КIэлэцIыкIу къэшъокIо ансамблэу «Шапсыгъэ нартхэр» зыфиIорэм итекIоныгъэхэм джыри къахэхъуагъ. Къуаджэу ШэхэкIэишхо икъэшъокIо цIыкIухэр «Звездный Сочи» зыфиIорэ зэнэкъокъоу псэупIэу Лоо щыкIуагъэм хэлэжьагъэх ыкIи дэгъоу зыкъыщагъэлъэгъуагъ.
Ансамблэм хэтхэр Хьамырзэкъо Джумалдинрэ Лыехэу Артур ыкIи Оксанэ агъэхьазырых. Ахэм Ставрополь щыкIощт фестивалым зытырагъэпсыхьэ, мэзаем илъэсым икIэух концерт къатыщт.
Дунэе фестивалэу «Шъачэ ижъуагъохэр» кIэлэцIыкIу шIушIэ фондэу «Будущее - детям» зыфиIорэм 2011-рэ илъэсым къыщегъэжьагъэу зэхещэ. Ахэм Урысыем ыкIи IэкIыб хэгъэгухэм къарыкIыгъэхэу артист ныбжьыкIэ мини 10-м ехъу ахэлэжьагъ.
Лоо щыкIогъэ зэнэкъокъум Москва хэкум, Санкт-Петербург, Ставрополь краим, Ростов ыкIи Воронеж хэкухэм къарыкIыгъэ купхэр хэлэжьагъэх.
«Нартхэм» яхудожественнэ зэхэщакIоу Дж. Хьамырзэкъом къызэриIуагъэмкIэ, коллективыр купитIоу гощыгъэ. Нахьыжъхэр сценэм есагъэх, къашъохэмкIэ IэпэIасэх. КъэшъокIо анахь цIыкIухэр апэрэу зэнэкъокъум хэлэжьагъэх, ахэм афэгумэкIыхэу яныбджэгъухэр, янэ-ятэхэр залым чIэсыгъэх.
КъэшъокIо ныбжьыкIэхэм якъашъохэр жюрим хэтхэм агу рихьыгъэх, апэрэ степень зиIэ дипломыр къафагъэшъошагъ. Ащ нэмыкIэу къихьащт илъэсым Шъачэ, Москва ыкIи Ереван ащыкIощт зэнэкъокъушхохэм ахэлэжьэнхэу фитыныгъэ къязытырэ сертификатхэр яIэ хъугъэ.
Ансамблэм икъэшъокIо гурыт купи Iахьынчъэу къэнагъэп, яапэрэ диплом мыщ къыщахьыгъ. Дипломым сабыйхэр инэу щыгушIукIыгъэх, джащ фэдэу якъэшъуакIэ еплъыгъэхэм ежьхэри агу рихьыгъэх. Апэрэ текIоныгъэр къыдэзыхыгъэ къэшъокIо купым хэтых Кобж Хьасанэ, Дэгуф Динарэ, Ярослав Сердюковыр, ЖэнэлI Анжелэ, Тутарыщэ Сахьидэ, Светлана Чуриковар, Сетран Атомян, НакIэ ГъучIыпсэ, ТIэшъу Ренат, Гъуашъо Надеждэ, Гъуашъо Тимур, Альвина Бесоловар, Ренат Закутовыр, Кобж Дамир, Ныбэ Аминэ ыкIи Артем Голушко.
Ныбэ Анзор