ЕджапIэм ипащэу, Урысыемрэ Адыгеимрэ язаслуженнэ тренерэу Хъот Юныс къызэрэтиIуагъэу, килограмм 73-м нэс къэзыщэчырэмэ якуп Кристина Дюбинар хэтыгъ. Джэрз медалым фэбанэзэ, Татарстан къикIыгъэ Виктория Вишневскаям IукIагъ. Адыгеим щыщ пшъашъэр псынкIэу зэрэгупшысэрэм дакIоу, хэкIыпIэхэр нахьышIоу къыгъотыщтыгъэх. Джэрз медалыр къызыфагъэшъуашэм, спорт еджапIэм ипащэу Хъот Юныс, тренер-кIэлэегъаджэу Василий Есиным «тхьашъуегъэпсэу» ариIожьыгъ.
Тхэквондор спорт лъэпкъ къызэрыкIоп, пхъэшагъэ къызыхэбгъэфэн фае. К. Дюбинар Мыекъопэ къэралыгъо гуманитар техническэ колледжым щеджэ, хэгъэгу зэнэкъокъухэм нахьыпэкIэ ахэлажьэу, илъэс 17 - 20 зыныбжьхэм язэIукIэгъухэм тыжьын медальхэр къащыдихэу гъогогъуитIо къыхэкIыгъ.
- Колледжым идиректорэу, Адыгеим и Парламент и Комитет итхьаматэу КIэрэщэ Андзаур тыфэраз, - зэдэгущыIэгъур лъегъэкIуатэ Ю. Хъотым. - Спортымрэ еджэнымрэ зэрэзэпхыгъэхэм къыпкъырыкIызэ, зэхэщэн IофыгъохэмкIэ ишIуагъэ къытегъэкIы.
НыбжьыкIэхэм сэнэхьатхэм зафагъасэзэ, спортым медальхэр къыщахьых, Адыгэ Республикэм ыцIэ лъагэу аIэтыным пылъых.
Сурэтым итхэр: Урысыем изэнэкъокъу медальхэр къыщыдэзыхыгъэхэр. СэмэгумкIэ къебгъэжьэнышъ, Кристина Дюбинар ящэнэрэу щыт.