Зэхэпхъэгъэ шъхьэзэкъо Дунэе зэIукIэгъухэр панкраимкIэ Токио щыкIуагъэх. Урысыем ихэшыпыкIыгъэ куп хэтхэу Адыгэ Республикэм икIыгъэ спортсменхэр зэнэкъокъум хэлэжьагъэх. Гъэхъагъэ ашIыгъэу нарт бланэхэм ялъэныкъо гупсэ къызагъэзэжьым, тигуапэу гущыIэгъу тафэхъугъ.
«Адыгея-Юнион-ММА» зыфиIорэ спорт клубым хэтхэу ЕлъэшIыIэ Бислъанрэ Хьатхъохъу Байзэтрэ Японием икъалэу Токио зэкIохэм, тиспортсменхэм ягъэхъагъэхэр апэу къытэзыIуагъэр бэмэ агъэшIэгъуагъ. Дунаим щыцIэрыIо ансамблэу «Налмэсым» ихудожественнэ пащэу, Адыгэ Республикэмрэ Пшызэрэ язаслуженнэ артистэу Хъоджэе Аслъан телефонкIэ заулэрэ къытфытеуагъ. Тиспортсменхэр Токио зынэсхэм, А. Хъоджаер акIэупчIагъ, алырэгъум техьанхэм ыпэкIэ гущыIэгъу афэхъоу зэп къызэрэхэкIыгъэр. Спорт зэнэкъокъухэм нарт батырхэр ахэлажьэхи, текIоныгъэр къызыдахым, мэкъэ IэтыгъэкIэ къэбар гушIуагъор къытлъызгъэIэсыгъэр А. Хъоджаер ары.
ЗэдэгущыIэгъухэм якъэкIуапIэхэр
Адыгеим испортсменхэр республикэм къызэсыжьхэм, Хъоджэе Аслъан ишIуагъэкIэ зэхэщэн Iофыгъохэр псынкIэу зетхьагъэх. Пчэдыжьым редакцием тыщызэIукIагъ.
— Аслъан къыуиIуагъэр умыгъэцакIэу рэхьат къыуитыщтэп, — гушIом хэтэу лъэоир «гъогум къыредзы» Б. ЕлъэшIыIэм. — СамолеткIэ тыкъэбыбыжьызэ къыддэгущыIэщтыгъ, аэропортым тыкъызыщэуцум, телефонкIэ тызэдэгущыIэнэу уахътэ къыхэдгъэкIыщтыгъ. ЗэкIэ IэпыIэгъу къытфэхъугъэхэм, къыткIэупчIагъэхэм тафэраз.
МэфэкI концертхэр
Хъоджэе Аслъан, илъэс заулэкIэ узэкIэIэбэжьмэ, Японием Iоф щишIагъ. Искусствэм, спортым афэгъэхьыгъэ зэIукIэгъухэм ахэлажьэщтыгъ. Гъэсэныгъэу зэригъэгъотыгъэр «Налмэсым», щыIэныгъэм инэмыкI лъэныкъохэм ащегъэфедэ. Шы спортымрэ искусствэмрэ язэпхыныгъэхэр, циркыр, нэмыкIхэри А. Хъоджаем игунэсых. КъокIыпIэм къыщежьэгъэ спорт лъэпкъхэр шIогъэшIэгъоных.
— МэфэкI концертхэр игъэкIотыгъэу республикэм щызэхэщэгъэнхэмкIэ амалыкIэхэм салъэхъу, спортымрэ искусствэмрэ зэпхыныгъэу яIэхэр бгъэдэхэнхэ плъэкIыщт.
Адыгэ быракъым и Мафэ мэлылъфэгъум и 25-м дгъэмэфэкIыщт. Республикэм щыкIощт концертым «Налмэсыр» чанэу хэлэжьэщт, художественнэ, режиссер Iофыгъохэр А. Хъоджаем зэрихьащтых. Олимпиадэхэм, дунэе зэнэкъокъухэм ахэлэжьэгъэ спортсмен цIэрыIохэр мэфэкIым хэлэжьэщтых, адыгэ быракъыр агъэбыбэтэщт.
