Хъуадэ Аднан: Адыгэ республикэм мэлылъфэгъум и 25-м адыгэ лъэпкъ ныпырэп зимафэ хагъэунэфыкIырэр


Адыгэ быракъым имафэ апэу 2010-рэ илъэсым хагъэунэфыкIыгъ. А лъэхъаным Хьэпэе Арамбый зыщитхьэмэтагъэ Адыгэ Хасэм и совет сэри сызэрэхэтыгъэм непэ сегъэгушIо. Ащ къыкIэлIыкIорэ илъэси 4-м Адыгэ быракъым имафэ адыгэу дунаем тет пстэуми аштагъ.

Сызыхэт купэу Адыгэ Хэкупсэхэр зыфиIорэми лъэпкъ быракъым имафэ Тыркум ыкIи пэмыкI къэралыгъохэм щыхагъэунэфыкIыным ишъыпкъэу дэлэжьагъ. 

2014-рэ илъэсым Адыгэ Республикэм апэрэу официальнэу быракъым имафэ щыхагъаунэфыкIыгъ. Ау ыцIэ официальнэу «Адыгэ Республикэм икъэралыгъо быракъым имафэ» хъугъэ.

Шъыпкъэ ар республикэм иофицальнэ быракъ. Ау ар хабзэу щыIэхэмкIэ официальнэу зымыштэшъущт тилъэпкъэгъухэу Къэбэртае-Бэлъкъэр ыкIи Къэрэщае-Щэрджэс республикэм исхэм сыдыцIа фаусыщтыр? ПэмыкI крайхэми, хэкухэми арысхэм сыда раIощтыр? Хьаури ахэр джы Адыгэ бэракъым имафэ хагъэунэфыкIынэу фимытыжьы хъугъэха? Ар официальнэу зэрэхамгъэунэфыкIышъущтыр гъэнэфагъэ. 

Адыгэ Республикэм ар официальнэу зештэм Къэбэртэе-Бэлъкъар республикэм сыд ыIони ар официальнэу ышIыныя? 

Адыгэ Бэракъым и мафэ апэу хасэм къызэрэрихьыжьэгъагъэм фэдэу къэнэжьыгъагъэмэ нахь дэгъугъэба? УрысыбзэкIэ къапIоми «День Черкесского Флага». Ащ фэдэ цIэ иIагъэмэ адрэ ткъош республикэхэми нахь штэгъэшIу афэхъуныеба?

Джащ фэд ятIонэрэу зигугъу сшIынэу сызфаери. «Адыгэ шъуашъэм и маф» зигугъу сшIырэр.

Ари хасэм къырихьыжьи гъогу занкIэм тыригъэуцогъагъ. Ау ти республикэ и хабзэихъухьэхэм ари ауцIэпIын алъэкIыгъ. Ари официальнэу хагъаунэфыкIынэу зырагъажьэм Адыгэ шъуашъэм имымэфэжьэу «Лъэпкъ шъуашъэм имафэ» хъужьыгъэ.

Ащ къикIырэр республикэм ис лъэпкъ пстэури а мафэм ежь и лъэпкъ шъуашъэ зыщилъэни къытехьан ылъэкIыщт. Ахэмэ зыщарэмылъ сIорэп. Ау «Адыгэ шъуашъэм и мафэ» тэдэ хъугъэу ара джы?

Къэбэртаехэми Iоныгъом и 20-м «Адыгэмэ я маф» – «День Черкесов» къызэраугупшысыгъэми урегъэугупшысэ. Сыд шIуа мыхэмэ агу къэкIыгъэри. Апэу лъэпкъ аIони етIанэ ашрай яшIыжьыщтми сшIэрэп.

Сыд хъугъэми, хэт ыуIушыгъэми адыгэ лъэпкъыпсэхэм хъурэри шIэрэри алъэгъу ыкIи къагурэIо. Куцэр теуцогъу теуцогъу аIуагъ.