Сирием щыщ Адыгэ нэбг 400 фэдиз яцIэхэр чIэдзэжьыгъэу лъэIу тхьылъ УФ, Адыгэ Республикэхэм ыкIи Адыгэ хасэхэм япащэхэм къафагъэхьыгъ Адыгэ Хэкум ащэжьынхэу.
Адыгэ Республикэхэр, Дунае Адыгэ Хасэр ыкIи Адыгэ организацие зэфэшъхьэфхэр Сирием щыщ Адыгэхэм IэпыIэгъу тафэхъущт къаIуагъ ыкIи УФ мы Iофым къыхэлэжьэнэу зыфагъэзагъ. Непэ нэс Урысие-Федерацием ипащэхэм зи къаIуагъэп, Iофым дэлажьэха дэмылажьэха зи къэбар щыIэп.
УФ зи къызэримыIорэм къыхэкIэу Адыгеим ит «Адыгэ Хасэ Черкес Парламент» зыфиIорэм Мэзаим и 11 лъэпкъ зэфэс Мыекъуапэ щишIынэу рихъухьагъ ау мы зэфэсым ехьылIагъэу ОО «Адыгэ Хасэ» итхьэматэу ГъукIэлI Налбыерэ ОД «Черкес Конгресс» итхьэматэу Бэрзэдж Муратрэ джэпсалъэ къатыгъэм къыщаIо лъэпкъ зэфэс зэхищэнэу фитыр 2006 илъэсым лъэпкъ зэфэсэу Мыекъуапэ щыIагъэм «Зэзгъафэрэ Комитет» къыхадзыгъагъэр ары.
Тыгъуасэ Адыгэ Республикэм ипрезидент Тхьэкущынэ Аслъан «Адыгэ Хасэ Черкес Парламент» исовет IукIэгъагъ, къэшIэгъуаеп Тхьэкущынэм къариIуагъэр, джыдэдэм лъэпкъ зэфэс ищыкIагъэп, мары тэ УФ тыдэлажьэ.
Тыгъусэ ныбжьыкIэ куп интернетым тхьапэ чIэдзын къыхадзагъ, ар Сирие Адыгэхэм ехьылIагъ, УФ ипрезидент едаух мы Iофым къыхэлэжьэнэу.
Шъыпкъэр пIощтмэ мы Адыгэ купэу ипшъэкIэ къэсытхыгъэ пстэури Сирие Адыгэхэм афэгумэкIых ау тхьапэ тхыгъэ закъокIэ икъурэп, тхьапэм ичIыб кIуакIэ щыIэнэу щыт.
КIуакIэ щыIэным фэшъкIэ мыщ фэдэ екIолIакIэр хъущтэу сэлъытэ:
Мэзаим и 11 лъэпкъ зэфэс Мыекъуапэ щыIэн фае ыкIи мы мафэм дунаем тет Адыгэ Организацие пстэуми зэфэсхэр ашIын фае. Тыды щыIэ организацие ежь зыдэщыIэ чIыпIэп, (къалэ, къуаджэ, хасэ) зэфэс зэхищэнэу щыт. Мы зэфэсэу щыIэщтхэм цIыфбэ къырашэлIэнэу щыт ытIанэ анахь макIэу Iоф тIу щы зэдращтэн фае, апэу Сирие Адыгэхэм яфэшъкIэ Фондхэр зэхащэщт ыкIи ахэр занкIэу мэлажьэу аублэщт. ЯтIуанэрэр зэфэсым цIыф тIу щы игъэнэфэщт мафэ къэс Сирие Адыгэхэм ехьылIагъэу Iоф драшIэнэу. Джащ фэдэу тыда щыIэ организацие зылажьэкIэ тхьапэхэм кIуакIэ яIэу хъущт ыкIи Сирие Адыгэхэм IэпыIэгъу тафэхъун тылъэкIыщт.
Гунэ Нарт