ЩIэжокъуэ Зафер, егъэджакIуэ, Тыркум, Анкара къалэ.
Адыгэбзэр махуэ къэс нэхъ яIэщIэхужу хуежьа Тыркум щыпсэу адыгэхэр иджы я хэкужьым кIуэурэ я анэдэлхубзэр зэрагъэщIэжыну хэтщ. Зы мазэкIэ Къэбэрдей-Балъкъэрым и къалащхьэ Налшык къалэ щыIэну щIалэгъуалэр щэбэт махуэм къэсащ. Ахэр къэзыша, Тыркум щыщ ЩIэжокъуэ Зафер Iуэхум дыщигъэгъуазэну доупщl.
ЩIэжокъуэ Зафер: Тыркум Анкара дыкъыкIауэ зы гуп дохъур. Налшык адыгэбзэм елэжьыну, зэрагъэщIэну зы мазэкIэ курс къащтэну къэкIуауэ аращ.
Мазих ипэкIэ иджыри хэкум къэзыгъэзэжа бзылъхугъуитIым зыкъытпащIат «дэ хэкум зы гуп къедгъэблагъэну дыхуейщ, я бзэр зэрагъэщIэжын, я хэкур къалъагъун щхьа» жаIэри.
Абы ипкъ иткIэ дыкъэкIуауэ аращ. Мыбдеж университетри абы ехьэлIауэ къыддоIэпыкъу, егъэджакIуи, курсым папщIэ пэши къыдатащ. Тхьэр арэзы къахухъу. Мы гупым яхэтщ си деж адыгэбзэм тIэкIу хуеджа, щыгъуази. Зыри зымыщIэ зыщыплIи яхэтщ.
Зы мазэм икIуэцIым зи тыркубзэ зэхамыхыу, я анэдэлъхубзэ защIэм сыт къахуихьынуми сэ ари слъагъуну схуейщ. Абы нэмыщI Тыркум деж унэм укъыщIэкIам зэикI адыгэбзэ щызэхэпхынукъым. Мыбдеж машынэ уитIысхьэми, тыкуэными, дэни уи бзэ щызэхэпхынущ, ар куэд и уасэщ. Япэ я адэжь щIыналъэ къэкIуэжа мы гупыр Налшык къыщынэсам абы я нэгум илъа гуфIэр, зэикI тщыгъупщэжынукъым. Тыркум кIуэжа нэужьи я ныбжьэгъу сытхэри трагъэгушхуэнущ, я нэгу щIэкIахэр абы жраIэжынущ. Мис апхуэдэ фIыгъуэхэри къытхуихьыну догугъэр.
ЩIалэгъуалэр адыгэбзэ курсым къыщыдэхуэ зэманхэм я адэжьхэр къыздикIа щIыналъэр къакIухь, я унэкъуэщ, я благъэхэри къалъыхъуэж.
Емуз Баязыт, Хуитыныгъэ Радио, Къэбэрдей-Балъкъэр, Налшык