Адыгеим инароднэ художникэу, ювелирэу Еутых Асе илъэс тамыгъэхэр зэришIыхэрэм тыщыгъуаз. ИлъэсыкIэм ехъулIэу къокIыпIэ мэфэпчъым диштэу илъэсэу къихьэрэм итамыгъэу щыт пкъыгъуакIэ ащ ыIапэ къыпэкIы. Ябгъонэрэ пкъыгъомкIэ ащ бэмышIэу тигъэгушIуагъ.
Цыгъом исурэт зытет пкъыгъор Асе зишIыгъагъэр 2008-рэ илъэсыр къихьэ тетзэ ары. 2009-рэ илъэсым цум, 2010-м хьашыумышым, 2011-м тхьакIумкIыхьэм, 2012-рэ илъэсым блэгъожъым, 2013-м блэм, 2014-м шым ясурэтхэр зытешIыхьэгъэ хьапщып зэфэшъхьафхэр - Iэлъынхэр, Iэхъухэр, бжъэхэр, кулонхэр ыкIи нэмыкIхэр ащ ышIыгъагъэх. КъокIыпIэ мэфэпчъымкIэ 2015-рэ илъэсыр пчэным, адыгэ мэфэпчъымкIэ тIым и Илъэсэу щыт. КъызэрэтщыхъурэмкIэ, ижъыкIэ Кавказым щыпсэущтыгъэ лъэпкъхэм псыхъом дышъэ къызэрэхахыщтыгъэ шIыкIэр урым таурыхъыжъхэм къащытыгъ. Ахэм мэлышъор къушъхьэ псыхъуачIэм чIалъхьэти, римылъэсэхыным пае мыжъохэр тырагъаощтыгъэх. Джарэущтэу мэзитIу фэдизрэ чIагъэлъыщтыгъ. Кавказ къушъхьэхэм ащыбэ дышъэ пшахъор мэлыцым хапкIэщтыгъ. Нэужым мэлышъор загъэстыжьыкIэ дышъэ такъыр цIыкIу къафанэщтыгъ. ТичIыпIэ къыщычIэхыгъэ дышъэм хэшIыкIыгъэ пкъыгъохэр Ошъадэ, Къурджыпс, Шытхьалэ, Улэпэ Iуашъхьэхэм мызэу, мытIоу къащагъотыгъэх.
ТIым и Илъэс ехъулIэу Еутых Асе тIы сурэт зытет кулонрэ IэлъынитIурэ къыгъэхьазырыгъэх. Iэлъынхэм ащыщ сурэтым ишъулъагъорэр. Хабзэ зэрэхъугъэу, журналистэу ЛIыхэсэ Светланэ илъэсыкIэу къихьэрэм фэгъэхьыгъэ пшысэу зэхилъхьагъэм - «ДышъэтIым нартхэм яхэгъэгу къызэригъэнэжьыгъэр» зыфиIорэм лъапсэ фэхъугъэр Асе инэнэжъэу Къадырхъан пшъэшъэжъыем къыфиIотэгъэгъэ къэбарыжъыр ары. Ыныбжь илъэс 11 охъуфэ нэс Асе зыпIугъэр нэнэжъыр ары. Ащ нарт эпосым хэт лIыхъужъхэм афэгъэхьыгъэ къэбархэр къыIотэнхэр икIэсагъ, игуапэу пшъэшъэжъыери ахэм ядэIущтыгъ.
Асе ишъхьэгъусэу Тыркоо Руслъан исэнэхьаткIэ инженер-робототехник, пкъыгъохэм ягъэчъынкIэ ыкIи нэмыкI IофхэмкIэ Асе дэIэпыIэ. Ар компьютерщик, сурэтышI, полиграфическэ продукциемкIэ дизайнерэу, астрологэу щыт. Ащ зэрилъытэрэмкIэ, 2015-рэ илъэсым хэхъоныгъэ зэришIыщт лъэныкъуакIэ Урысыем къыфызэIухыгъэ хъущт, щыIакIэм зызэблихъущт. Урысыем исхэр лъэшэу мы илъэсым тегушхощтых, чIыпIэ зэжъухэм арыфэщтых, бэмэ зафаIэжэн фаеу хъущт. ТIитIур лъэмыджым зэрэтезэрэмыгъафэрэм фэдэу лъэныкъохэр зэжэхэхьащтых. Илъэсым икIэухым зэрэчIыналъэу кIодыным ищынагъо къазышъхьарыхьэкIэ, нахь къэзэрэшIэжьыщтых, бэмэ аригъэгупшысэщтых. ПстэумкIи хэкIыпIэу щыIэр - ШIулъэгъур, Дэхагъэр, ЗыкIыныгъэр, Искусствэр арых.
Адыгэ Макъ
