Къэбэрдей-Балкъэр республикэм и Iэтащхьэ
КIуэкIуэ Казбек деж
ПщIэ зыхуэтщI зиусхьэн КIуэкIуэ Казбек! Тыркум щыпсэу адыгэхэм, бзэр, хъумэным, ехьэлIауэ плъапIэу, гугъапIэу диIэр Хэкуращ. Iуэхур апхуэдэу щIыщытыри гурыIуэгъуэщ - Хэкум Iэмал зэмылIэужьыгъуэхэр щыIэщ адыгэбзэр, ди культурэр хъумэным, зегъэужьыным пыщIа Iуэхугъуэхэр къэралым и къэрукIэ и IэмалхэмкIэ зэфIэпхыфыну.
Ауэ иужьырей заманхэм Хэкум къикI хъыбархэм ди гур якъутар: псом япэу зигугъу тщIыр Урысейм и парламентым Хабзэ къызэрищтаращ адыгэбзэм ухуейм уеджэ ухуэмейм уемыджэ хъууэ игъэуву.
ИтIаникI адыгэ республикахэм и унэфэщIхэми, Хэкум щыпсоу дэтхэнэ зы адыгэми, псом хуэмыдэжу зыгуэр зыхузэфIэкIыу уэтыку ит лIыфIхэми дыфщогугъыр, а Хабзэ езы Урысейм и Конституциями къемызэгъу къалъытэм зыгуэрурэ фыдекIуэкIыу адыгэбзэм жылагъуэми, къэралыми иджыри къэс щиубыду щыта увыпIэр евмыгъэутIыпщIыну.
Нобэ нэхъыбэу зыщIыпхуэдгъазэр, Налшыч епщыкIуплIанэ еджапIэм къыщекIуэкI мыхъумыщIэхэр аращ. Дэ зэхэтх хъыбархэм къызэраIуатэмкIэ - нэгъабэ а еджапIэм класс нэхъыжьхэм щеджэ сабийхэм, абыхэм я адэ-анэхэм къытыракъузэурэ жырагъыIащ адэкIэ адыгэбзэм еджэн хуэмей хуэдэу. АдыгэбзэкIэ тхылъхэр библиотекам къыщIадзащ, адыгэбзэкIэ езыгъаджэ егъэджакIуэ зыбжанэ еджапIэм IуагъэкIащ.
Ди жагъуэ дыдэ хъуаращ, а щIэпхъэджагъэхэр яхуэзымыдэу уэтыкум къизылъхьахэм ящыщ егъэджакIуэ Багъ Марьям зэхэзехуэн ящIу I4-нэ еджапIэм ищхьэр къызэрыIурагъэхар.
Марьям и хъыбар дэ куэд щIауэ зэхыдох ди культурэм, ди бзэм ехьэлIауэ и тхыгъэ купщIафIэ, бзэ дахэкIэ тхахэм тфIэгъэщIэгъуэну зэIэпытху доджэр. Мы Iуэхухэм фIыуэ хэзыщIыкIыу дызыщIэупщIахэм зыжьэу жаIэр: Багъ Марьям и IэзагъэкIи и лэжьыгъэм псэемыблэжу зэрыбгъэтымкIи, Хэкум зы егъэджакIуэ исмэ - етIыуанэщ: - жаIэри.
ПщIэ зыхуэтщI КIуэкIуэ Казбек, дэ шэч къытетхьэркъым уэ мы уи пащхьэм итлъхьа Iуэхугъуэхэм узэригъэпIейтем, узэригъэгузавэм, пхуэзэфIэкIи блэжьыну яужь узэритым, ахэр адыгэхэм я фейдэ хэлъу зэфIэха хъун щхьэкIэ. ИкIи, Тхьэм жиIэм догугъэр дэ ди Iуэху еплъыкIэри, ди гукъеуэхэри гулъытэншу къомыгъэнэну.
ПщIэ къыпхуэзыщIхэу:
Хьэгъундокъуэ (Yaşar Aslankaya), Тыркум щы1э Хасэхэм я федерациям и Тхьэмадэ.
Тхьэмокъуэ (Cihat Ulus), Бизнесмен ,егъэджак1у1э.
Щоджэн (Ümit Dinçer), Истэмбыл Хасэм и Тхьэмадэ.
ПщыукI (İbrahim Şahin), Сивас къалэ Хасэм и тхьэмадэ
Емуз (Beyazıt Tarakçı) , журналист.
Тегъуэлэн (Yakup Temel) , нэмк1э дохутыр.
Мэмхагъ (Mutlu Akkaya), Къэисыр къалэ хасэм и унэфэ1щхэм хэтщ.
Борэн (Hayrettin Seyhan) , Къэисыр къалэ Хасэм и тхьэмадэ
Бэзир (Abdullah Tezgi) , Анталие хасэм адыгэбзэмк1э и егъэджак1уэ.
Идарей (İsmail Özdemir), Сауди Аравиям щылажьэ бинесмен.
Къарэ (Sinan Özkan), Къэрал къулыкъущ1э.
Молэ (Levent Kaplan), Истэмбыл аэропортым и диспетчер
Дзэшокъуэ (Ahmet Çelik), Мэрэш къалэ Хасэм и унэфэш1хэм яхэтщ.
27/12/2018 гъ
zapravakbr.com