Урысыем щыщ цIыфхэу Хъурцэм 20I5 илъэсым къихьагъэхэм япчъагъэ зы миллионым кIахьэу мы мафэхэм къытыгъ Хъурцэм иIэкIоцI IофхэмкIэ Iахьым. Мы пчъагъэр хэхъуагъ %I4 ыпэ итыгъэ илъэсым егъэпшагъэмэ, къеты Iахьым.
Анахьыбэу цIыфхэр зыдэщыIагъэхэр къэлэ шъхьаIэу Тбылыс, хышIуцIэ Iушъом, къушъхьэкъечъэх гъэпсэфыпIэ чIыпIэхэм. Къэлъытэныгъэхэм къызэрагъэлъэгъуагъэмкIэ, Урысыер я 4 чIыпIэм тет Хъурцэм ицIыфхэр къызэрыкIорэ пчъагъэмкIэ.
Ар ауж къенэ Армением, Азербайджан, Тыркуем. Ащ фэдэ туристхэу Хъурцэм къеблагъэхэрэм яхэхъон ылъапсэу кIэлъыплъакIо зырызхэм къыхагъэщы къэралыгъуитIум язэфыщытыкIэхэр нахьышIу ыужрэ илъэс заулэм зэрэхъугъэхэр. НэмыкI кIэлъыплъакIохэм алъытэ Урысыем щыщхэм апае визэ щытыкIэр Хъурцэм зэрэIуихыжьыгъэм къыхэкIэу къэралыгъом къэкIощхэм ахигъэхъуагъэу.
Фитыныгъэ радиом игущыIэгъугъэ Хъурцэм икъэлэ шъхьаIэу Тбылыс щыпсэурэ Тея:
ЫпэкIэ зэрэщытыгъэм елъытыгъэмэ зыпкъитыныгъэ зиIэ къэралыгъоу алъытэшъ арын фай аущтэу туристхэр нахьыбэу къызкIакIо хъугъэхэр. Джыри нахь щыпыутын фай Хъурцэм Европэм икъэлыгъохэм анахьри.
Урысыемрэ Хъурцэмрэ джырэкIэ ядипломат зэфыщытыкIэ щымыIэныгъэм къыхэкIэу цIыфэу къэкIощтхэм нахь къыщегъакIэу сэлъытэ. Тэ тиунагъокIэ зыдгъэпсэфынэу тыкIонэу ежь Хъурцэм къыкIоцIи бэрэ къыхэкIрэп.
КIымэфэ гъэпсэфыгъо уахътэм зыми тыкIошъурэп. Тыфай, шъхьаем тимылку щытыкIэ къыхэкIэу зыгорэм тыкIонэу къыхэкIрэп.
Фитыныгъэ радиом игущыIэгъугъэ Хъурцэм щыщ Ликэ къыхегъэщы:
Сэ зэрэслъытэрэмкIэ, джырэкIэ щытыкIэу къэралыгъуитIум яIэр политикым къыхэкIы нахь, цIымэ зэгурымыIоныгъэ зыгори азфагу дэлъэп.
Тикъэралыгъо Урысыем щыщ цIыфхэр къэкIох Хъурцэм узэплъын гъэшIэгъоныбэ иIэшъ ары. Ахэмэ Хъурцэм къэкIоныр якIэсагъ. ЫкIи нэмыкI къэралыгъомэ ягъэпшагъэмэ мыщ уасэхэр щынахь пыутых.
Хъурцэм зэкIэмкIи къеблэгъагъэх икIыгъэ илъэсым цIыф нэбгырэ миллиони 5 ныкъорэм ехъу. Азыныкъор туристых, бэхэр - ежь ашъхьэ пае, яунэе Iофхэм пае Хъурцэм къэкIогъагъэх. МымакIэу ахэтых ящэнэрэ къэралфгъом кIонхэм пае Хъурцэр зэпырачыгъэу.
Фитыныгъэ радио, Щэрджэс Ларис, Тбылыс