Адыгэ ныпыр Мадрид щегъэбыбатэ - Натхъо Амир

Испанием ифутбол клуб цIэрыIоу «Барселонэм» щешIэрэ Натхъо Амир Адыгэ Республикэм щапIугъ. Мы мафэхэм ар Мыекъуапэ къэкIуагъэу гущыIэгъу тыфэхъугъ.

- Футболыр ешIэгъу къодыеп, сищыIэныгъэ спортышхом еспхыгъ, - къеIуатэ Натхъо Амир. - Апэрэ мафэхэм къащыублагъэу «Барселонэм» дэгъоу къы­щыспэгъокIыгъэх. Ныб­жьыкIэ­хэр зыхэт купым къыщыспэкIы­рэплъыхи, клубым идублер шъхьа­Iэхэм сахагъэхьагъ.

- НыбжьыкIэхэм яIэпэIэсэныгъэ хагъэхъонымкIэ тренерхэм сыда анахьэу анаIэ зытырагъэтырэр?

- «Пирамида» зыфиIорэ шIыкIэм тетэу клубым футболистхэр щагъасэх. - Ныб­жьыр къыдалъытэзэ, сэнаущыгъэ зыхэлъхэр командэхэм аштэх, ра­гъашIэх. Анахь дэгъухэм хэ­ушъ­хьафыкIыгъэу Iоф адашIэ, «Барселонэм» фагъэхьазырых.

- КъызэрэпIорэмкIэ, пщынэр зэрэзэкIащырэм, макъэр зэрагъэжъынчырэм фэдэу пирамидэр агъэ­псы.

- Ары. Европэм икомандэхэм щысэшIу афэхъух. Футболыр искусствэ лъагэм рагъа­пшэ.

- Амир, Испанием идэхагъэ, Мадрид ичIыпIэ гъэшIэгъонхэм татегу­щыIэнэу игъо тифэщт. Урысыем ифутбол  ехьылIагъэу Испанием бэрэ къыщаIуата?

- Сыгу къео, ау тихэгъэгу ифутбол гущыIэ фабэхэр къы­раIуалIэу бэрэ зэхэтхырэп. Ев­ропэм ифутбол зэрэлъыкIуатэрэр, тренерхэр шIыкIэшIухэм зэралъы­хъухэрэр, щысэ зытетхын тлъэ­кIыщтхэр къытфаIуатэх.

Академием щеджагъ

- Тольятти футболымкIэ и Академиеу Коноплевым ыцIэкIэ щытым узэрэщеджагъэм шIуагъэу хэпхыгъэр къытаIоба.

- Урысыем ихэшыпыкIыгъэ ныбжьыкIэ командэхэм сахэтэу зэнэкъокъу макIэп сызыхэлэжьа­гъэр, спортсмен цIэрыIохэм та­IукIэщтыгъ, футболым о шIу зы­щымылъэгъоу, футболыр угу ри­хьын, шIу плъэгъун зэрэфаем, спортым шэн-хабзэхэр щызэтехьанхэм тафагъасэщтыгъ. Академиер еджэпIэ къодыеп. ЦIыфы­гъэм, тэ «адыгагъ» зыфатIорэм мэхьанэу иIэр щыIэныгъэм къы­щыдгурыIощтыгъ.

- Дунэе турнирхэу Тыркуем, Венгрием, Англием, Бразилием, Италием, нэмыкIхэм ащыкIуагъэ­хэм уахэлэжьагъ.

- Академием тыщеджэзэ дунэе зэIукIэгъухэм защытыуплъэ­кIущтыгъ, Урысыем ыцIэкIэ футбол тешIэщтыгъ.

- Амир, уятэу Натхъо Адам Адыгеим, Краснодар краим яфутболист цIэрыIу, Мыекъопэ «Зэ­къошныгъэм» идиректор шъхьаI. Тиреспубликэ икомандэ ущешIэным зыфэбгъэхьазырыгъэба?

- Нурбый, а упчIэм сыкъежэщтыгъ. «Рубин» Казань Натхъо Бибарс щешIэзэ сэри Татарстан икомандэ сырагъэблэгъагъ. Тре-нер шъхьаIэу Курбан Бердыевыр къызэрэсэджагъэр сэркIэ гушIуагъоу щытыгъ. «Натхъо на­хьыжъыр, нахьыкIэр» аIозэ тренерхэр, футболистхэр къыта­джэщтыгъэх. Сятэ иунашъокIэ Мые­къуапэ къэзгъэзэжьыгъагъ. Къызысэушъыим, псынкIэу дезгъэштагъ. Мыекъопэ «Зэкъошныгъэм» щезгъэжьэнышъ, футбол сешIэн зэрэфаер къысиIуагъ. Адыгеим сызэрэщапIугъэр ащ еспхыщтыгъ.

- Уилъэпкъ, уичIыгу бгъэлъэпIэнхэр, зэкъошныгъэр бгъэпытэныр спортым хэхьэгъэ шэн-хабзэх.

- ГущыIэ IэтыгъэхэмкIэ сыгу илъыр къэсIонэу сыфаеп. Мые­къуапэ апэрэ тренер къыщысфэхъугъэ Александр Пахомкиныр егъашIи сщыгъупшэщтэп. Илъэси 6 сыныбжьэу республикэм футболымкIэ икIэлэцIыкIу командэ сиштагъ, сятэм фэдэу къыслъыплъагъ.

