Бэгъушъэ Адам Черкес Мухьамэд
Адыгэ республикэм щылажьэрэ "Адыгэ Хасэ - Черкес Парламент" итхьэматэ Бэгъушъэ Адам къызэриIуагъэмкIэ Адыгеим щыIэ Адыгэ хасэмрэ Къэрэщай-Черкес республикэм щыIэ Адыгэ хасэмрэ дунае Адыгэ хасэ зыфаIорэм хэкIыжьыгъэх.
Интернет агенствэу "Кавказ Узылым" дыришIыгъэ зэдэгущыIэгъум Бэгъушъэм джыри къыщыIуагъ дунае хасэ зыфаIорэм итхьэматэ Сэхъурыкъо Хьэути зэфэныгъэ хэмылъэу зекIуагъэ ыкIи дунае хасэм хабзэу иIэхэр ыукъуагъэх.
Илъэс хъугъэу Бэгъушъэ Адамрэ Къэрэщай-Черкесым щыIэ "Адыгэ Хасэ - Черкес Парламент" итхьэматэу Черкес Мухьамэдрэ критикэ ашIы Сэхъурыкъо Хьаути илэжьакIэ ыкIи ар дунае хасэм итхьэматэу джыри зэ тебгъахьэу хъущтэп къаIуагъ. Ау ахэм къаIуагъэм емылъытыгъэу Iоныгъом и-19-м дунае хасэ зыфаIорэм изэфэсэу Нальщыч къыщырагъэкIокIыгъэм джыри зэ Сэхъурыкъор тхьэматэу хадзыжьыгъ.
Адыгэ Iофым пылъ цIыфбэмэ дунае хасэ зыфаIорэм мэхьанэ зэримыIэжьэр бэрэ къаIуагъ ыкIи къатхыгъ. ГущыIэм фэшъ, Егъан Ибрахим къыIуагъ дунае хасэ зыфаIорэр бэшъагъэ хъугъэу лIагъэ, 2000 илъэсым щегъэжьагъэу. Бгъанэ Алый къыIуагъ дунае хасэ зыфаIорэм хэтхэр зыфэлажьэхэрэр Адыгэ лъэпкъыр арэп, хэгъэгоу зыщыпсэухэрэм яхьыкумэхэр ары зыфэлажьэхэрэр. Джащ фэдэуи Къэбардэ Анзорырэ Джамырзэ Аланрэ къаIуагъ ыкIи джырэ благъэ Дунае Адыгэ хэсакIэ зэхащэщтэу къаIуагъ.
КъэIогъэн фае, дунае Адыгэ хасэ зыфаIорэм хасэу хэт пстэури зэгъусэхэу цIыф мин 10 -м тэкIу ехъу неIэп ахэтыр. Ащ фэдизнахь зыхэмыт хасэм фитыныгъэ иIэп милион 5 хъурэ лъэпкъым ицIэкIэ гущыIэнэу.