Жэпуэгъуэм и 28-м Бразилием и Сальвадоре къалэм щиухащ дзюдомкIэ командэхэм я дунейпсо чемпионат. Урысей Федерацэм и гуп къыхэхам хэту абы дыщэ медалхэр къыщахьащ Къуэдзокъуэ Муратрэ Хьэбэчыр Муратрэ.
Урысей Федерацэм и командэ къыхэхам зэкIэлъхьэужьу Украинэр, Бразилиер, Корее Ипщэр хигъащIэри, финалым нэсащ. Абы хьэрхуэрэгъу къыщыхуэхъуащ Японием и дзюдоист лъэщхэр. АрщхьэкIэ ди щIалэхэр къикIуэтакъым икIи дыщэ медалхэр зыIэрагъэхьащ.
Дунейпсо чемпион хъуа Урысей Федерацэм и командэ къыхэхам и щIыхьыр яхъумащ ди лъахэгъухэу Къуэдзокъуэ Муратрэ (килограмм 73-м нэс зи хьэлъагъхэм я деж щыбэнащ) Хьэбэчыр Муратрэ (килограмм 81-м нэс). Ахэр я зэIущIэ псоми щытекIуащ.
Зи гугъу тщIы зэхьэзэхуэм дыжьын медалхэр къыщахьащ японхэм. Жэзыр зэдагуэшащ Бразилиемрэ Куржымрэ я командэ къыхэхахэм.
Ди къэралым апхуэдэ ехъулIэныгъэ япэу зыIэригъэхьауэ аращ. Нэхъапэм Урысей Федерацэм дзюдомкIэ и командэ къыхэхар етIуанэ увыпIэм зэи фIэкIыфакъым.
Жыласэ Заурбэч
Адыгэ Псалъэ