Адыгэхэм я ИлъэсыкIэ шъукъеблагъ
Пэсэрэ лъэхъаным адыгэмэ ИлъэсыкIэр гъэтхэпэ мазэм и 21-м агъэмэфэкIыщтыгъ. Ащ фэгъэхьыгъэ зэхэхьэ гъэшIэгъонхэр зэхащэхэу шэнышIу афэхъугъагъ.
Адыгэмэ я ИлъэсыкIэ шэмбэтым игъэкIотыгъэу хэдгъэунэфыкIыщт. КъурмэнкIэ зэхахьэр сыхьатыр 9-м аублэщт. Мафэм сыхьатыр 2-м Гавердовскэм дэт IофшIапIэу «Нанэм» ИлъэсыкIэм диштэрэ Iофтхьабзэхэр щылъагъэкIотэщтых. ПщэрыхьакIохэм мэфэкI Iанэм къытырагъэуцощтхэ адыгэ шхыныгъохэр агъэхьазырыщтых. Хьалыжъохэри, щэламэхэри, нэмыкIхэри щагъэжъэщтых. ИлъэсыкIэм икъэбархэр къыщаIотэщтых. IорыIуатэхэр гущыIэ щэрыохэр агъэфедэхэзэ, ясэнаущыгъэ къагъэлъэгъощт. Творческэ объединениеу «Ошъадэм», къалэмрэ республикэмрэ яартистхэм концерт къатыщт, лъэпкъ къашъохэр къашIыщтых, уджыщтых. IэпэIасэхэм яIофшIагъэ, адыгэ Iэмэ-псымэхэр къыщагъэлъэгъощтых.
КIэлэцIыкIухэр, зыныбжь хэкIотагъэхэр мэфэкIым зэфищэщтых. Общественнэ движениеу «Адыгэ Хасэм» культурэмкIэ икомитет ипащэу, шIэныгъэлэжьэу Шъхьаплъэкъо ГъучIыпсэ, археолог цIэрыIоу, Урысыем ижурналистхэм я Союз хэтэу Тэу Аслъан, общественнэ Iофыгъохэм чанэу ахэлэжьэхэрэ Болэкъо Аслъанрэ Къуижъ Къэплъанрэ тызэрэщагъэгъозагъэу, тирайонхэм ащыпсэухэрэр, IэкIыб хэгъэгумэ къарыкIыгъэ тилъэпкъэгъухэр, урысхэр, къэндзалхэр, урымхэр, ермэлхэр, нэмыкIхэри ИлъэсыкIэм епхыгъэ зэIукIэгъухэм ахэлэжьэщтых. Чъыгхэр, зыщыджэгущтхэ чIыпIэхэр агъэдэхэщтых.
Адыгэ Республикэм и Лъэпкъ театрэу Цэй Ибрахьимэ ыцIэкIэ щытым иартистхэм театрализованнэ едзыгъор дахэу къашIыщт. Режиссерэу Хьакъуй Аслъан япащэу адыгэ шэн-хабзэхэр къагъэлъэгъощтых. ГущыIэм пае, яжьэр пчъэIум Iуатэкъощт - удхэр унэм къимыхьанхэм фэшI. Лыр агъажъэ зыхъукIэ шэн-хэбзэ гъэшIэгъонхэр зэрахьащтых, ижъырэ адыгэ джэгукIэхэр зэхащэщтых. Бахъсымэр Iанэм къытырагъэуцощт, ИлъэсыкIэм фэгъэхьыгъэ хъохъухэр къаIощтых.
Шъукъеблагъэх адыгэмэ я ИлъэсыкIэ.
ЕмтIылъ Нурбый.
Сурэтхэм адыгэмэ ИлъэсыкIэр зэрагъэмэфэкIырэр къаIуатэ.
Адыгэ Макъ
Налщыч
Налщыч