Адыгеим и Премьер-министрэ министерствэхэм япащэхэм зэIукIэгъу адыриIагъ
ЗэIукIэгъоу тыгъуасэ щыIагъэм отраслэхэм апашъхьэ ит пшъэрылъхэр зэрагъэцакIэрэм щытегущыIагъэх. Адыгеим и Премьер-министрэу КъумпIыл Мурат гриппымкIэ ыкIи пэтхъу-IутхъумкIэ эпидемиологие Iофхэм язытет шъхьафэу къыщыуцугъ.
Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем къызэриIуагъэмкIэ, гриппыр къямыутэлIэным пае нэбгырэ мини 110-мэ вакцинэ зыхарагъэлъхьагъ, зэкIэ республикэм исхэм япроцент 25-рэ ар мэхъу. Арэу щыт нахь мышIэми, зэпахырэ узхэр къямыгъэутэлIэгъэнхэмкIэ Iофхэр джыдэдэм къэхьылъагъэх. БлэкIыгъэ илъэсым джащ фэдэ илъэхъан егъэпшагъэмэ, гриппымрэ пэтхъу-Iутхъумрэ къызэутэлIагъэхэм япчъагъэ мыгъэ фэдитIукIэ нахьыб.
Инфекционнэ сымэджэщым зыщяIэзэхэрэ нэбгырэ 71-мэ вирусэу H1N1-р къахагъэщыгъ, ахэм ащыщэу процент 20-р — кIэлэцIыкIух. Гриппым къыздихьыгъэ узхэм нэбгыри 5 арылIыкIыгъ. Вирусэу H1N1-м къыпкъырыкIыгъэ тхьабыл узым зы нэбгырэ илIыкIыгъ. Сымаджэхэм ядунай ахъожьыныр нахьыбэрэмкIэ къызхэкIырэр игъом медицинэм иIофышIэхэм зызэрафамыгъэзагъэр, яуз зэрэхагъэужъыныхьагъэр ары.
Нэбгырэ 900-м ехъумэ гриппымрэ пэтхъу-Iутхъумрэ къяутэлIагъэу агъэунэфыгъ. Чэщ-зымафэм IэпыIэгъу псынкIэм икъулыкъу иIофышIэхэр сымэджэ 400 фэдизмэ алъэIэсы. НахьыбэрэмкIэ ахэр плъыр-стыр узхэм агъэгумэкIых. Сымаджэхэм азыныкъо нахьыбэмэ вакцинэ зыхарагъэлъхьагъэп.
— КIэлэцIыкIухэр жъугъэу зыхэлэжьэрэ Iофтхьабзэхэр нахь макIэу зэхэщэгъэн фае. Iофым изытет дэй дэд пIон плъэкIыщтэп, ау пэшIорыгъэшъ Iофтхьабзэхэу зэрахьэхэрэр агъэлъэшын фае. Псауныгъэр къэухъумэгъэнымкIэ Министерствэр илъэсым ыкIэхэм адэжь цIыфхэм нахьыбэу вакцинэ зыхарагъэлъхьаным лъыплъэн фае. Джыдэдэм анахь шъхьаIэр цIыфхэм агу амыгъэкIодыныр, Iэзэгъу уцэу ящыкIагъэм фэдиз щыIэмэ зэгъэшIэгъэныр, узхэм язэрарэу къэкIон ылъэкIыщтыр нахь макIэ шIыгъэныр ары, — къыIуагъ КъумпIыл Мурат.
Джащ фэдэу эпидемиологическэ комиссием изэхэсыгъо зэхащэнэу, унашъоу аштагъэхэр муниципальнэ образованиехэмрэ ведомствэхэмрэ япащэхэм алъагъэIэсынэу пшъэрылъ афишIыгъ.