щIигъу хэкIуэдар зэпымыуу дигу къэдгъэкIыжын хуейщ. Ахэр хэзгъэкIуэдар цIыхугъэм езауэу аращ. ЦIыхугъэм езауэ Iуэхухэм ядэщIыныри Адыгэ Iуэхум пыщIа цIыхухэм я къэлэну къызолъытэ. Мы ди цIыхуитIым къагъэна Iуэхур сыадыгэщ жызыIэ дэтхэнэ зыми зыщимыгъэгъупщэу а ныпыр яIэтауэ щытын хуейщ.
lуэхугъуэм теухуауэ Адыгэ лъэпкъыр, цIыухбэ зэгухьныгъэхэр, хэкурысхэр пэджэж ящIырэ?
Гъут Эрдогъан: «Иджыпсту уеплъымэ Адыгэ лъэпкъым апхуэдэ зы Iуэху зырихуэу плъагъунуIым. Сыт щхьэкIэ жыпIэм Тыркум щыIэ Адыгэхэм щхьа жысIэнщи, иджыри къэс зырахуу щыта политика Iуэхур хуэкIуакъым, зэрыхуэмыкIуам щхьэкIэ нэгъуэщIу йоплъхэр. Нартан зэреплъым хуэдууи щытакъым нэхъыбэм я еплъыкIэр. Ауэ иджы нэужь къащтэну политика щытыкIэхэр, Iэмалхэр, мыбы хуэгъэкIуэн хуейщ. ХуэдымыгъакIуэм дэ ди закъуэ дунейр тхуэухуэжынуIым. ЦIыхубэ цIыкIухэр, лъэпкъ цIыкIухэр зыгуэхьэурэ езым я хуитыныгъэм щхьа зэгъусэу здэмызауэмэ, зэгъусэу здемыIэмэ здэкIуэн зыри щыIэкъым. Мыхэр цIыху сэмэгуу щытахэщ, мыхэр е сосиалист, е коминистщ, ахэм уахуэгуIэ хъункъым, ахэм уадэщI хъунукъым жызыIэхэр куэдщ, Адыгэхэми яхэтщ. Ауэ мис мыр къыдгурыIуэн хуейщ лъэпкъ Iуэху зезыхуэри, хуитыныгъэ Iуэху зэзыхуэри Нэхъыбэу Тыркум щыIэ сэмэгухэрауэ щытащ. Абы щхьа мыхэр сэмэгуу щытащ, мыхэм едаIуэн хуейкъым жытIэ нэхърэ, мыхэм я Iуэхур къэтщтэжын хуейщ.
Бабыгу Эргун: «Мы щIалэм ищхьэ къырикIуар пхуэмыIуэтэжыну гущIыхьэ тщыхъуащ псоми. Хэкум щеджэ ди быныр гъэмахуэм зигъэпсэхуну Тыркум кIуэжауэ арат. Ауэ езыри и анэри хэкIуэдащ. ЩIалэ сакъыу, гумащIэу апхуэдэт. И мыхъумыщIагъэ игъащIэм тлъэгъуакъым. А зыхэкIуэда Iуэхури и гущэбагъэр къигъэлъагъуэу, и цIыхугъэр къэзыгъэлъагъуэ зы Iуэухт пэжыр ухуейм. Ар Сирие зауэм тхьэмыщкIагъэ къызылъыса сабийхэр игъэгушхуэну уIэгъэ хъуахэм,
зеиншэу къэнахэм ядыIэпыкъуну, а зауэм и курыкупсэм къина лажьэ зимыIэ цIыхухэм, ‘дырывигъусэщ, дынывбгъэдэтщ’ жэуэ игъэгушхуэну арат а бомбэкIэ къагъэуа зэхуэсым щIыщыIэр. Зэрагъэса Адыгагъэм къыхипща гущIэгъумрэ цIыхугъэмрэ текIуэдауэ аращ щIалэр. И анэри игъусэу. Тхьэм тIуми жэнэтыр екIуэлIапIэ яхуищI. Хэкум икIыу яхуэгузавэну зы гупи догъакIуэ Тыркум.
Тыркум къыщыдэкI Ени Ася Газетым къызэритамкIэ бомбэр къигъэуауэ хуагъэфащэ Ислам къэралыгъуэ зыфIэзыщыжа гупым. Тыркум и Премьер Министр Давутогъулу Ахьмэд Iуэхугъуэм теухуауэ мыпхуэдэу къыжиIащ, «Мы теуэныгъэр Тырку къэралым къыращIылIауэ аращ, дызэкъуэту дыщытын хуейщ, теуэныгъэ псоми партиплIыри дызэгъусэу дыпыщIэтын хуейщ, нобэ мис апхуэдэ зы махуэщи зыми мы Iуэхугъуэр политик еплъыкIэм хурремышэ, итIанэ абы ди къэкIуэныр шынагъуэм хидзэну аращ.» жэуэ.
Емуз Баязыт, Хуитыныгъэ радио, Тюркие