Адыгеим ит Адыкъэкъалэ щыпсэурэ Нэхэе Юрэ лъэIу фэгъэзэныгъэ Урысые ЦIыф Хэфэсым ышIыгъ икIалэ къагъотыжьынымкIэ, ар «Ислъам Къэралыгъом» хэщагъэ мыхъунымкIэ IэпыIэгъу къыфэгъунхэу.
Хъулъфыгъэм интернетыми къихьэгъэ илъэIу зэритымкIэ, Нэхэе Юрэ икIалэрэ ишъхьагъусэрэ, ащ илъэс зыныбжь япшъэшъэ цIыкIрэ зэгъусэхэу Тыркуем шышъхьаIум и4 кIуагъэх, етIанэ Урысыем тазыр зыщытелъ купэу «Ислъам Къэралыгъом» гохьанхэм пае. Мурат янэ-ятэхэм къызэратхырэмкIэ, якIалэ Шъачэ загъэпсэфынэу кIохэу ариIуагъ. Ау ащ ыуж теоныгъэхэм джэуап къаримыты зэхъум гумэкIыгъохэр Нэхаехэм къыхагъэщыгъэх ыкIи Урысыем икъэралыгъо щынэгъончъэныгъэмкIэ къулыкъум зыфагъэзагъ.
Мы къэхъуныгъэмкIэ хъулъфыгъэм лажьэр тырелъхьэ якъуаджэ дэт мэщытым иефэндыгъэу Шэуджэн Юсыф. Илъэс 24 зыныбжь Нэхаем икIалэу Мурат мэщытым кIо зэпытыщтыгъэ 2008 илъэсым къыщежьэу. Сауд Аравиеми хьаджи щишIыгъ.
Ау 2012 илъэсым ямэщыт Къэрэщэе-Щэрджэсым дэт дин еджапIэр къэзыухыгъэ ефэндэу Шэуджэн Юсыф къызагъакIом ныбжьыкIэм иеплъыкIэхэр инэу зэхъокIыгъэ хъугъэхэу тым къыхегъэщы.
Ащ иныбджэгъухэм адэгущыIэныр зэпигъэугъэ, инэIуасэхэр мэкIэ-дэдэ хъугъэ, еIо ятэ. Ежь ны-тыхэми якIалэ икъафыщытыкIэ зэрэзэхъокIыгъэри ащ къыхегъэщы. Къэхъу-къашIэм мэзэ заулэкIэ ыпэкIэ ефэндэу Шэуджэныр Тыркуем кIожьыгъэу къаIо.
Адыгеим ис цIыф зырызхэм мы къэхъу-къашIэмкIэ лажьэр атыралъхьэ ежь ны –тыхэм, ясабый игъом лъыплъэнхэ, гъунэ лъафын фэягъэу. НэмыкI цIыфхэм гумэкIыгъо къыхагъэщы ащ фэдэ гупшысакIэ гъунэхэр ыпэкIэ зыщамгъэунэфыгъэгъэ Адыгеим джы ахэмэ апкъ къикIкIэ ныбжьыкIэхэр хэщагъэ зэрэхъугъэмкIэ.
Фитыныгъэ Радиом игущыIэгъугъэ бэдауш лэжьакIоу, Мыекъопэ Адыгэ Хасэм ипащэу Чундышко Заурбый къызэрэхигъэщрэмкIэ, мы къэбарыр зэбгырымыкIри Iофым щыгъуазэу щытыгъ. Ежьыр а шъолхырым икъуаджэкIэ щыщышъ, къэхъурэм щыгъуазэщтыгъэ.
Чундышко: Сэ къэбарэу сшIэрэмкIэ унэгъуи 4 мэ АдыгеимкIэ джаущтэу хэкур къабгынагъ ащ фэдэ гупшысакIэм къыхэкIкIэ. Ахэр Адыгэкъалэ щыщых. ЗыдэкIуагъэхэр сшIэрэп, ау янэ-ятэхэм къэбар къарамыIоу, адырэхэр ахэмэ алъыIэсышъухэрэп. Джы щытыкIэу щыIэмкIэ ныбжьыкIэхэм лъэшэу уафэсакъынэу щыт. Адыгэкъалэм джаущтэу дэсыгъэ ефэндэу Шэуджэн Юсыф чылэм дафыгъагъ сабыйхэр Iаеу зэригъэдаIохэрэм, зэрэдигъэхрэм пае.
Адыгеим щыIэ динлэжь шъхьаIэу Къардэнэ Аскэрбый къызэрэхигъэщрэмкIэ, Адыгеими Пшызэ шъолъырми ащыIэ ефэндхэм ащыщ горэри къыфаджэрэп «Ислъам Къэралыгъом» кIожьынхэу зыгори. Нэхаеми зыгорэм щеджэнэу ахэмэ изын гори фамытхыгъэу къыхегъэщы ащ.
Фитыныгъэ Радио, Щэрджэс Ларис