Адыгэ шъуашэм и Мафэ Iоныгъом и 28-м Мыекъуапэ ипчэгу шъхьаIэу Лениным ыцIэ зыхьырэм щыкIощт. ЗэхэщэкIо купым хэтхэм бэрэскэжъыем зичэзыу зэхэсыгъо яIагъ.
Зэгъэпшэнхэр ашIызэ зэIукIэм къыщыгущыIагъэх Адыгэ Республикэм культурэмкIэ иминистрэу Чэмышъо Гъазый, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, Адыгэ Хасэм итхьаматэу Бэгъушъэ Адам, АР-м и Къэралыгъо Академическэ ансамблэу «Налмэсым» ихудожественнэ пащэу Къулэ Мыхьамэд, зэхэщэн Iофыгъохэм ахэлэжьэхэрэ МэщфэшIу Нэдждэт, Нэгъуцу Аслъан, нэмыкIхэри.
Адыгэ Хасэмрэ ансамблэу «Налмэсымрэ» адыгэ шъуашэм и Мафэ кIэщакIо фэхъугъэх. А. Бэгъушъэмрэ М. Къулэмрэ къызэраIуагъэмкIэ, Iофтхьабзэр игъэкIотыгъэу зэхащэщт. Къош республикэхэм, гъунэгъу Краснодар краим къарыкIыщтхэм зэзэгъыныгъэхэр адашIых. Адыгэ шъуашэр Кавказым щыпсэурэ лъэпкъхэми ащыгъ, лъэпкъ пэпчъ ежь иеу шъуашэм зэхъокIыныгъэхэр хелъхьэх. Къэзэкъхэм ащыгъ шъуашэри адыгэмэ къаугупшысыгъэм тырашIыкIыгъ.
Тарихъ къэбарэу адыгэ шъуашэм пылъыр цIыфхэм нахьышIоу ашIэным пае шIэныгъэлэжьхэр, Iофым хэшIыкI ин фызиIэхэр зэхахьэм къыщагъэгущыIэщтых. Къэзэкъхэм ащыгъ шъуашэри ащ къыщагъэлъэгъощт. Пчыхьэзэхахьэм хэлэжьэщтхэм яшIэныгъэ хагъэхъоным, гъэшIэгъонэу загъэпсэфыным афэшI зэхэщакIомэ къыдалъытагъэр макIэп. Зэнэкъокъухэр яIэщтых, дэгъухэм анахь дэгъужьхэм шIухьафтынэу лъэпкъ Iэпэщысэхэр афашIыщтых.
Дунаим тилъэпкъэгъоу тетмэ Iоныгъом и 28-м адыгэ шъуашэм и Мафэ илъэс къэс хагъэунэфыкIыным зэхэщакIохэр пылъых. Пчыхьэзэхахьэм тиартист цIэрыIохэр, ансамблэу «Налмэсыр», нэмыкIхэри хэлэжьэщтых. Адыгэ джэгукIэ зэхахьэр аухыщт.
Сахьидэкъо Нурбый
Адыгэ Макъ