Мафэ заулэ ипэкIэ Адыгэ Республикэм щылажьэрэ движениеу «Адыгэ Хасэ Черкес Парламент» итхьэмэтагъэу Хьэпае Арамбый джэпсалъэ къишIыгъ, ащ къыщеIо Хасэм итхьэматэ Iэнатэ зыфыIукIыжьыгъэм шъхьэусыгъэу шъхьэIэу фэхъугъэр Адыгэ Республикэм ихьыкумэт (власт) лъэпкъ Iофхэм зэрадэмылажьэрэр ары. Ащ нэмыкIэу Хьэпаем джэпсалъэм къыщыхегъэщы Адыгеим ипрезидент Тхьакущынэ Аслъан Адыгэ Хэгъэгум, Урысие Федерацием я Конституциехэм уасэ зарафимышIырэм пае, Iоф зэрэдэшIэгъуаер.
Хьэпаем джэпсалъэу къишIыгъэм итып Адыгэ Iофэу хьыкумэтым рихьылIагъэхэр, ащ пае тэ зэрэтшIэу Хасэм Адыгэ Iофэу хьыкумэтым рехьылIагъэхэу ымыгъэцэкIагъэхэр къызэкIэлъыкIэу мары:
- Урыс-Адыгэ заом Адыгэу хэкIодагъэхэм я саугъэт зэрамыгъэуцугъэр.
- Урыс-Адыгэ заом Урыс дзэм итхьэматэу Романовэм исаугъэт Адыгеим ит къуаджэу Победа зыфиIорэм зэрэфыщагъэуцугъэр.
- Адыгеим ит чIыпIэ зэфэшъхьэфхэм гъукIыкIэ шIыгъэ ыкIи метырэ заулэ зикIыхьыгъэ КЪАЩхэр зэрагъэуцухэрэр.
- АдыгеимкIэ Адыгабзэм изэгъэшIэнкIэ сыхьат пчъагъэхэр еджапIэхэм нахь макIэу зэрашIыгъэхэр.
- Косово къиращыжьыгъэ Адыгэхэм ащыщ унагъо заулэ непэ нэс унэхэр зэрэфамышIыгъэхэр.
- Адыгеим ипрокорор Адыгеим щылажьэ Адыгэ организациехэм къызэрадаозэптыэрэр ыкIи ахэр зэфишIыжьынхэу зэрэдэлажьэрэр.
- Адыгеим ипезидент IэнатIэ цIэу ихьырэр лъэпкъым емыупчIыжьыхэу зэрэзэблахъугъэр.
Мы Iофэу къэттхыгъэхэм ехьылIагъэу ыкIи нэмыкIхэр Хьэпае Арамбый Адыгеим ихьыкумэт бэрэ зафигъэзагъ ау хьыкумэтым зи ышIагъэп пIоми ухэукъощтэп. Хьэпаем мы Iофхэм екIолIакIэу фриIагъэр къызэриIощтыгъэмкIэ мы Iофхэр Республикэ Iофых, ахэр Адыгэ Хасэм изакъоу игъэцэкIэнхэ илъэкIыщтэп. Мыщ фэдэу Iофхэр лъымыкIуатэу зыхъукIэ сыд шIэгъэн фаер? Сэ сыеплъыкIэкIэ ащ укъыщыуцоу хъущтэп, хьыкумэтым (влась) Iоф ымышIэу зыхъукIэ ар къеплъэшъохынэу Iоф дэпшIэщт.
Гунэ Нарт