Къашъоу «Лезгинкэр»

- Испанием икомандэхэм хэгъэгу зэфэшъхьафхэм къарыкIыгъэхэр ащешIэх. Адыгеим узэрэщыщыр зышIэрэр ба?

- Адыгеим, Краснодар краим яныбжьыкIэхэр Мадрид ще­джэх, тызэIокIэ.

- Адыгэ быракъыр бгъэбыбатэзэ укъызэрэшъуа­гъэр Интер­нетым идунэе хъытыукIэ слъэгъу­гъэ. Ащ егъэжьапIэу фэхъу­гъэр къытаIоба.

- Адыгэ Республикэм ибыракъ и Мафэ Мыекъуапэ зэрэща­гъэмэфэкIыщтыр Интер­нетымкIэ зэзгъэшIагъ. МэфэкIым сыхэлэжьэн зэрэсымылъэкIы­щтым къы­хэ­кIэу, Испанием икъушъхьэ лъа­гэмэ ащыщ сыдэкIоягъ, адыгэ быракъыр згъэбыбатэзэ сыкъэ­шъуагъ. Синыбджэгъухэм «Лезгинкэр» къы­зэрэсшIыгъэр дискым тыратхагъ, сисайт къидгъэ­хьагъ.

- Уянэ-уятэхэу Светэрэ Адамрэ телефонкIэ къы­зыпфытеохэкIэ, сыда анахьэу шъузытегу­щыIэрэр?

- Ныр - Ны. Ар зыгъэ­гумэкIырэр макIэп. Къысфэзэщы... Испаныбзэр зэзгъэшIагъэшъ, сиIофхэр нахьышIоу лъэкIуатэх.

- Уятэу Адамэ ятIонэрэ тренерэу зылъытэрэмэ саIокIэ.

Амир мэщхы, къысиIощтыр къызыщыригъэжьэщтыр ымышIэу къысщыхъугъ.

- Сятэ ишIуагъэкIи футболыр къыхэсхыгъэу сэлъытэ. Тренер хэхыгъэхэр зэрэсиIэхэр ешIэ, ащ пае къэсымыгъанэу упчIэ­жьэгъу сэшIы. Шъобж къыстыращагъэмэ, зэрэзгъэхъужьыщтыр къысиIоу бэрэ къыхэкIы.

- Уигухэлъ чыжьэхэм уакъытегущыIэ пшIо­игъоба?

- Дунаим щыцIэрыIо футболистхэм таIокIэ, тагъэгъуазэ. «Бар­селонэм» сыщешIэ сшIоигъу. Мыекъуапэ спорт псэуалъэу ща­шIырэмэ сагъэгушхо. Ти ЛIышъ­хьэу ТхьакIущынэ Аслъан ащкIэ сыфэраз. «Зэкъошныгъэм» пшъэрылъ инхэр зыфигъэуцужьхэу Урысыем изэнэкъокъу хэлэжьэ­нэу сыфай. Хэта зышIэрэр - сэри, Натхъо Бибарси «Зэкъош­ныгъэм» тыщешIэнэу уахътэ къытэкIункIи мэхъуба.

Зэфэхьысыжьым ычIыпI

Натхъо Амир зы гущыIэкIи къыхигъэщыгъэп, ау тэ къэтIон фаеу тэлъытэ «Барселонэм» ще­шIэнэу зеублэм, ежьым игукъэ­кIыкIэ, Адыгэ Республикэм фут­болымкIэ икIэлэцIыкIу-ныбжьыкIэ спорт еджапIэ щеджэхэрэм футбол шъуашэхэр, Iэгуаохэр къафищэфыхи, шIухьафтын къафишIыгъэх. Адыгеим икIыгъэ ныбжьыкIэхэу Мадрид кIуагъэхэм, щеджэхэрэм IэпыIэгъу афэхъу.

Адыгэ къэралыгъо университетым щеджэнэу Натхъо Амир чIэ­хьагъ. Сыд фэдэ сэнэхьат къыхихыщтми, цIыфышIу зэрэхъу­щтым, Адыгэ Республикэм ыцIэ лъагэу зыIэтыщтхэм зэращыщым тицыхьэ телъ. «Барселонэм» хэт тренерхэр, футболистхэр испа­ныб­зэкIэ зэдэгущыIэх. Бзэр умы­шIэу футболист дэгъу умыхъу­щтэу алъы­тэ.

ИмэфэкI мафэ Амир джырэбла­гъэ Мыекъуапэ щыхигъэунэфы­кIыгъ. ИIахьылхэр, ныбджэ­гъухэр къыфэгушIуагъэх. Мадрид шIэхэу ыгъэзэжьынышъ, «Барселонэм» щешIэщт. Опсэу, Амир! Уигухэ­лъы­шIухэр Тхьэм къыбдегъэ­хъух. Испанием ущыIэу адыгэ орэдхэм узэрядэIурэр тэшIэ. Насы­пышIо ухъунэу тыпфэлъаIо.

Адыгэ Макъ