Адыгэ республикэм щыIэ общественнэ движениеу «Адыгэ Хасэ Черкес Парламент» изэфэхьысыжь конференцие бэдзэогъум и 5-м Мыекъуапэ дэт Къэралыгъо филармонием щыкIуагъ. Правительствэм, Парламентым ялIыкIохэр, лъэпкъ Iофыгъомэ адэлажьэхэрэр, Краснодар краим, Москва, нэмыкIхэм къарыкIыгъэхэр, Хэкужъым къэзыгъэзэжьыгъэ тилъэпкъэгъухэр, нэмыкIхэри зэхахьэм хэлэжьагъэх.
Адыгэ Хасэм и Устав къызэрэщыдилъытэрэм тетэу, аужрэ илъэсрэ ныкъорэм къыкIоцI япшъэрылъхэр зэрагъэцэкIагъэхэр зэхахьэм щызэфахьысыжьыгъэх, щыIэныгъэм къыпкъырыкIырэ Iофыгъохэм зэрадэлажьэхэрэм, нэмыкIхэм атегущыIагъэх. Адыгэ Хасэм итхьаматэу Бэгъушъэ Адамэ къызэриIуагъэмкIэ, адыгабзэм, лъэпкъ культурэм, тарихъым, ныбжьыкIэхэм ягъэсэн, Хэкужъым къэзыгъэзэжьырэ тилъэпкъэгъухэр щыIэныгъэм хэгъэгъозэгъэнхэр, нэмыкI Iофыгъохэр хасэм инэплъэгъу сыдигъуи итыгъэх, тапэкIи итыщтых.
Кавказ заор заухыгъэр илъэси 150-рэ, Хэгъэгу зэошхом ТекIоныгъэр къызыщыдахыгъэр илъэс 70-рэ зэрэхъугъэхэм афэгъэхьыгъэу чъыг 220-рэ псэупIэу Гавердовскэм дэжь, автомобиль гъогум ыпашъхьэ, щагъэтIысхьагъ - зэкIэри чъыгаех. Адыгэ Хасэм иныбжьыкIэ къутамэ икIэрыкIэу зэхащэжьыгъ. Хэкужъым къэзыгъэзэжьыгъэхэр адыгабзэкIэ щырагъаджэх, пащэр ЛIышэ Хьалимэт. Адыгэ Хасэм культурэмкIэ икомитет итхьаматэр Шъхьаплъэкъо ГъучIыпс. Комитетым хэтхэм гуетыныгъэ ахэлъэу Iоф зэрашIэрэм ишIуагъэкIэ, адыгэ шъуашэм, адыгэ быракъым, лъэпкъ шэн-хабзэхэм афэгъэхьыгъэ зэхахьэхэр дэгъоу зэхащэх.
Щытхъу къыхьыным пае Адыгэ Хасэр лажьэу къызыщыхъурэмэ зэрадыримыгъаштэрэр Бэгъушъэ Адамэ хигъэунэфыкIыгъ. Олимпиадэ джэгунхэу Шъачэ щыкIуагъэхэм Адыгэ Хасэр апэшIуекIощтыгъэу зылъытэхэрэр хэукъохэу А. Бэгъушъэм ылъытагъ.
Узэкъотмэ - улъэш
Хэкужъым къэзыгъэзэжьырэ тилъэпкъэгъухэм якъиныгъохэр нахь макIэ шIыгъэнхэм, ячIыгу къекIужьыгъэхэр щыIэныгъэм хэгъэгъозэгъэнхэм Адыгэ Хасэр зэрэпылъым Бэгъушъэ Адамрэ Хэкужъ Адам-рэ къытегущыIагъэх. Тилъэпкъэгъухэм ящыкIэгъэ тхылъхэм ягъэхьазырынкIэ, IэкIыб къикIыгъэ студентхэм яегъэджэнкIэ упчIабэ къызэрэтэджырэр шъэфыжьэп. Ащ фэдэ гумэкIыгъохэм къатегущыIагъэмэ лъэпкъхэр зэпигъэуцунхэу, бырсыр къытхилъхьанэу зы нэбгыри къахэкIыгъэп.
