Пэтхъу-Iутхъумрэ гриппымрэ республикэр зэрэзэлъакIурэм ыпкъ къикIыкIэ щылэ мазэм и 21-м къыщыублагъэу гъэсэныгъэм иучреждениеу итхэр зэкIэ зэфашIыгъэх, и 30-м нэс пIалъэу афагъэуцугъагъ.
Ащ нэужыми мы зэпахырэ узхэр къызэузыгъэхэм япчъагъэ лъэшэу хэхъуагъ. Непэ псауныгъэм икъэухъумэнкIэ Министерствэм къызэритырэмкIэ, нэбгырэ 7737-мэ къяузыгъэу агъэунэфыгъ. Ахэм ащыщэу 270-р ары гриппыр къызэолIагъэр. Илъэсыр къызихьагъэм къыщыублагъэу пневмониемрэ гриппымрэ апкъ къикIыкIэ нэбгырэ 11 дунаим ехыжьыгъ.
БлэкIыгъэ тхьамафэм ыужырэ мафэхэр ары нахь жъугъэу цIыфхэм мы узхэр къяолIагъэхэу, IэпыIэгъу псынкIэм къызеджагъэхэу агъэунэфыгъэр. Роспотребнадзорым АР-мкIэ и ГъэIорышIапIэ къызэритыгъэмкIэ, мы тхьамафэу икIырэм къыкIоцI пстэумкIи нэбгырэ 3718-мэ пэтхъу-Iутхъумрэ гриппымрэ къяузыгъэу агъэунэфыгъ. Ахэм ащыщэу 126-р ары гриппыр къызэолIагъэр. Арэу щытми, Iофхэр нахьышIу зэрэхъугъэхэм, къызэуалIэхэрэм япчъагъэ къыщыкIагъэу зэрагъэунэфыгъэр кIагъэтхъыгъ. Ащ ыпкъ къикIыкIэ, еджапIэхэмрэ кIэлэцIыкIу IыгъыпIэхэмрэ къызэIуахыжьыщтхэмэ хьауми карантиныр лъагъэкIотэщтымэ АР-м псауныгъэм икъэухъумэнкIэ и Министерствэрэ Роспотребнадзорымрэ мэфитIу фэдизым Iоф дашIагъ.
Роспотребнадзорым АР-мкIэ и ГъэIорышIапIэ иврач шъхьаIэу Сергей Завгороднем тыгъуасэ къызэрэтиIуагъэмкIэ, гъэсэныгъэм иучреждениеу зэфашIыгъэхэр мэзаем и 4-м къызэIуахыжьынхэр игъоу алъытагъ. Ау еджапIэхэмрэ кIэлэцIыкIу IыгъыпIэхэмрэ санитарнэ шапхъэхэм атетэу мафэ къэс агъэкъэбзэнхэу, пчэдыжь къэс кIэлэцIыкIухэм япсауныгъэ изытет ауплъэкIунэу, нэужми алъыплъэнхэу учреждениехэм япащэхэм афагъэпытагъ.
Адыгеим исанитарнэ врач шъхьаIэ къызэриIуагъэмкIэ, кIэлэцIыкIоу пэтхъу-Iутхъумрэ гриппымрэ къызэуалIэхэрэм япчъагъэ нахь макIэ хъугъэ.
ХЪУТ Нэфсэт