Токио щытхъур къыщахьыгъ
Зэхэпхъэгъэ боевой шъхьэзэ-къо зэIукIэгъухэу панкраимкIэ Токио щыкIуагъэм ЕлъэшIыIэ Бислъан текIоныгъэр къызэрэщыдихыгъэр къыхэтыутыгъагъ. Гъэзетеджэхэм кIэкIэу къафэтIотэжьын.
Японием испортсменэу Кента Тагати зэнэкъокъухэм илъэс зэфэшъхьафхэм зэIукIэгъу 14 ащыриIагъ, 13-р нокауткIэ къыхьыгъ, зым очко пчъагъэмкIэ щытекIуагъ. Килограмм 77-м нэс къэзыщэчырэмэ якуп Б. ЕлъэшIыIэр хэтэу К. Тагати алырэгъум щыIукIагъ. Зэнэкъокъур такъикъ 15 мэхъу, едзыгъуищэу гощыгъэ. ЯтIонэрэ едзыгъом нокауткIэ адыгэ батырым текIоныгъэр къыщихьыгъ.
Хьатхъохъу Байзэт килограмм 70-м нэс къэзыщэчырэмэ якуп щыбэнагъ. Шумпей Ото ар IукIагъ. Японием испортсмен нахьыпэкIэ зэнэкъокъухэм гъогогъуи 8 текIоныгъэр къащыдихыгъ, 3-р шIуахьыгъ.
Байзэт ящэнэрэ такъикъым «тхьалэ» зыфиIорэ шIыкIэр ыгъэфеди, текIоныгъэр къыдихыгъ.
Урысыем ихэшыпыкIыгъэ командэ хэтэу Сергей Мартыновыр зэнэкъокъум хэлэжьагъ, ар Ростов хэкум щыщ. IэпэIэсэныгъэ дэгъу С. Мартыновым къыгъэлъэгъуагъ, ифэшъуашэу текIоныгъэр къыдихыгъ. ТибэнакIохэм пэщэныгъэ адызезыхьагъэр Виталий Бигдаш ары. Ащ къызэрэхигъэщыгъэу, Адыгеим икIыгъэ спортсменхэу Урысыем ыцIэкIэ Дунэе турнирым хэлэжьагъэмэ спортышхом лIыгъэ къыщагъэлъэгъуагъ.
Егъэжьэгъу мыпсынкIэхэр
Б. ЕлъэшIыIэр Кощхьаблэ къыщыхъугъ. Ятэшэу Аслъан егъэжьэгъум IэпыIэгъу къыфэхъущтыгъ. Ятэ идунай зехъожьым, спортышхом хэмыхьанэу иIахьылхэр къелъэIущтыгъэх, панкраир щынагъоу алъытэщтыгъ. Бислъан Шъачэ, Адлер ащыIэу гум хихыгъэ спорт лъэпкъым зыфигъасэщтыгъ.
— Пэнэжьыкъуае щезгъэжьагъ, самбэмкIэ сыбанэщтыгъ, — къеIуатэ Хьатхъохъу Байзэт. — Спортым зыгорэ гъэхъагъэ щысшIыгъэу щытмэ, тренер-кIэлэегъаджэу Хьабэхъу Адам ары сызфэразэр. Сыдигъуи къыслъыплъагъ, гъогу тэрэз сытехьаным фэшI къысэушъыищтыгъ.
Адыгэ къэралыгъо университетым июридическэ факультет Б. Хьатхъохъум къыухыгъ. Сэнэхьат дэгъу зэригъэгъотыгъэу елъытэ, ау спортышхом лъагъоу щыпхырищырэм текIыным дэгуIэрэп.