Адыгэ Республикэм и Парламент и Комитет итхьаматэу Мырзэ Джамбэч иеплъыкIэхэм уагъэгъуазэ. Ащ зэрилъытэрэмкIэ, адыгэ шъуашэм, адыгэ быракъым, нэмыкI лъэпкъ Iофыгъохэм яхьылIэгъэ унашъохэр Парламентым ыштэхэ зэхъум, тимылъэпкъэгъухэри Iофым чанэу хэлэжьагъэх. Узэкъотмэ - улъэш. Ар щыIэныгъэм къыщэлъагъо. Iофым хэшIыкI икъу фызимыIэхэм зыгорэхэр аубыхэу, цIыфхэр агъэплъэхъунхэм ищынагъо къызыдахьэу къызэрэхэкIырэм уегупсэфылIэ мыхъущтэу Дж. Мырзэм ылъытагъ. Сэхъутэ Аскэр, ЦIыкIу Аслъан, Щэрджэс Мыхьамэт, нэмыкI хьакIэхэр къэгущыIагъэх.
Рэхьатныгъэр къаухъумэщта?
Зэхахьэм къыщыгущыIагъэхэм, зэкI пIоми хъунэу, анахьэу зыдырамыгъэштагъэр «Добровольнэ народнэ дружинэхэр» зыфиIорэм язэхэщэн къыпкъырыкIырэ Iофыгъохэр ары.
Адыгеим и Парламент иапэрэ еджэгъу ащ щытегущыIагъэх, къыкIэлъыкIощт зэхэсыгъохэм ащыщ хэушъхьафыкIыгъэу унашъо щаштэщт. Ащ фэдэ дружинэхэр Краснодар краим, Урысыем ишъолъырхэм ащызэхащагъэх. Дунаим щызэлъашIэрэ тхакIоу, къэралыгъо шIухьафтынхэр къызыфагъэшъошагъэу МэщбэшIэ Исхьакъ лъэпкъхэм яшэн-хабзэхэр къыдилъытэхэзэ, народнэ дружинэхэр нахьыпэкIэ хэгъэгум зэрэщызэхащэщтыгъэм опытэу къыхэпхын плъэкIыщтыр къыхигъэщыгъ.
Къэзэкъ шъуашэр зыщыгъ дружинникым адыгэ шъуашэр зыщыгъыр гобгъэуцоу рэхьатныгъэм икъэухъумэн зыфэбгъазэхэкIэ, шIуагъэм ычIыпIэкIэ гумэкIыгъохэр къыхэкIынхэ ылъэкIыщтэу МэщбэшIэ Исхьакъ къыIуагъ. Ащ къыдезыгъэштагъэхэм ащыщых Мырзэ Джамбэч, Нэгъуцу Щамсудин, Хэкужъ Адамэ, Къуижъ Къэплъан, Тхьаркъохъо Сафыет, Шъхьаплъэкъо ГъучIыпсэ, Талъэкъо Адамэ, Болэкъо Аслъан, ЦIыкIушъо Аслъан, Нэхэе Аслъан, нэмыкIхэри. Iофым ыгъэгумэкIхэу къэгущыIагъэх Къулэ Амэрбый, Iэшъынэ Адамэ, Къэбэртэе Аскэр, фэшъхьафхэри.
Адыгэ Хасэм и Совет зичэзыу зэхэсыгъоу иIэщтым а Iофыгъом игъэкIотыгъэу щытегущыIэнхэу зэIукIэм унашъо щаштагъ.
Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр адыгабзэм изэгъэшIэнкIэ тхылъхэр къызэрэдагъэкIыхэрэм, Тыркуем, нэмыкI хэгъэгумэ арыс тилъэпкъэгъухэм адыгэ литературэр аIэкIагъахьэу зэрэфежьагъэхэм, Хэкужъым къэзыгъэзэжьырэ тилъэпкъэгъухэм яIофыгъохэм, фэшъхьафхэм къатегущыIагъ.
Зэфэхьысыжь кIэкI
КIэлэцIыкIу IыгъыпIэхэм, еджапIэхэм адыгабзэр нахьышIоу ащакIуным, къоджэ хасэхэм нахьышIоу Iоф зэрашIэщтым, нэмыкIхэм атегущыIагъэх. Адыгэ Хасэм иIофшIагъэ уезэгъы хъущтэу зэхахьэм щалъытагъ. Общественнэ пшъэрылъхэр дэгъоу зыгъэцакIэхэрэм ащыщхэу ЛIышэ Хьалымэт, Тхьаркъохъо Сафыет, Мыгу Эдуард, Нэхэе Аслъан, Шъхьаплъэкъо ГъучIыпсэ, нэмыкIхэм Адыгэ Хасэм ищытхъу тхылъхэр аратыжьыгъэх. Лъэпкъ Iофыгъоу зэхахьэм къыщаIэтыгъэхэр гъэцэкIагъэ зэрэхъухэрэм тигъэзетеджэхэр ащыдгъэгъозэщтых.
ЕмтIылъ Нурбый.
Адыгэ Макъ