Тигъэзет къызэрэхиутыгъэу, Адыгэ Республикэм и ЛIышъхьэу ТхьакIущынэ Аслъан илъэсэу икIыгъэм изэфэхьысыжьхэр къызщишIыгъэ пресс-конференцие мы мафэхэм къытыгъ. Ащ хэлэжьэгъэ журналистхэм къатыгъэ упчIэхэм игъэкIотыгъэ джэуапхэр къаритыжьыгъэх, пшъэрылъ шъхьаIэу зыфигъэуцужьыхэрэм къащыуцугъ.
КъэбарлъыгъэIэс амалхэм ялIыкIохэр зыгъэгумэкIыщтыгъэхэ Iофыгъохэм ащыщ Адыгеим ипащэ тапэкIэ зэрагъэнэфэщт шIыкIэр.
- Регионым ипащэ шъолъыр зырызхэм, ащ къыхеубытэх Темыр Кавказым хэхьэрэ субъектхэри, парламентым хедзы. ИлъэситIукIэ Адыгеим щыпсэурэ цIыфхэм яшIоигъоныгъэкIэ республикэм ипащэ занкIэу хадзын амал яIэщт, - къыIуагъ ТхьакIущынэ Аслъан.
АР-м и ЛIышъхьэ зэрилъытэрэмкIэ, непэ икомандэ хэт нэбгырэ пэпчъ мы IэнатIэм Iухьаныр тефэ. Сыда пIомэ республикэм хэхъоныгъэшIоу ышIыгъэхэр зы нэбгырэп зишIушIагъэр, ар зэрэкомандэу яIофшIагъ.
Мы аужырэ илъэсхэм Адыгеим къихьэрэ инвесторхэм япчъагъэ хэпшIыкIэу хэхъуагъ, ахэм тиэкономикэ ахъщэу къыхалъхьагъэр сомэ миллиарди 105,7-м ехъу. Мы уахътэм анахь узщыгугъын инвесторэу республикэм итхэр зыфэдэхэм, ахэм проектэу агъэцакIэхэрэм журналистхэр къакIэупчIагъэх.
ТхьакIущынэ Аслъан къызэриIуагъэмкIэ, корпорациеу «Европея» зыфиIорэм псэупIэ комплексэу «Итальянский квартал» зыцIэр Мыекъуапэ щишIын гухэлъ иI. Адыгеим икъэлэ шъхьаIэ игупчэ, парк-хьакIэщэу «Мадина» зыфиIоу джы ашIырэм пэмычыжьэу комплексым хэхьащт унэхэр агъэпсыщтых.
Мы проектыр гъэцэкIагъэ зэрэхъущтым ыкIи тапэкIэ Iоф зэрэзэдашIэн алъэкIыщт лъэныкъохэм атегущыIагъэх АР-м и ЛIышъхьэрэ корпорациеу «Европея» зыфиIорэм ипрезидентэу Ризван Исаевымрэ.
ТхьакIущынэ Аслъан зэрилъытэрэмкIэ, «Европеер» узщыпсэущт районэу зэрэщытым имызакъоу, инфраструктурэ зэтегъэпсыхьагъэ зиIэ къэлэ цIыкIу. «Итальянскэ кварталымрэ» хьакIэщэу «Мадина» зыфиIорэмрэ Мыекъуапэ итеплъэ къагъэдэхэщт. ТапэкIэ мыщ семинархэр, форумхэр, бизнес-зэIукIэгъухэр ащыкIонхэу республикэм ипащэ щэгугъы.
- Илъэс пчъагъэ хъугъэу зишIын къызэтеуцуагъэу, тикъэлэ шъхьаIэ итеплъэ къэзыгъэIаеу щытыгъэ хьакIэщэу «Туристым» ычIыпIэкIэ парк-отелэу «Мадинэмрэ» «Немецкая деревня» зыфиIорэм ехьщыр «итальянскэ кварталымрэ» Мыекъуапэ игупчэ къиуцощтых. Ащ хэхьащт мылъкур Ризван Исаевыр зипэщэ холдингым къетIупщы, - къыIуагъ ТхьакIущынэ Аслъан.
СатыушIыпIэ-зыгъэпсэфыпIэ гупчэу «Красная площадь» зыфиIорэм ишIын епхыгъэ упчIэ пресс-конференцием къыщаIэтыгъ.
АР-м и ЛIышъхьэ къызэриIуагъэмкIэ, мы илъэсым псэуалъэм ишIын рагъэжьэнэу щытыгъ, ау экономикэ къиныгъо-
хэм къахэкIыкIэ проектым игъэцэкIэн иуахътэ зэкIахьан, ащ зэхъокIыныгъэхэр фашIынхэ фаеу хъугъэ.
- Дгъэнэфэгъэ инвестиционнэ проектхэр зэкIэ гухэлъэу тиIэхэм адиштэу гъэцэкIагъэхэ мэхъу. Къихьащт илъэсым нэс зэкIэтхьэгъэ закъор гупчэу «Красная площадь» зыфиIорэм иегъэжьэн ары. Мы лъэныкъомкIэ республикэм къытефэрэр игъом ыкIи икъоу егъэцакIэ. СатыушIыпIэ гупчэм игъэпсын къыдыхэлъытагъэу инвестиционнэ площадкэр дгъэхьазырыгъэ, ащ сомэ миллион 50 пэIудгъэхьагъ, - къыIуагъ ТхьакIущынэ Аслъан.
Сомэ миллиарди 2,4-рэ зытефэрэ проектым фэгъэхьыгъэ зэзэгъыныгъэм АР-м и ЛIышъхьэрэ холдингэу «Рамо-М» зыфиIорэм ипащэхэмрэ зэдыкIэтхэгъагъэх. Ащ къыдыхэлъытагъэу Мыекъуапэ ирайон цIыкIоу «Черемушкэм» къыщыхахыгъэ чIыпIэм сатыушIыпIэ-зыгъэпсэфыпIэ гупчэр къиуцонэу агъэнафэ.
Урысыем имызакъоу, дунаим щызэлъашIэрэ адыгэ къуаем ибренд нэмыкI шъолъырхэм агъэфедэзэ, къызэрэдагъэкIырэм еплъыкIэу фыриIэмкIэ АР-м и ЛIышъхьэ еупчIыгъэх.
- Адыгэ къое шъыпкъэр къызыщыдагъэкIырэр Адыгеир ары, адрэ продукциер нэпцIы, шапхъэхэм адиштэрэп. АщкIэ фитыныгъэу тиIэхэр къэтыухъумэнхэм тынаIэ тедгъэтыщт, - къыIуагъ ТхьакIущынэ Аслъан упчIэу къыратыгъэм джэуап къыритыжьызэ.
АР-м и ЛIышъхьэ къызэрэхигъэщыгъэмкIэ, илъэсым къыкIоцI къое тонн мини 10 фэдиз республикэм къыщыдагъэкIы. Ар Москва, Урысыем инэмыкI къэлэшхохэм ащаIуагъэкIы.
Пресс-конференцием хэлэжьэгъэ журналистхэм нэмыкI упчIабэ къатыгъ, нэбгырэ пэпчъ АР-м и ЛIышъхьэ шъхьэихыгъэ джэуап ритыжьыгъ.
ТХЬАРКЪОХЪО Адам
Адыгэ Макъ