— Бислъан фэдэу сэри сиIахьылхэр панкраим сыхэтынэу фэягъэхэп. Арэу щытми, зэрэсшIогъэшIэгъоным фэшI пэрыохъу къысфэхъухэрэп. Мыекъуапэ сыщеджэ зэхъум, Хьэпэе Арамбый сипащэу самбэм сыпылъыгъ. КъокIыпIэм къыщежьэгъэ бэнакIэм сыдихьыхыгъэми, самбэм нэIуасэ къысфишIыгъэ тренерхэр, спортсменхэр сщыгъупшэхэрэп. Японием тыщыIэу телефонкIэ къытфытеуагъэх. Тхьаегъэпсэух, — къытиIуагъ Хьатхъохъу Байзэт.
Наркоманием пэшIуекIо
Б. ЕлъэшIыIэр Адлер щыпсэу зэхъум, тренерэу Агоп Топчан ипэщагъ. Зэхэпхъэгъэ боевой шъхьэзэкъо зэнэкъокъухэмкIэ Адыгеим щызэхащэгъэ федерациеу «ММА-р» зыхэтым Б. ЕлъэшIыIэр ипащ. УрысыемкIэ федерацием ипрезидентыр спортсмен цIэрыIоу Федор Емельяненкэр ары.
Адыгэ Республикэм къыщызэIуахыгъэ спорт клубым ныбжьыкIэхэм зыщагъасэ.
— Спортыр наркоманием зэрэпэшIуекIорэм фэгъэхьыгъэ Iофыгъохэм мэхьэнэ ин ятэты, — къаIуатэ Б. ЕлъэшIыIэмрэ Б. Хьатхъохъумрэ. — КъыдгурэIо, панкраир спорт лъэпкъ къызэрыкIоп. Ащ упылъыным, зэIукIэгъухэм текIоныгъэр къащыдэпхыным фэшI лIыгъэ шапхъэхэр зепхьанхэ фаеу бэрэ къыхэкIы. Автомобиль гъогухэм ныбжьыкIабэ атекIуадэ, шъон пытэхэм апыщагъэр макIэп. Тыфай спортым иамалхэр пIуныгъэм фэдгъэфедэнхэу.
Ныбджэгъур къыпфэгушIо
Апэрэ космонавтэу Юрий Гагариным журналистым иупчIэхэм джэуап къаритыжьызэ къыIогъагъ: «Ныбджэгъу шъыпкъэр къызщылъагъорэр къиныр къызэрэбдиIэтырэм изакъоп. УигушIуагъо къыбдэзыгощырэр, щытхъоу пфаIорэр зыгъэлъапIэрэр ары ныбджэгъу пытэр». ЕлъэшIыIэ Бислъан ишъхьэгъуси, исабый цIыкIоу Эмири, нэмыкIхэри къыфэгушIуагъэх, ныбджэгъухэм агъэлъэпIагъ.
Урысыемрэ Адыгеимрэ ябыракъхэр тикIалэхэм Токио щагъэбыбатэ зэхъум, апэ къагоуцуагъэхэр, адыгэ быракъыр къадаубытызэ сурэтхэр зытырахыгъэхэр Виталий Бигдашрэ Сергей Мартыновымрэ. Тинарт шъаохэм ягъэхъагъэ дунэе къэбар хъугъэ. Тыркуем, Сирием, Израиль, нэмыкI хэгъэгумэ арыс тилъэпкъэгъухэр агъэгушIуагъэх, телефонкIэ къафытеуагъэхэр къахэкIыгъэх.
Шъопсэу, нарт батырхэр! Спортышхом гъэхъагъэу щышъушIырэм хэгъэгур, республикэр лъагэу аIэты. Шъуимедальхэм ахэжъугъэхъонэу Тхьэм тышъуфелъэIу.
ЕмтIылъ Нурбый
adygvoice.ru